Read Central Bicolano Judges 4 Bible Online

Judges 4 - Central Bicolano bible

Judges 4

¹Pakagadan ni Ehud, an banwaan nin Israel nagkasala na naman sa Kagurangnan.

²Kaya ipinasakop sinda nin Kagurangnan ki Jabin, sarong hadeng Cananeo na naghade sa syudad nin Hazor. Si Sisera, na taga Haroset-hagoiim, iyo an pamayo kan saiyang hukbo.

³Si Jabin igwa nin nuebe syentos na karwaheng gibo sa lansang, asin sa laog nin beynteng taon, pinasakitan niya saka inapi an mga Israelita, kaya nag-agrangay sinda sa Kagurangnan tanganing tabangan.

⁴Naglilingkod kaidto bilang hukom sa Israel an babaeng propeta na an ngaran Debora, na agom ni Lappidot.

⁵Nakaugalean na ni Debora an pagtukaw sa lindong nin sarong palma, sa pagultanan kan Rama asin Betel sa mabulod na daga nin Efraim. Dinadalaw siya kan mga Israelita huli sa saiyang mga hatol.

⁶Sarong aldaw, ipinaapod niya si Barak, na aking lalaki ni Abinoam kan syudad nin Kedes sa daga nin Neftali. Sinabihan niya si Barak, “Ini an pagboot saimo nin Kagurangnan: ‘Hale sa mga tribu ni Neftali asin ni Zabulon, kumua ka nin dyes mil na kalalakihan dangan pangenotan mo sinda pasiring sa Bukid nin Tabor.

⁷Dadarahon ko saimo si Sisera na pamayo kan hukbo ni Jabin tanganing labanan ka duman sa Salog nin Kison. Dadarahon niya an saiyang mga karwahe sagkod mga soldados, alagad itatao ko saimo an kapangganahan.’”

⁸Nagsimbag si Barak, “Maduman ako kun kaiba taka; alagad kun dai mo ako iibahan, dai man ako maduman.”

⁹Nagsabi si Debora, “Iibahan taka, alagad bakong mapapasaimo an dangog kan kapangganahan, huli ta itatao nin Kagurangnan si Sisera sa sarong babae.” Kaya nagpasiring sa Kedes si Debora kaiba si Barak.

¹⁰Inapod ni Barak an mga tribu ni Zabulon asin ni Neftali; suminunod saiya sa Kedes an sampolong ribong kalalakihan. Nag-iba man saiya si Debora.

¹¹Sa oras na idto, naghale si Heber na Cineo sa lugar kan kapwa niya Cineo, na kapagarakian ni Hobab na panugangan na lalaki ni Moises. Nagtugdok si Heber kan saiyang tolda harani sa Kedes, sa may kahoy na hamurawon sa Zanannim.

¹²Kan maisihan ni Sisera na tuminukad sa Bukid nin Tabor si Barak na aking lalaki ni Abinoam,

¹³tinipon niya an gabos niyang tawohan asin an siyam na gatos na karwaheng gibo sa lansang, dangan hale sa Haroset-hagoiim, pinaduman niya sinda sa Salog nin Kison.

¹⁴Sinabihan ni Debora si Barak, “Lakaw! An Kagurangnan an mangengenot saimo! Sa aldaw na ini, itatao niya saimo an kapangganahan laban ki Sisera.” Kaya sa pangenot ni Barak, naglugsot hale sa Bukid nin Tabor an dyes mil na kalalakihan,

¹⁵asin kan salakayon ninda an kampo ni Sisera, linibong nin Kagurangnan si Sisera sagkod an saiyang mga tawohan. Naglusad si Sisera sa saiyang karwahe asin nagdadalagan na nagdulag.

¹⁶Linamag ni Barak an mga karwahe saka hukbo ni Sisera sagkod sa Haroset-hagoiim. Nagkagaradan an bilog na hukbo ni Sisera; mayo nin natada maski saro.

¹⁷Alagad nakadulag si Sisera pasiring sa tolda ni Jael, na agom ni Heber na Cineo, huli ta bako man kaiwal ni Hadeng Jabin an pamilya ni Heber.

¹⁸Sinabat ni Jael si Sisera asin sinabihan, “Dagos, kagurangnan; magdagos ka sa sakong tolda asin dai ka matakot.” Kaya naglaog si Sisera sa tolda asin tinahoban siya ni Jael nin sarong tamong.

¹⁹Sinabihan ni Sisera si Jael, “Painoma man ako; paha akong marahay.” Binukasan ni Jael an sarong anit na laogan nin gatas asin pinainom si Sisera, dangan tinahoban giraray nin tamong.

²⁰Nagsabi si Sisera, “Magtindog ka sa may pintoan kan tolda asin kun may magdigdi dangan maghapot saimo kun igwang ibang tawo digdi, sabihan mong dai.”

²¹Huli sa kapagalan, nangatorog si Sisera. Kuminua si Jael nin martilyo asin sarong taldok kan tolda dangan luway-luway na dinolok an natotorog na si Sisera; ginadan niya ini sa paagi kan pagpalpal kan taldok sa sentido kaini sagkod na tuminadok sa daga an taldok.

²²Kaya kan mag-abot si Barak na naghahanap ki Sisera, sinabat siya ni Jael asin sinabihan, “Madya asin itutukdo ko saimo an tawong hinahanap mo.” Kaya luminaog siya sa tolda kaiba si Jael asin yaon duman si Sisera sa daga, gadan na huli kan taldok na luminagbas sa saiyang payo.

²³Kan aldaw na idto, itinao nin Dios an kapangganahan sa mga Israelita laban ki Jabin na hade kan mga Cananeo.

²⁴Poon kaidto, dai na ninda inontokan an paglaban ki Hadeng Jabin sagkod na nagadan ninda.