Read Central Bicolano Joshua 9 Bible Online

Joshua 9 - Central Bicolano bible

Joshua 9

¹An mga kapangganahan kan Israel nabaretaan kan gabos na hade sa solnopan kan Jordan—sa kabubuldan, sa kababan, asin sa baybayon kan Dagat nin Mediteraneo sagkod sa Lebanon, sa parteng amihan. Sinda iyo an mga hade kan mga Heteo, Amoreo, Cananeo, Perezeo, Heveo, asin mga Jebuseo.

²Nagsararo an mga hadeng ini tanganing labanan si Josue asin an mga Israelita.

³Alagad an ginibo ni Josue sa Jerico asin sa Ai nabaretaan kan mga Heveong taga Gibeon,

⁴asin nagkaoroyon sinda na dayaon si Josue. Nagkurua sinda nin mga pagkakan asin kinargahan ninda an saindang mga asno nin mga daan na sako saka mga may tagubhang na anit na laogan nin arak.

⁵Nagsulot sinda nin mga girising gubing asin pudpod na mga sandalyas. Nagbalon sinda nin mga tinapay na matagas na asin alamagon.

⁶Nagduman sinda ki Josue sa kampo sa Gilgal dangan nagsabi saiya asin sa mga kamagurangan kan Israel, “Hale kami sa harayong lugar. Hinahagad ming makipagtipan kamo sa samo.”

⁷Alagad nagsimbag an mga kalalakihan nin Israel, “Tano ta makikipagtipan kami saindo? Tibaad harani man sana an pinag-eerokan nindo.”

⁸Nagsabi sinda ki Josue, “Andam kaming maglingkod saindo.” Hinapot sinda ni Josue, “Mga siisay kamo? Saen kamo harale?”

⁹Dangan nag-istorya sinda: “Hale kami sa sarong lugar na harayo nin marahay, huli ta nadangog mi an manongod sa Kagurangnan na saindong Dios. Nadangog mi an gabos na ginibo niya sa Egipto

¹⁰asin an ginibo niya sa duwang hadeng Amoreo sa sirangan kan Jordan: si Hadeng Sihon kan Hesbon asin si Hadeng Og kan Basan, na nag-erok sa Astarot.

¹¹Sinabihan kami kan samong mga lider asin kan gabos na tawo sa samong daga na mag-andam nin pagkakan para sa halawig na pagbaklay pasiring digdi, tanganing makihampang saindo asin sabihan kamo na andam kaming maglingkod saindo asin pakiolayan kamo na makipagtipan samo.

¹²Hilinga nindo an samong tinapay; mainit pa ini kan maghale kami sa harong asin magpoon kaming maglakaw tanganing makihampang saindo. Alagad hilinga! Ngunyan matagas na ini asin alamagon.

¹³Bago pa an mga anit na ini kan panoon mi nin arak; uya ngunyan mga girisi na. Girisi na man an samong mga gubing asin pudpod na an samong mga sandalyas huli sa halawig na paglakaw.”

¹⁴Inako kan mga kamagurangan an pagkakan ninda, alagad dai ngona nakihumapot sa Kagurangnan.

¹⁵Nakipagtipan si Josue sa mga taga Gibeon asin tinugotan niya sindang mabuhay. Nagsumpa an mga lider kan banwaan nin Israel na ootobon ninda an tipan.

¹⁶Tolong aldaw pakatapos na gibohon an tipan, naaraman kan mga Israelita na an mga tawong idto nag-eerok mananggad sa lugar na harani sainda.

¹⁷Kaya nagralakaw an mga Israelita asin pakalihis nin tolong aldaw, nakaabot sinda sa mga syudad na pinag-eerokan kan mga tawong idto: sa Gibeon, Kefira, Beerot asin Kiriat-jearim.

¹⁸Alagad dai ninda pwedeng gadanon an mga tawong idto, huli ta an saindang mga lider nanumpa sainda sa ngaran nin Kagurangnan, an Dios nin Israel. An gabos na Israelita nagreklamo sa mga lider manongod kaini,

¹⁹alagad nagsimbag an mga lider, “Nanumpa kami sainda sa ngaran nin Kagurangnan, an Dios nin Israel. Dai ta sinda pwedeng gadanon.

²⁰Papabayaan ta sindang mabuhay huli kan samong sumpa; kun dai, papadusahan kita nin Dios.

²¹Pabayaan nindo sindang mabuhay, alagad kaipuhan magputol sinda nin kahoy asin magsakdo nin tubig para sato.” Ini an nagin pahayag kan mga lider.

²²Ipinaapod ni Josue an mga taga Gibeon asin hinapot, “Tano ta dinaya nindo kami? Tano ta sinabi nindong hale kamo sa harayong lugar, mantang digdi man sana kamo nag-eerok?

²³Huli ta ginibo nindo ini, kinondenar kamo nin Dios. Danay kamong magigin oripon, mga paraputol nin kahoy asin parasakdo nin tubig para sa santwaryo nin sakong Dios.”

²⁴Nagsimbag sinda, “Ginibo mi idto huli ta naaraman mi na totoong ipinagboot nin Kagurangnan, na saindong Dios, sa sorogoon niyang si Moises na itao saindo an bilog na daga asin gadanon an mga tawong nag-eerok diyan. Ginibo mi idto huli ta natatakot kami na tibaad gadanon nindo kami.

²⁵Ngunyan nasa irarom kami kan saindong kapangyarihan; giboha nindo samo an pinaghohona nindong matanos.”

²⁶Kaya ini an ginibo ni Josue: ilinigtas niya sinda asin dai tinugotan an mga Israelita na gadanon sinda.

²⁷Alagad ginibo niya sindang mga oripon, mga paraputol nin kahoy asin parasakdo nin tubig para sa mga Israelita asin para sa altar nin Kagurangnan. Sagkod ngunyan ginigibo ninda an trabahong ini sa lugar na pinili nin Kagurangnan na pagsasambahan saiya.