Read Central Bicolano Judges 5 Bible Online

Judges 5 - Central Bicolano bible

Judges 5

¹Kan aldaw na iyan, inawit ni Debora asin ni Barak, na aking lalaki ni Abinoam, an awit na ini:

²Pag-omawon an Kagurangnan! Desidido an mga Israelita sa pakilaban; nag-iba sinda na may kaogmahan.

³Pagdangog kamo, mga hade! Paghinanyog kamo, mga namamayo! Makanta ako, asin magibo nin musika para sa Kagurangnan, an Dios nin Israel.

⁴O Kagurangnan, kan bayaan mo an kabukidan nin Seir, kan magluwas ka hale sa rehiyon nin Edom, tinakigan an daga, nagbulos an uran hale sa kalangitan. Iyo, nagbulos an tubig hale sa mga dampog.

⁵Sa atubang nin Kagurangnan nagtakig an mga bukid, an Sinai, sa atubang nin Kagurangnan Dios nin Israel.

⁶Sa mga aldaw ni Samgar, aking lalaki ni Anat, asin sa mga aldaw ni Jael, nag-ontok sa pag-agi sa daga an mga parabaklay, asin duman na sa mga dana sinda nagralakaw.

⁷Binayaan kan mga tawo an mga banwa nin Israel; nagharale sinda sagkod na umabot ka, O Debora, nagdatong na arog sa sarong ina para sa Israel.

⁸Nagkaigwa nin gera sa daga, kan magpili nin bagong mga dios-dios an Israel. Sa kwarenta mil na lalaki kan Israel, may saro daw na nagdara nin garod o kalasag?

⁹Nasa mga pamayo nin Israel an puso ko, asin nasa mga tawong nag-iriba na may kaogmahan. Pag-omawon an Kagurangnan!

¹⁰Ibareta nindo, kamong nakalunad sa mga puting asno, kamong nagtutukaw sa mga kamadero, asin kamo na naglalakaw sa mga tinampo.

¹¹Dangoga! An ribok kan nagtitiripon sa palibot kan mga bubon, nag-oosip kan kapangganahan nin Kagurangnan, kapangganahan kan banwaan nin Israel! Dangan nagmartsa pasiring sa saindang mga trangkahan an banwaan nin Kagurangnan.

¹²Mangenot ka, O Debora, mangenot ka! Mangenot ka sa pagkanta! Mangenot ka, O Barak, aking lalaki ni Abinoam, daraha an saimong mga bihag!

¹³Dangan nagrulugsot an mga natadang maimbod; nagdolok an banwaan nin Kagurangnan sa saiya, andam sa pakilaban.

¹⁴Hale ki Efraim, nagpasiring sinda sa kapantayan, nagsunod sa tribu ni Benjamin asin sa saiyang banwaan. Nagrulugsot an mga namamayo hale ki Machir, asin hale ki Zabulon an mga opisyal.

¹⁵Nagdatong an mga namamayo ni Issakar kaiba si Debora; nagdatong si Issakar asin si Barak, gabos sinda nagsunod ki Barak sa kapantayan. Alagad an tribu ni Ruben nababanga, dai maaraman kun maiba o dai.

¹⁶Tano ta nagpawalat sinda kaiba kan mga karnero? Tanganing magdangog sa mga pastor na nag-aapod kan mga hayop? Totoong nabanga an tribu ni Ruben, dai maaraman kun maiba o dai.

¹⁷An tribu ni Gad nag-erok sa sirangan kan Jordan; sa saindang mga barko nagpawalat an tribu ni Dan. Sa baybayon nag-ontok an tribu ni Asher; dai na naghiro sa saindang namumugtakan.

¹⁸Alagad itinaya kan mga banwaan ni Zabulon asin ni Neftali an saindang buhay sa pakilaban.

¹⁹Sa Taanac, sa may sapa nin Megido, nagdatong an mga hade asin nakilaban; nakilaban man an mga hade nin Canaan, alagad mayo sindang plata na nasamsam.

²⁰An mga bitoon sa langit nakilaban, mantang naglilibot sa kaitaasan; si Sisera saindang linabanan.

²¹Inanod sinda kan baha sa Kison— an nag-aanggot na katubigan nin Kison. Magmamartsa akong padagos, sa bilog kong kosog!

²²Dangan nag-abot an mga kabayong nagdadalagan; an umpag kan saindang mga bitis minatanyog kan kadagaan.

²³“Maldisyonon an Meroz,” an olay kan anghel nin Kagurangnan, “maldisyonon an gabos na nag-eerok duman. Dai sinda nag-abot sa pagtabang sa Kagurangnan, sa pagtabang sa Kagurangnan laban sa mapangyari.”

²⁴An pinakapaladan na babae iyo si Jael, an agom ni Heber na Cineo— an pinakapaladan sa mga babaeng nag-eerok sa mga tolda.

²⁵Tubig an hinagad saiya ni Sisera, alagad gatas an itinao niya; sa magayon na mangko, dinara niya saiya.

²⁶Kinua kan wala niyang kamot an sarong taldok kan tolda, asin an martilyo kan trabahador kan toong kamot niya; pinukpok niya si Sisera, pinasa an payo; ipinalpal sa sentido an taldok na luminagbas sa payo.

²⁷Napaluhod si Sisera, natumba asin dai na naghiro sa pamitisan ni Jael; sa pamitisan ni Jael napaluhod si Sisera, natumba asin nagadan.

²⁸An ina ni Sisera sa bintana nagdungaw; sa likod kan mga siklat siya nagtanaw. “Tano ta dai pa minaabot an saiyang karwahe?” an hapot niya. “Tano ta dai pa minapuli an saiyang kabayo?”

²⁹Mga madonong niyang babae sa saiya nagsimbag, asin ulit-ulit siyang nagsaboot,

³⁰“Naghahanap pa sinda nin mabibihag asin mababanga— saro o duwang babae para sa lambang soldados, mamahalon na tela para ki Sisera, mga ginansilyong gubing para sa sakong liog.”

³¹Magkagaradan logod, sa siring na paagi an gabos mong kaiwal, O Kagurangnan, alagad magliwanag logod an saimong mga katood siring sa minasirang na aldaw! Dangan nagkaigwa nin katoninongan sa daga sa laog nin kwarentang taon.