Read Central Bicolano 1 Samuel 11 Bible Online

1 Samuel 11 - Central Bicolano bible

1 Samuel 11

¹Pakalihis nin haros sarong bulan, pinangenotan ni Hadeng Nahas kan Ammon an saiyang hukbo asin sinalakay an banwaan nin Jabes sa teritoryo nin Gilead. Sinabihan si Nahas kan mga taga Jabes, “Makipagtipan ka samo, asin paglilingkodan mi ika.”

²Nagsimbag si Nahas, “Makikipagtipan ako saindo sa sarong kondisyon: huhulwaton ko an saindong toong mata tanganing masopogan an bilog na Israel.”

³Nagsimbag an mga lider kan Jabes, “Tawe kami nin pitong aldaw tanganing magpadara nin mga sugo sa bilog na daga nin Israel. Kun mayong maligtas samo, masuko kami saimo.”

⁴Kan an mga sinugo makaabot sa Gibea, sa pinag-eerokan ni Saul, inosip ninda sa mga tawo an bagay na ini, kaya naghiribi an mga tawo.

⁵Minaabot pa sana si Saul hale sa oma kasunod kan saiyang mga baka, kaya naghapot siya, “Ano an nangyayari? Tadaw ta naghihiribi kamo gabos?” Inistorya ninda ki Saul an baretang dara kan mga lalaking hale sa Jabes.

⁶Kan madangog ini ni Saul, nag-abot saiya an espiritu nin Dios asin naanggot siya nin marahay.

⁷Kinua niya an duwang baka, pinedaso an mga ini, asin sa paagi nin mga sugo, ipinadara idto sa bilog na daga nin Israel kaiba an patanid na ini, “Pepedasohon man an baka kan siisay man na dai magsunod ki Saul asin ki Samuel sa pakigera!” Nagkatarakot an mga Israelita sa pwedeng gibohon nin Kagurangnan, kaya gabos sinda nag-iriba sa gera.

⁸Tiniripon sinda ni Saul sa Bezek: tres syentos mil na lalaki hale sa Israel asin treynta mil na lalaki hale sa Juda.

⁹Sinabihan ninda an mga sugo hale sa Jabes, “Sabihan nindo an saindong mga kahimanwa na sa aga bago mag-odto, ililigtas na sinda.” Pakadangog kan mga taga Jabes kan baretang ini, nagkaorogma sinda nin marahay

¹⁰kaya sinabihan ninda si Nahas, “Sa aga, masuko kami saimo; gibohon mo samo an pinaghohona mong marahay.”

¹¹Pagkaagang amay, pinagtolong grupo ni Saul an saiyang mga tawohan, asin kan nagliliwanag na, sinalakay ninda an kampo kan mga Ammonita. Kan odto na, dakul na an nagkagaradan sa mga kaiwal; nawarak an mga natada, mala ta mayo nin duwa katawo na nakadulag pasiring sa parehong lugar.

¹²Dangan nagsarabi ki Samuel an mga tawo, “Haen na an mga tawong nagsarabi na bakong si Saul an dapat ming magin hade? Itao mo sinda samo, asin gagadanon mi sinda!”

¹³Alagad nagsabi si Saul, “Mayo nin siisay man na gagadanon sa aldaw na ini, huli ta iyo ini an aldaw na ilinigtas nin Kagurangnan an Israel.”

¹⁴Dangan sinabihan ni Samuel an mga tawo, “Magduruman kita gabos sa Gilgal asin ipahayag ta giraray si Saul bilang satong hade.”

¹⁵Kaya nagduruman sinda gabos sa Gilgal, asin duman sa banal na lugar, saindang ipinahayag si Saul bilang hade. Nag-atang sinda duman nin dolot para sa katoninongan asin nag-orogma nin marahay si Saul saka an gabos na Israelita.