Read Central Bicolano Judges 7 Bible Online

Judges 7 - Central Bicolano bible

Judges 7

¹Sarong aldaw, amay na nagbangon si Gideon asin an saiyang mga tawohan dangan nagkampo sa may burabod nin Harod. An kampo kan mga Midianita idtoon sa kapantayan na nasa parteng amihan ninda, sa may bulod nin More.

²Nagtaram an Kagurangnan ki Gideon, “Dakul nin marahay para sako an saimong mga tawohan tanganing tawan ko sinda nin kapangganahan laban sa mga Midianita. Tibaad isipon nindang nanggana sinda huli sa sainda man sana, asin bakong huli sa tabang ko.

³Kaya ipahayag mo sainda, ‘Magpuli na an siisay man na natatakot asin mapawalat kami digdi sa Bukid nin Gilead.’” Kan sabihon ini ni Gideon sa mga tawo, beynte dos mil an nagpuruli alagad dyes mil an nagpawalat.

⁴Dangan nagtaram an Kagurangnan ki Gideon, “Dakul pa giraray an mga tawohan mo; daraha sinda sa salog asin ako an malaen sainda para saimo. Kun sabihon ko saimo na maiba an sarong tawo, maiba siya; alagad kun sabihon ko saimo na dai maiba an sarong tawo, dai siya maiba.”

⁵Ipinag-iba ni Gideon an mga tawo duman sa salog asin tinaraman siya nin Kagurangnan, “Laenon mo an mga minainom kan tubig siring kan pag-inom nin sarong ayam; laenon mo sinda sa mga minaluhod tanganing mag-inom.”

⁶An bilang kan mga nagsaldok nin tubig asin nag-inom sa saindang kamot uminabot sa tres syentos; an gabos na natada, nagruluhod ngona dangan nag-inom.

⁷Nagtaram an Kagurangnan ki Gideon, “Ililigtas ko kamo asin itatao ko saimo an kapangganahan laban sa mga Midianita sa tabang kan tres syentos na kalalakihan na nagsaldok kan tubig dangan nag-inom sa saindang kamot; papulion mo na an iba.”

⁸Kaya pinapuli ni Gideon an gabos na Israelita alagad itinada niya an tres syentos na nagsaldok kan tubig asin nag-inom sa saindang kamot. Ipinawalat man niya an gabos na kagamitan asin an mga trompeta. An kampo kan mga Midianita yaon sa kapantayan, sa ibaba kan namumugtakan ninda.

⁹Kan bangging idto, pinagbotan nin Kagurangnan si Gideon, “Bumangon ka asin salakayon mo an kampo kan mga Midianita; itinatao ko saimo an kapangganahan.

¹⁰Alagad kun natatakot kang sumalakay, magduman ka sa kampo kan mga kaiwal kaiba an saimong sorogoon na si Pura.

¹¹Madadangog mo kun ano an saindang pinag-oorolayan dangan magkakaigwa ka nin isog tanganing salakayon sinda.” Kaya naglugsot si Gideon asin si Pura pasiring sa kampo kan mga kaiwal.

¹²An mga Midianita, mga Amalekita asin an mga tribung nag-eerok sa desyerto wararak sa kapantayan arog sa kadakul na doron; dai mabilang an saindang mga kamelyo, na siring kadakul kan mga baybay sa tampi kan dagat.

¹³Pag-abot ni Gideon duman, nadangog niya an sarong lalaking nakikipag-olay sa sarong katood. Ini an sabi kan lalaki: “Nangatorogan ako na luminigid sa satong kampo an sarong tinapay na sebada, asin tinamaan an sarong tolda. Nalaglag an tolda asin nalatag sa daga.”

¹⁴Nagsimbag an saiyang katood, “Iyo idto an espada kan Israelitang si Gideon, na aking lalaki ni Joas! Mayo na nin iba pang kahulogan an pangatorogan mo! Itinao na saiya nin Dios an kapangganahan laban sa mga Midianita asin sa bilog tang hukbo!”

¹⁵Kan madangog ni Gideon an dapit sa pangatorogan kan lalaki asin an kahulogan kaiyan, nagluhod siya asin nagsamba sa Kagurangnan. Dangan nagbalik siya sa kampo kan mga Israelita asin nagsabi, “Bumangon kamo! Itinatao na nin Kagurangnan sa saindong mga kamot an kapangganahan laban sa hukbo kan mga Midianita!”

¹⁶Binaranga niya an tres syentos niyang tawohan sa tolong grupo asin an lambang saro sainda tinawan niya nin tig-sararong trompeta saka dulay na igwa nin karaba sa laog.

¹⁷Dangan nagsabi siya sainda, “Sa oras na makarani ako sa kampo ninda, hilingon nindo kun ano an gigibohon ko asin arogon man nindo.

¹⁸Kun patanogon na kan sakong grupo an samong mga trompeta, patanogon man nindo an saindong mga trompeta sa palibot kan kampo kan kaiwal dangan magkurahaw kamo nin, ‘Para sa Kagurangnan asin para ki Gideon!’”

¹⁹Nakarani sa kampo kan mga kaiwal si Gideon asin an sanggatos niyang tawohan kan madali nang magmatanga an banggi, asin kan bago pa sanang ribayan an bantay. Pinatanog ninda an saindang mga trompeta dangan pinarasa an mga dulay na dara ninda.

²⁰Inarog sinda kan duwa pang grupo. Kapot ninda gabos sa saindang mga walang kamot an mga karaba, asin sa too an saindang mga trompeta. Nagkurahaw sinda gabos, “Sarong espada para sa Kagurangnan asin para ki Gideon!”

²¹Dai sinda nagharale sa saindang natitindogan sa palibot kan kampo, asin an bilog na hukbo kan saindang kaiwal nagdaralagan na nagkukurahaw.

²²Mantang nagtatanog an mga trompeta kan mga tawohan ni Gideon, ginibo nin Kagurangnan na magralaban sinda-sinda man sana an mga kaiwal. Dangan, nagdurulag sinda pasiring sa Zaretan sagkod sa Bet-Citta asin sa harayong banwaan kan Abel-mehola na harani sa Tabbat.

²³Dangan ipinaapod ni Gideon an mga tribu ni Neftali, Asher, asin ni Manases tanganing lamagon an nagdudulag na mga Midianita.

²⁴Nagpadara nin mga sugo si Gideon sa gabos na lugar kan mabulod na daga nin Efraim asin nagpasabi, “Magrulugsot kamo dangan makilaban sa mga Midianita. Hare nindo pagpabalyoha an mga kaiwal sa Salog nin Jordan sagkod sa mga sapa nin Bet-bara.” Kaya tiniripon an kalalakihan nin Efraim, asin binantayan ninda an Salog nin Jordan saka an mga sapa sagkod sa Bet-bara.

²⁵Nadakop ninda an duwang prinsipe kan Midian na si Oreb asin Zeeb. Ginadan ninda si Oreb sa Gapo nin Oreb asin si Zeeb sa pugaan nin ubas ni Zeeb. Padagos nindang linamag an mga Midianita asin dinara ninda an mga payo ni Oreb saka ni Zeeb ki Gideon sa ibong kan Jordan.