Read Central Bicolano Judges 21 Bible Online

Judges 21 - Central Bicolano bible

Judges 21

¹Kan magkatiripon an mga Israelita sa Mizpa, nanumpa sinda sa Kagurangnan na, “Mayo nin siisay man sa samo na matugot na ipaagom an saiyang aking babae sa sarong Benjaminita.”

²Kaya nagduman sinda sa Betel asin nagturukaw sa atubang nin Dios sagkod banggi. Naghaya sinda sa pagmondo.

³Nagsarabi sinda, “O Kagurangnan Dios nin Israel, tano ta nangyari ini samo? Tadaw ta mawawara an sarong tribu nin Israel?”

⁴Pagkaaga, amay na nagbangon an mga Israelita dangan naggibo nin sarong altar duman. Nagdolot sinda nin mga tinutong na atang asin mga dolot para sa katoninongan.

⁵Pakatapos, naghinarapotan sinda, “Arin sa mga tribu nin Israel an dai nagduman sa Mizpa sa pagtiripon para sa Kagurangnan?” (Huli ta nagsumpa sinda na gagadanon an siisay man na dai nagduman sa Mizpa.)

⁶Naherak an mga Israelita sa mga tugang nindang Benjaminita asin nagsabi sinda, “Sarong tribu an nawara sa Israel ngunyan.

⁷Ano an satong magigibo tanganing matawan ta nin agom an natatada pang kalalakihan ni Benjamin? Dai ta man pwedeng itao sainda an satong mga aking babae huli ta nanumpa kita sa Kagurangnan.”

⁸Kan maghapot sinda kun igwang mga grupo sa mga tribu nin Israel na dai nagduman sa pagtiripon sa Mizpa, naaraman ninda na mayong nagduman hale sa Jabes sa Gilead,

⁹huli ta kan apodon an mga ngaran duman sa katiriponan, dai nin nagsimbag na taga Jabes.

¹⁰Kaya an katiriponan nagpadara nin dose mil kan saindang pinakamaisog na mga lalaki dangan pinagbotan, “Magduman kamo sa Jabes asin gadanon nindo an gabos na yaon duman, sagkod an kababaehan saka kaakian.

¹¹Gadanon nindo an gabos na lalaki asin man an mga babae na bako nang birhen.”

¹²Nakakua sinda sa Jabes nin apat na gatos na birhen asin dinara ninda sinda sa kampo sa Shilo na yaon sa Canaan.

¹³Dangan an bilog na katiriponan nagpasugo sa mga Benjaminita na yaon duman sa Gapo nin Rimmon, asin nagpahayag sainda nin katoninongan bilang kataposan kan gera.

¹⁴Nagbalik an mga Benjaminita asin itinao sainda kan ibang mga Israelita an mga daragang hale sa Jabes na dai ninda ginadan. Alagad kulang pa an mga babae.

¹⁵Naherak an mga tawo sa mga Benjaminita huli ta pinutol nin Kagurangnan an pagkaborogkos kan mga tribu nin Israel.

¹⁶Kaya nagsabi an mga namamayo kan katiriponan, “Ano an satong magigibo tanganing matawan ta nin mga agom an natatadang kalalakihan ni Benjamin? Mayo nang mga babae sa tribu ninda!

¹⁷Dai dapat na mawara an saro kan mga tribu nin Israel. Kaipuhan makakua kita nin paagi tanganing mabuhay an tribu ni Benjamin.

¹⁸Dai ta pwedeng ipaagom sainda an satong mga aking babae huli ta nanumpa kitang mamaldisyonon an siisay man na magpaagom kan saiyang aking babae sa sarong Benjaminita.”

¹⁹Dangan nagsabi sinda, “Harani na an taonan na pagselebrar kan pyesta nin Kagurangnan sa Shilo.” (An Shilo nasa amihan kan Betel, sa habagat nin Lebona, asin sa sirangan kan dalan sa pagultanan kan Betel asin Shekem.)

²⁰Kaya pinagbotan ninda an mga Benjaminita, “Lakaw dangan magtago kamo sa mga ubasan

²¹asin magmasid. Pagluwas kan mga daraga nin Shilo tanganing magsayaw sa pyesta, magluwas man kamo hale sa ubasan. Dangan mandakop nin agom an lambang saro saindo asin ipag-iba nindo sinda sa teritoryo ni Benjamin.

²²Kun magreklamo samo an saindang mga ama o mga tugang na lalaki, sasabihan mi sinda na, ‘Pabayaan na nindo sinda sa samo huli ta dai mi man sinda kinua saindo sa gera tanganing magin agom nyamo. Dai man nindo sinda itinao samo kaya dai man kamo nagtalikod sa saindong panuga.’”

²³Ginibo ini kan mga Benjaminita; an lambang saro sainda nagpili nin babae sa mga daragang nagsasayaw sa Shilo asin dinara ninda sinda sa saindang teritoryo. Pinatindog giraray ninda an saindang mga banwa dangan duman na sinda nag-erok.

²⁴Kan panahon man na idto, nagharale an iba pang mga Israelita tanganing magpuli sa sadiri nindang tribu asin pamilya patin mga pagsadiri.

²⁵Mayo pa kaidto nin hade sa Israel, kaya an lambang saro naggigibo kan pinaghohona niyang tama.