Read Central Bicolano 1 Samuel 1 Bible Online

1 Samuel 1 - Central Bicolano bible

1 Samuel 1

¹Igwa kaidto nin sarong lalaki na gikan sa tribu ni Efraim, na an ngaran Elkana, na nag-erok sa banwa nin Rama sa mabulod na daga nin Efraim. Si Elkana aking lalaki ni Jeroham na aking lalaki ni Elihu, na aking lalaki ni Tohu, na aking lalaki ni Suf, na sarong Efraimita.

²Duwa an saiyang agom: si Hanna asin si Peninna. Igwa nin mga aki si Peninna, alagad si Hanna mayo.

³Taon-taon, nagduduman si Elkana sa Shilo hale sa Rama, tanganing magsamba asin magdolot nin mga atang sa Kagurangnan nin mga hukbo. Si Hofni asin si Finehas na mga aking lalaki ni Eli, iyo an naglilingkod duman bilang mga padi nin Kagurangnan.

⁴Sa lambang pag-atang ni Elkana, tinatawan niya nin dakul na kahirasan na karne si Peninna sagkod an mga aki niya.

⁵Maski namomotan niya nin marahay si Hanna, tinatawan niya si Hanna nin saro sanang kahirasan huli ta dai siya tinawan nin aki nin Kagurangnan.

⁶Danay na tinutuyatuya si Hanna kan saiyang karibal na si Peninna huli ta dai siya tinawan nin aki nin Kagurangnan.

⁷Siring kaini an nangyayari taon-taon; kun minaduman sinda sa harong nin Kagurangnan, tinutuyatuya ni Peninna si Hanna, kaya minahibi si Hanna asin dai minakakan.

⁸Hinahapot siya ni Elkana na saiyang agom, “Hanna, tadaw ta naghihibi ka? Tano ta habo kang magkakan? Tadaw ta mamondo ka? Bakong mas mahalaga ako saimo ki sa sampolong aking lalaki?”

⁹Kan sarong pagdalaw ninda sa Shilo, pakatapos nindang magkakan asin mag-inom sa harong nin Kagurangnan, mamondong nagtindog si Hanna asin mapait na nagtangis mantang namimibi sa Kagurangnan. Kan oras na idto, nagtutukaw an pading si Eli sa saiyang lugar sa may pintoan kan templo nin Kagurangnan.

¹¹Nagsumpa si Hanna, “O Kagurangnan nin mga hukbo, hilinga an pagtios ko an saimong sorogoon, asin giromdoma ako! Hare ako paglingawe! Kun tawan mo ako nin aking lalaki, nanunuga ako na lalaenon ko siya para saimo sa bilog niyang pagkabuhay asin dai nanggad puputolon an saiyang buhok.”

¹²Mantang namimibi si Hanna sa Kagurangnan, pinagmamasdan ni Eli an saiyang ngoso.

¹³Hilom siyang namimibi alagad naghihiro an saiyang ngoso. Kaya naghona si Eli na siya burat.

¹⁴Sinabihan niya si Hanna, “Sagkod nuarin ka magigin burat? Mag-ontok ka na sa pag-inom asin magpaomay ka!”

¹⁵Alagad nagsimbag si Hanna, “Bako man akong burat. Mamondo sana ako nin marahay asin ipinapahayag ko an sakong problema sa Kagurangnan.

¹⁶Dai ka mag-isip na ako sarong babaeng bako maninigong igalang. Namimibi akong arog kaini huli kan sakong kahaditan asin kasakitan.”

¹⁷Nagsabi si Eli, “Lakaw sa katoninongan asin itao logod saimo kan Dios nin Israel an hinahagad mo saiya.”

¹⁸“Danay mo logod akong kawilihan,” an simbag ni Hanna. Dangan naghale na siya asin nagkakan; bako na siyang mamondo.

¹⁹Sunod na aldaw, nagbangon na amay si Elkana asin an saiyang pamilya dangan nagsamba sa Kagurangnan. Pakatapos, nagpuli sinda sa Rama. Dinorogan ni Elkana an saiyang agom na si Hanna asin sinimbag nin Kagurangnan an saiyang pamibi.

²⁰Nagbados si Hanna asin nangaki nin lalaki. Nginaranan niya ining Samuel, huli ta olay niya, “Hinagad ko siya sa Kagurangnan.”

²¹Nag-abot giraray an panahon na kaipuhan magduman sa Shilo si Elkana saka an saiyang pamilya tanganing magdolot sa Kagurangnan kan taon-taon na atang asin mag-otob kan saiyang panuga.

²²Alagad dai nag-iba si Hanna. Sinabihan niya an saiyang agom, “Sa oras na mabutas an aki, dadarahon ko siya sa harong nin Kagurangnan asin duman na siya mag-eerok sa bilog niyang pagkabuhay.”

²³Nagsimbag si Elkana, “Giboha an pinaghohona mong marahay; digdi ka ngona sa harong sagkod na mabutas an aki. Itugot logod nin Kagurangnan na magkatotoo an saimong panuga.” Kaya nawalat sa harong si Hanna asin inataman an saiyang aki.

²⁴Kan mabutas na an aki, dinara siya ni Hanna sa Shilo. Nagdara man siya nin sarong lalaking baka na tolong taon an edad, sampolong kilong arina asin sarong lalagan na anit na pano nin arak. Si Samuel, na aki pang marahay, dinara niya sa harong nin Kagurangnan sa Shilo.

²⁵Pakabuno ninda kan baka, dinara ninda an aki ki Eli.

²⁶Sinabihan ni Hanna si Eli, “Kun saimong nagigiromdoman, ako idtong babae na nahiling mong nagtitindog digdi na namimibi sa Kagurangnan.

²⁷Namibi ako na tawan ako nin aki asin itinao niya an sakong hinagad.

²⁸Kaya idinodolot ko siya sa Kagurangnan; mantang buhay siya, sadiri siya nin Kagurangnan.” Dangan nagsamba sinda duman sa Kagurangnan.