Read Central Bicolano 1 Samuel 10 Bible Online

1 Samuel 10 - Central Bicolano bible

1 Samuel 10

¹Dangan kinua ni Samuel an laogan kan lana nin oliba asin inulaan sa payo si Saul. Hinadokan ni Samuel si Saul dangan sinabihan, “An Kagurangnan an naglahid saimo bilang hade kan saiyang banwaan na Israel. Paghahadean mo an saiyang banwaan asin ililigtas sa saindang mga kaiwal. Ini an magigin tanda para saimo na an Kagurangnan an nagpili saimo na magin hade kan saiyang banwaan:

²Paghale mo digdi ngunyan, masasabat mo an duwang lalaki sa may lulubngan ni Rachel sa Zelza sa daga ni Benjamin. Sasabihan ka ninda na nakua na an mga asno na saimong hinahanap; nahahadit an saimong ama bako nang para sainda kundi para saimo, asin padagos na naghahapot, ‘Ano an gigibohon ko manongod sa sakong aki?’

³Dangan magpadagos ka sagkod na makaabot sa sagradong kahoy sa Tabor, saen masasabat mo an tolong lalaking nagtutukad pasiring sa Betel tanganing magdolot nin atang sa Dios. An saro sainda may darang tolong ogbon na kanding, an ikaduwa, may darang tolong tinapay, asin an ikatolo, may darang laogan na anit na pano nin arak.

⁴Mataong galang sinda saimo asin maalok nin duwang pedasong tinapay, na saimong aakoon.

⁵Dangan magduman ka sa Bulod nin Dios sa Gibea, sa pinagkakampohan kan mga Filisteo. Sa paglaog mo sa banwa, masasabat mo an sarong grupo nin mga propeta na naglulugsot hale sa altar na nasa bulod, na nagtutugtog nin arpa, tamborin, plawta, saka lira asin nagpopropesiya.

⁶Dangan madatong saimo an espiritu nin Kagurangnan, asin masabay ka sainda sa pagpropesiya patin mababago an saimong pagkatawo.

⁷Kun mangyari an mga tandang ini, gibohon mo an ano man na ipinapasabong saimo nin Dios.

⁸Maeenot ka sako sa Gilgal, saen tatagboon taka tanganing magdolot nin mga tinutong na atang asin atang para sa katoninongan. Halaton mo ako duman sa laog nin pitong aldaw sagkod na mag-abot ako, dangan sasabihan taka kan gigibohon mo.”

⁹Kan talikodan ni Saul si Samuel tanganing bayaan ini, binago nin Dios an saiyang puso. Nangyari saiya kan aldaw na idto an gabos na sinabi ni Samuel.

¹⁰Pag-abot ni Saul asin kan saiyang sorogoon sa Gibea, sinabat siya nin sarong grupo nin propeta. Dangan nagdatong saiya an espiritu nin Dios, asin nagsabay siya sainda sa pagpropesiya.

¹¹Kan mahiling siya kan mga nakakamidbid saiya, naghinarapotan sinda, “Ano an nangyayari sa aki ni Kis? Ano siya, propeta na man?”

¹²Naghapot an sarong nag-eerok duman, “Sa paghona nindo, siisay an mga ama kaining ibang mga propeta?” Kaya ini an ginikanan kan kasabihan, “Ano si Saul, propeta na man?”

¹³Pakapropesiya ni Saul, nagduman siya sa altar na nasa bulod.

¹⁴Si Saul asin an saiyang sorogoon nahiling kan tiyo ni Saul asin naghapot, “Saen kamo hale?” “Naghahanap kan mga asno,” an simbag ni Saul. “Kan dai mi nakua, nagduman kami ki Samuel.”

¹⁵“Ano an sinabi niya saindo?” an hapot kan tiyo ni Saul.

¹⁶“Sinabihan niya kaming nakua na an mga hayop,” an simbag ni Saul. Alagad dai siya nagsambit kan sinabi ni Samuel dapit sa saiyang pagigin hade.

¹⁷Pinatiripon ni Samuel sa Mizpa an gabos na tawo

¹⁸asin sinabihan, “Nagtaram an Kagurangnan, an Dios nin Israel, ‘Ilinuwas ko kamo sa Egipto asin ilinigtas sa mga Egipcio saka sa ibang mga banwaan na nagpasakit saindo.

¹⁹Ako an saindong Dios, an nagtabang saindo sa gabos nindong problema asin kasakitan; alagad ngunyan, hinaboan nindo ako asin nakimaherak sako na tawan kamo nin hade. Kaya magtiripon kamo gabos sosog sa saindong tribu asin kamaganakan, sa atubangan nin Kagurangnan.’”

²⁰Dangan pinadolok ni Samuel an lambang tribu, asin napili an tribu ni Benjamin.

²¹Sunod na pinadolok ni Samuel an gabos na pamilya sa tribu ni Benjamin, asin napili an pamilya ni Matri. Dangan pinadolok an mga lalaki sa pamilya ni Matri asin napili si Saul na aki ni Kis. Hinanap ninda si Saul, alagad dai ninda nakua.

²²Kaya naghapot sinda sa Kagurangnan, “Igwa pa daw nin iba?” Nagsimbag an Kagurangnan, “Yaon duman si Saul, nagtatago sa likod kan mga kagamitan.”

²³Kaya nagdaralagan sinda asin ilinuwas si Saul sa pinagtatagoan niya tanganing mag-atubang sa mga tawo; nahiling ninda na mas halangkaw si Saul ki sa kiisay man sainda.

²⁴Sinabihan ni Samuel an mga tawo, “Uya an lalaking pinili nin Kagurangnan! Mayo nin siisay man sato na makakaarog saiya.” Dangan nagkurahaw an gabos na tawo, “Mabuhay an hade!”

²⁵Ipinaliwanag ni Samuel sa mga tawo an mga deretso asin an mga katongdan nin sarong hade, dangan isinurat niya ini sa sarong libro na saiyang sinaray sa sarong banal na lugar. Pakatapos, pinapuli niya an gabos sa saindang harong.

²⁶Nagpuli man si Saul sa harong niya sa Gibea, asin inibahan siya nin nagkapirang maiisog na lalaki na an mga puso hiniro nin Dios.

²⁷Alagad igwa nin mayong halagang mga tawo na nagsarabi, “Paano kita ikakaligtas kan tawong ini?” Pinag-olog-olog ninda si Saul asin dai ninda dinarahan nin ano man na regalo, alagad dai sana naggirong si Saul.