Read Central Bicolano 3 John 1 Bible Online

3 John 1 - Central Bicolano bible

3 John 1

¹Surat hale sa Magurang— Para ki Gayo na tunay kong namomotan.

²Namomotan kong tugang, ipinapamibi ko na mapakarahay ka sa gabos na bagay saka magkaigwa ka nin marahay na hawak siring na aram kong marahay man an saimong kalag.

³Dakula an kaogmahan ko kan umabot an ibang tugang dangan baretaan ako dapit kan saimong kaimbodan, na ika talagang namumuhay sosog sa katotoohan.

⁴Mayo nin orog na nakakapaogma sako ki kan nadadangog ko na an sakong mga aki namumuhay sa katotoohan.

⁵Namomotan kong Gayo, maimbod ka nanggad sa paglilingkod sa kapwa paratubod maski sinda mga dayuhan.

⁶Ibinareta ninda sa simbahan digdi an saimong pagkamoot. Sa paaging mawiwilihan nin Dios, tabangan mo sinda na makapadagos sa saindang pagbyahe.

⁷Huli ta nagbiyahe sinda dahel ki Cristo asin dai sinda nag-ako nin anoman na tabang hale sa mga pagano.

⁸Kaya dapat tabangan ta an mga siring na tawo tanganing may kabtang kita sa saindang pagtrabaho para sa katotoohan.

⁹Nagsurat ako sa simbahan, alagad si Diotrefes, na boot midbidon na lider ninda, habong magmidbid kan sakong awtoridad.

¹⁰Kaya pagdiyan ko, ihahayag ko an gabos na ginigibo niya, an mga pagpakaraot niya sakuya. Bako sana iyan; dai pa niya inaako an mga tugang na minadiyan, asin inoolang pa niya an mga boot mag-ako sainda dangan isinisikwal sinda sa simbahan.

¹¹Namomotan kong Gayo, dai mo pag-arogon an maraot, kundi arogon mo an marahay. An siisay man na naggigibo nin marahay sadiri nin Dios; an siisay man na naggigibo nin maraot dai nakahiling sa Dios.

¹²Inoomaw si Demetrio kan gabos; an mismong katotoohan nagtataram nin marahay dapit saiya. Saksi man niya kami, asin aram mo na totoo an sinasabi nyamo.

¹³Dakul pa kutana an sasabihon ko saimo, alagad habo kong ipaagi iyan sa surat.

¹⁴Nagmamawot akong mahiling taka tolos, dangan mag-oolay kitang duwa.

¹⁵Mapasaimo logod an katoninongan. Nangongomusta saimo an gabos mong katood. Komusta man sa gabos nyatong mga katood.