Read Central Bicolano Judges 11 Bible Online

Judges 11 - Central Bicolano bible

Judges 11

¹Si Jefta sarong maisog na soldados na taga Gilead, alagad aki siya nin sarong maraot na babae. An saiyang ama na si Gilead

²igwa pa nin ibang aking lalaki sa tunay na agom. Kan magdarakula na an mga aki, pinalayas ninda si Jefta dangan sinabihan, “Dai ka nin mamanahon sa samong ama huli ta aki ka nin ibang babae.”

³Nagdulag si Jefta sa saiyang mga tugang asin nag-erok sa daga nin Tob. Duman, nakipagsaro saiya an grupo nin mayong halagang mga tawo asin nag-iriba sinda saiya.

⁴Nag-agi an panahon dangan nakigera an mga Ammonita sa mga Israelita.

⁵Kan mangyari ini, nagduruman ki Jefta an mga lider nin Gilead tanganing kuahon siya hale sa daga nin Tob.

⁶Olay ninda, “Madya asin pangenotan mo kami tanganing labanan an mga Ammonita.”

⁷Alagad nagsimbag si Jefta, “Bakong naoongis kamo sako, kaya pinalayas nindo ako sa harong nin sakong ama? Tano ta madolok kamo sako ngunyan na igwa na kamo nin problema?”

⁸Sinabihan ninda si Jefta, “Napadigdi kami saimo ngunyan huli ta boot ming mag-iba ka samo sa pakilaban sa mga Ammonita, asin tanganing pangenotan mo an bilog na banwaan nin Gilead.”

⁹Nagsimbag si Jefta, “Kun ipag-iba nindo ako sa pakilaban sa mga Ammonita asin itao sako nin Kagurangnan an kapangganahan, ako na an magigin pamayo nindo.”

¹⁰Nagsimbag sinda, “Oyon kami. An Kagurangnan an satong saksi.”

¹¹Kaya nag-iba si Jefta sa mga lider nin Gilead asin ginibo siyang pamayo saka lider kan banwaan; sinambit niya giraray duman sa Mizpa, sa atubang nin Kagurangnan, an saiyang mga kahagadan.

¹²Dangan nagpadara si Jefta nin mga sugo sa hade kan mga Ammonita tanganing magsabi, “Tano ta kinakalaban nindo kami? Tano ta luminaog kamo sa sakong daga?”

¹³Nagsimbag an hade kan Ammon sa mga sinugo ni Jefta, “Kan umabot an mga Israelita hale sa Egipto, kinua ninda an sakong daga magpoon sa Salog nin Arnon sagkod sa Salog nin Jabbok asin Jordan. Kaya kaipuhan ibalik nindo iyan sako nin matoninong.”

¹⁴Pinabalik ni Jefta sa hade an mga sinugo,

¹⁵dara an simbag na ini: “Bakong totoo na kinua kan Israel an daga nin Moab o nin Ammon.

¹⁶Iyo ini an nangyari: pakahale sa Egipto kan mga Israelita, nag-agi sinda sa kalangtadan pasiring sa Dagat na Pula sagkod na makaabot sa Kades.

¹⁷Dangan nagpadara sinda nin mga sugo sa hade nin Edom tanganing tugotan sindang makaagi sa saiyang daga. Alagad habong magtugot an hade. Nagpadara man sinda nin mga sugo sa hade nin Moab alagad habo man niyang paagihon an mga Israelita sa saiyang daga. Kaya nag-ontok sa Kades an mga Israelita.

¹⁸Dangan ipinadagos ninda an pagbaklay sa kalangtadan na nag-agi sa palibot kan daga nin Edom asin Moab sagkod na makaabot sa sirangan na parte kan Moab, sa ibong kan Salog nin Arnon. Duman sinda nagkampo alagad dai sinda nagbalyo sa salog huli ta iyo idto an kasagkoran nin Moab.

¹⁹Pakatapos, nagpadara an mga Israelita nin mga sugo ki Sihon na hade kan mga Amoreo duman sa Hesbon tanganing tugotan sindang makaagi sa saiyang daga pasiring sa sadiri nindang daga.

²⁰Alagad dai sinda pinaagi ni Sihon. Tinipon ni Sihon an gabos niyang hukbo asin nagkampo sinda sa Jahaz, dangan sinalakay ninda an Israel.

²¹Alagad itinao nin Kagurangnan, an Dios nin Israel, sa mga Israelita an kapangganahan laban ki Sihon. Huli kaini, sinakop ninda an gabos na teritoryo kan mga Amoreo na nag-erok sa dagang idto.

²²Sinakop ninda an gabos na teritoryo kan mga Amoreo magpoon sa Arnon sa habagat sagkod sa Jabbok sa amihan, asin magpoon sa kalangtadan sa sirangan sagkod sa Jordan sa solnopan.

²³Kaya an Kagurangnan, an Dios nin Israel, an nagpahale sa mga Amoreo para sa saiyang banwaan, an mga Israelita.

²⁴Tano ta boot nindong kuahon iyan ngunyan? Saindo na an itinao saindo ni Kemos na saindong dios-dios, alagad sasadirihon mi an kinua para sa samo nin Kagurangnan na samong Dios.

²⁵Sa paghona mo mas marahay ka ki Balak na aking lalaki ni Zippor na hade nin Moab? Ano, nakilaban lamang siya sa Israel? Nakigera lamang siya samo?

²⁶Sa laog nin tolong gatos na taon nag-erok an mga Israelita sa Hesbon, sa Aroer, asin sa mga banwa na nasa palibot kaiyan, sagkod sa mga syudad na yaon sa pangpang kan Salog nin Arnon. Tano ta dai mo kinua an dagang idto sa laog kan panahon na iyan?

²⁷Dai ako nagkasala saimo; ika an minagibo nin maraot sako huli ta kinakalaban mo ako. An Kagurangnan an Hukom; siya an maghukom sa mga Israelita asin sa mga Ammonita.”

²⁸Alagad dai dinangog kan hade kan mga Ammonita an mensahe ni Jefta.

²⁹Dangan uminabot ki Jefta an Espiritu nin Kagurangnan. Naglibot si Jefta sa Gilead asin sa Manases dangan nagbalik sa Mizpa sa Gilead asin nagpadagos sa Ammon.

³⁰Nanuga siya sa Kagurangnan: “Kun itao mo sako an kapangganahan laban sa mga Ammonita,

³¹idodolot ko saimo bilang tinutong na atang an enot na tawong magsabat sako hale sa laog kan sakong harong pagbalik ko hale sa kapangganahan.”

³²Dangan nagbalyo si Jefta sa salog tanganing labanan an mga Ammonita. Itinao nin Kagurangnan saiya an kapangganahan.

³³Linabanan niya sinda magpoon sa Aroer sagkod sa mga lugar na kataed kan Minnit. Nasakop niya an beynteng syudad sagkod sa Abel-keramim. Dakul an ginadan kan mga Israelita asin nadaog ninda an mga Ammonita.

³⁴Kan magpuli si Jefta sa Mizpa, sinabat siya kan aki niyang babae na nagsasayaw mantang nagtutugtog nin tamborin. Siya an bugtong na aki ni Jefta,

³⁵kaya kan mahiling siya ni Jefta, ginisi niya an saiyang gubing sa kamondoan dangan nagsabi, “Aki ko, rinoronot mo an puso ko! Tano ta ika pa an magigin dahelan kan sakong kamondoan? Nanuga ako sa Kagurangnan asin dai ko na pwedeng bawion pa iyan!”

³⁶Sinimbag siya kan saiyang aki, “Kun nanuga ka sa Kagurangnan, giboha sako sosog sa sinabi mo, huli ta pinabalos ka na niya sa mga kaiwal mong Ammonita.”

³⁷Alagad nakimaherak siya sa saiyang ama, “Saro sana an hagad ko: sa laog nin duwang bulan, pabayaan mo akong maglakaw sa kabukidan sa kaibahan kan sakong mga katood tanganing magmondo, huli ta magagadan ako na sarong birhen.”

³⁸Tinugotan ni Jefta an saiyang aki na maglakaw sa laog nin duwang bulan. Nagduman siya asin an saiyang mga katood sa kabukidan asin nagmondo huli ta magagadan siya na sarong birhen.

³⁹Pakalihis nin duwang bulan, nagbalik siya sa saiyang ama. Ginibo ni Jefta saiya an panuga niya sa Kagurangnan. Kaya nagadan na sarong birhen an aki niyang babae. Kaya nagin kaugalean sa Israel

⁴⁰na taon-taon, sa laog nin apat na aldaw, minaruluwas an kababaehan tanganing ipagmondo an aking babae ni Jefta na taga Gilead.