Read Central Bicolano Judges 8 Bible Online

Judges 8 - Central Bicolano bible

Judges 8

¹Nagreklamo ki Gideon an kalalakihan nin Efraim, “Tano ta dai mo kami inapod kan labanan mo an mga Midianita? Tano ta arog kaini an ginibo mo samo?”

²Sinimbag niya sinda, “Dai ko ikakabaing sa saindong ginibo an sakong ginibo. An dikit na ginibo nindong mga kalalakihan nin Efraim orog pang mahalaga ki sa ginibo kan bilog kong kamaganakan.

³Itinao nin Dios sa saindong kamot an duwang prinsipe kan Midian na si Oreb asin si Zeeb. Ano man an naginibo ko na pwedeng iarog kaiyan?” Kan sabihon niya ini, dai na sinda naanggot ki Gideon.

⁴Kan panahon na idto, nakabalyo na sa Salog nin Jordan si Gideon asin an tolong gatos niyang mga tawohan. Nanluluya na sinda alagad padagos sa paglamag kan kaiwal.

⁵Pag-abot ninda sa Sukkot, sinabihan ni Gideon an kalalakihan sa banwa na idto, “Tawe man nindo nin pagkakan an sakong mga tawohan huli ta nanluluya na sinda, asin pinaglalamag ko an duwang hade kan Midian na si Zeba saka si Zalmunna.”

⁶Alagad nagsimbag sainda an mga namamayo kan Sukkot, “Tano ta pagtawan mi nin pagkakan an saimong hukbo? Dai pa ngani nindo nadadakop si Zeba saka si Zalmunna.”

⁷Kaya nagsimbag sainda si Gideon, “Bahala kamo. Alagad kun itao na sako nin Kagurangnan si Zeba asin si Zalmunna, papakolon ko kamo nin sangang matonok na hale sa kalangtadan.”

⁸Nagpadagos sa paglakaw si Gideon sagkod na makaabot siya sa Penuel, asin naghagad man siya digdi nin pagkakan para sa saiyang mga tawohan; alagad an nagin simbag kan kalalakihan duman, arog man kan simbag sainda kan mga taga Sukkot.

⁹Kaya sinabihan sinda ni Gideon, “Mabalik ako digdi, asin sa pagbalik ko, gagabaon ko an toreng ini.”

¹⁰Nasa Karkor na kaidto si Zeba asin si Zalmunna kaiba an saindang hukbo. Sa bilog na hukbo kan mga nag-eerok sa desyerto, igwa na sanang natatadang kinse mil na mga lalaki; syento beynte mil na an nagadan sa sainda.

¹¹Nag-agi si Gideon sa dalan na nasa gilid kan kalangtadan, sa sirangan kan Noba asin Jogbeha, kaya nabigla an hukbo kan kaiwal kan salakayon niya sinda.

¹²Nakadulag an duwang hade kan Midian alagad linamag sinda ni Gideon sagkod na madakop. Huli ki Gideon, nataranta an bilog nindang hukbo.

¹³Pagbalik ni Gideon hale sa pakilaban, duman siya nag-agi sa Dalan nin Heres

¹⁴asin nakadakop siya nin sarong hoben na lalaki na hale sa Sukkot. Sa paghapot niya, isinurat kan hoben na lalaki an mga ngaran kan setenta y syeteng lider nin Sukkot.

¹⁵Dangan nagduman si Gideon sa kalalakihan kan Sukkot asin nagsabi, “Nagigiromdoman nindo an pagsayuma nindo na tabangan kami? Nagsabi kamo na dai nindo tatawan nin pagkakan an sakong nanluluya na hukbo huli ta dai ko pa nadadakop si Zeba asin si Zalmunna. Ngunyan, uya sinda!”

¹⁶Dangan kuminua siya sa kalangtadan nin sangang matonok, asin iyo idto an ginamit niya sa pagpakol kan mga lider nin Sukkot.

¹⁷Ginaba man niya an tore sa Penuel asin ginadan an kalalakihan sa syudad na idto.

¹⁸Dangan hinapot ni Gideon si Zeba asin si Zalmunna, “Ano an masasabi nindo sa mga lalaking ginadan nindo sa Tabor?” Nagsimbag sinda, “Kalalawogon mo sinda—an lambang saro garong aki nin sarong hade.”

¹⁹Nagsabi si Gideon, “Mga tugang ko sinda; aki kan sakong ina. Isinusumpa ko sa ngaran nin Kagurangnan, na kun dai nindo sinda ginaradan, dai ko man kamo gagadanon.”

²⁰Dangan sinabihan niya an matua niyang aking lalaking si Jeter, “Gadana sinda.” Alagad natakot si Jeter na hugkoton an saiyang espada huli ta hoben pa siyang marahay.

²¹Dangan nagsabi ki Gideon si Zeba asin si Zalmunna, “Kaipuhan na sarong lalaki an gumibo kan trabaho nin sarong lalaki. Ika an dapat na gumadan samo.” Kaya ginadan sinda ni Gideon asin kinua niya an mga samno na nakabitay sa liog kan saindang mga kamelyo.

²²Pakatapos kaini, nagsabi ki Gideon an mga Israelita, “Ika na an magsakop samo—ika, sagkod an kapagarakian mo, huli ta ilinigtas mo kami sa mga Midianita.”

²³Nagsimbag sainda si Gideon, “Bakong ako o an sakong kapagarakian an magsasakop saindo; an Kagurangnan iyo an maghahade saindo.

²⁴Alagad sarong bagay an hahagadon ko: tawan nindo sako an mga hikaw na saindong sinamsam.” (Arog kan ibang mga tawo na nag-eerok sa kalangtadan, an mga Midianita, nagagamit man nin bulawan na hikaw.)

²⁵Nagsimbag an mga tawo, “Maogmang itatao mi iyan saimo.” Nagbiklad sinda nin tamong asin ibinugtak duman kan lambang saro an mga hikaw na sinamsam niya.

²⁶Kan timbangon an mga bulawan na hikaw na itinao ki Gideon, uminabot ini sa beynte kilos asin dai pa kaiba digdi an iba pang mga alahas, an mga purpurang tela na sulot kan mga hade kan Midian, sagkod an mga samno sa liog kan saindang mga kamelyo.

²⁷Guminibo si Gideon nin sarong bulawan na estatwa asin ibinugtak niya idto sa sadiri niyang banwa, sa Ofra. Tinalikodan an Dios kan mga Israelita asin sinamba ninda an estatwa. Iyo ini an nagin siod para ki Gideon asin kan saiyang pamilya.

²⁸Kaya nadaog kan mga Israelita an Midian asin dai na ini pinagtakotan. Nagkaigwa nin katoninongan sa daga sa laog nin kwarentang taon sagkod na magadan si Gideon.

²⁹Nagpuli si Gideon sa sadiri niyang harong asin duman nag-erok.

³⁰Nagkaigwa siya nin setentang aking lalaki huli ta dakul an saiyang nagin agom.

³¹Duman sa Shekem, nagkaigwa man siya nin kasaroan. Nagkaigwa siya digdi nin sarong aking lalaki na nginaranan niyang Abimelec.

³²Nagadan sa pagkagurang si Gideon na aking lalaki ni Joas, asin ilinubong siya sa pantyon kan saiyang ama duman sa Ofra na banwa kan kamaganakan ni Abiezer.

³³Pakagadan ni Gideon, an banwaan nin Israel nagtalikod giraray sa Dios asin nagsamba sa mga Baal. Ginibo nindang dios si Baal-berit,

³⁴asin dai na ninda pinaglingkodan an Kagurangnan na saindang Dios, na nagligtas sainda sa saindang mga kaiwal sa palibot ninda.

³⁵Dai na ninda nagiromdoman an gabos na karahayan na ginibo ni Gideon asin kan saiyang pamilya para sa Israel.