Read Central Bicolano Judges 2 Bible Online

Judges 2 - Central Bicolano bible

Judges 2

¹Hale sa Gilgal, an anghel nin Kagurangnan nagduman sa Bokhim asin nagsabi sa mga Israelita, “Ilinuwas ko kamo hale sa Egipto asin dinara sa dagang ipinanuga ko sa saindong mga ginikanan. Nagtaram ako kaidto: ‘Dai ko tatalikodan an sakong tipan sa saindo.

²Dai kamo makipagtipan sa mga tawong nag-eerok sa dagang ini. Gabaon nindo an saindang mga altar.’ Alagad ano ining ginibo nindo? Dai nindo kinuyog an sakong pagboot!

³Kaya sinasabihan ko kamo ngunyan na dai ko papahaleon an mga tawong ini sa pagdangadang nindo. Magigin mga kaiwal nindo sinda asin an pagsamba sa saindang mga dios-dios iyo an magigin siod nindo.”

⁴Pakasabi kaini kan anghel, naghiribi an bilog na banwaan nin Israel.

⁵An lugar na idto nginaranan Bokhim. Nagdolot sinda duman nin mga tinutong na atang sa Kagurangnan.

⁶Isinubol ni Josue an banwaan nin Israel asin an lambang saro naglakaw tanganing sadirihon an saiyang nagin kahirasan.

⁷Mantang buhay pa si Josue, naglingkod sa Kagurangnan an bilog na Israel, asin maski kan magadan na siya, padagos man giraray sinda sa paglingkod mantang mga buhay pa an saindang mga lider na nakahiling kan dakulang ngangalasan na ginibo nin Kagurangnan para sa Israel.

⁸Nagadan si Josue, na aking lalaki ni Nun asin sorogoon nin Kagurangnan, sa edad na syento dyes na taon.

⁹Ilinubong siya sa saiyang kahirasan na daga duman sa Timnat-sera, sa mabulod na daga ni Efraim na nasa amihan kan Bukid nin Gaas.

¹⁰Nagkagaradan an gabos na kabilang sa henerasyon na idto, asin an bagong henerasyon dai nakamidbid sa Kagurangnan asin kan mga ginibo niya para sa Israel.

¹¹Dangan nagkasala sa Kagurangnan an banwaan nin Israel asin nagpoon sindang magsamba sa mga Baal.

¹²Nag-ontok sinda sa pagsamba sa Kagurangnan, an Dios kan saindang mga ginikanan, an Dios na nagligtas sainda sa Egipto, asin nagpoon sindang magsamba sa ibang dios na pinagsasamba kan mga tawong nasa palibot ninda, kaya naanggot sainda an Kagurangnan.

¹³Nag-ontok sinda sa pagsamba sa Kagurangnan asin naglingkod sa mga Baal sagkod sa mga Astarte.

¹⁴Kaya naanggot nin marahay sa sainda an Kagurangnan asin tinugotan niyang paghabonan asin salakayon an mga Israelita. Tinugotan niyang daogon kan mga kaiwal ninda an Israel, sagkod na dai na ninda kayang iligtas an saindang sadiri.

¹⁵Kun nakikilaban sinda, kinakalaban sinda nin Kagurangnan siring sa saiyang sinabi; kaya dakula an saindang kahaditan.

¹⁶Dangan tinawan nin Kagurangnan an Israel nin mga hukom na nagligtas sainda sa mga parasalakay.

¹⁷Alagad dai ninda dinangog an saindang mga hukom. Dai sinda nagmaimbod sa Kagurangnan; nagsamba sinda sa ibang dios. Dai sinda nagsunod sa mga ipinagboot nin Kagurangnan, bakong arog kan saindang mga magurang.

¹⁸Kun tinatawan nin Kagurangnan an Israel nin sarong hukom, iniibahan niya ini asin iliniligtas an mga tawo sa saindang mga kaiwal sagkod na buhay pa an hukom. Naheherak an Kagurangnan sainda huli ta minaagrangay sinda dahel sa kasakitan asin kaoripnan.

¹⁹Alagad sa oras na magadan an hukom, minabalik an mga tawo sa dati nindang gibo, asin an bagong henerasyon nagigin orog na maraot ki sa saindang mga magurang. Minalingkod sinda asin minasamba sa ibang mga dios; habo nindang bayaan an mga maraot nindang gibo.

²⁰Dangan naanggot an Kagurangnan sa Israel asin nagtaram, “Dai inotob kan nasyon na ini an tipan na ipinagboot ko sa saindang mga ginikanan. Huli ta dai sinda nagsunod sako,

²¹dai ko na papahaleon an arin man sa mga natatadang nasyon sa daga pagkagadan ni Josue.

²²Gagamiton ko sinda sa pagbalo kun totoong masunod sako an mga Israelitang ini, arog kan saindang mga ginikanan.”

²³Kaya itinugot nin Kagurangnan na padagos na mag-erok an mga nasyon na ini sa daga; dai niya itinao ki Josue an kapangganahan laban sainda, ni pinahale tolos sa daga pakagadan ni Josue.