Read Central Bicolano 1 Samuel 12 Bible Online

1 Samuel 12 - Central Bicolano bible

1 Samuel 12

¹Dangan sinabihan ni Samuel an mga Israelita, “Ginibo ko na an hinagad nindo sako. Tinawan ko na kamo nin hade;

²siya na an mangengenot saindo. Gurang asin ubanon na ako; kaiba na nindo an sakong mga aking lalaki. Ako an saindong nagin lider poon kan hoben pa ako sagkod ngunyan.

³Uya ako ngunyan, sa atubang nin Kagurangnan asin kan hadeng pinili niya. Sabihan nindo ako kun nagkasala ako saindo. Igwa daw akong kinuahan nin baka o asno? Igwa daw akong dinaya o inapi? Nag-ako daw ako nin suhol sa kiisay man? Kun ginibo ko an arin man sa mga bagay na ini, ibabalik ko an halaga kan sakong kinua.”

⁴Nagsimbag an mga tawo, “Dai mo kami dinaya o inapi; mayo kang kinuang ano man sa kiisay man.”

⁵Nagsimbag si Samuel, “Saksi an Kagurangnan asin an hadeng pinili niya sa aldaw na ini, na mayo kamong nakuang sala sako.” “Iyo, an Kagurangnan an samong saksi,” an simbag ninda.

⁶Nagpadagos si Samuel, “An Kagurangnan an nagpili ki Moises saka ki Aaron; siya an nagluwas kan saindong mga ginikanan hale sa Egipto.

⁷Tindog kamo sa saindong namumugtakan, asin susudyaon ko kamo sa atubangan nin Kagurangnan huli sa pagpagiromdom saindo kan mapangyaring gibo nin Kagurangnan sa pagligtas saindo asin sa saindong mga ginikanan.

⁸Kan magduman sa Egipto si Jacob asin an saiyang pamilya dangan inapi sinda kan mga Egipcio, nag-agrangay sa Kagurangnan an saindong mga ginikanan tanganing tabangan sinda. Sinugo nin Kagurangnan si Moises saka si Aaron, na nagluwas sainda sa Egipto asin nagpaerok sainda sa dagang ini.

⁹Alagad nalingawan kan mga tawo an Kagurangnan na saindang Dios, kaya pinabayaan niyang labanan dangan sakopon sinda kan mga Filisteo asin kan hade nin Moab saka ni Sisera na pamayo kan hukbo kan syudad nin Hazor.

¹⁰Dangan nag-agrangay sinda sa Kagurangnan tanganing tabangan; olay ninda, ‘Nagkasala kami, Kagurangnan, huli ta nagtalikod kami saimo asin nagsamba sa mga ladawan ni Baal saka ni Astarte. Ligtasan kami sa samong mga kaiwal asin sasambahon mi ika.’

¹¹Ipinadara nin Kagurangnan si Gideon, si Barak, si Jefta, dangan ako. Ilinigtas mi kamo, asin namuhay kamo sa katoninongan.

¹²Alagad kan mahiling nindo na sasalakayon kamo ni Hadeng Nahas nin Ammon, hinaboan nindo an Kagurangnan bilang saindong hade dangan sinabihan nindo ako, ‘Boot ming magkaigwa nin sarong hade na masakop samo.’

¹³“Ngunyan uya an hade na saindong pinili; hinagad nindo siya asin itinao siya saindo nin Kagurangnan.

¹⁴Kun galangan nindo an Kagurangnan na saindong Dios, paglingkodan siya, dangogon asin kuyogon an saiyang mga pagboot; kun kamo saka an saindong hade magsunod sa Kagurangnan, mapapakarahay kamo.

¹⁵Alagad kun dai nindo hinanyogon an Kagurangnan, kundi lapason an saiyang mga togon, lalabanan niya kamo asin an saindong hade.

¹⁶Kaya tindog kamo nin husay, asin mahihiling nindo an dakulang bagay na gigibohon nin Kagurangnan.

¹⁷Bakong tig-init ngunyan? Alagad mamimibi ako, asin mapadara an Kagurangnan nin daguldol saka uran. Kun mangyari ini, saindong maaaraman na dakula an saindong pagkakasala tumang sa Kagurangnan kan hagadon nindo saiya an sarong hade.”

¹⁸Kaya namibi si Samuel, asin kan aldaw na idto nagpadara an Kagurangnan nin daguldol saka uran. Dangan nagkatarakot an mga tawo sa Kagurangnan saka ki Samuel.

¹⁹Nagsarabi sinda ki Samuel, “Pamibian man kami sa Kagurangnan na saimong Dios tanganing dai kami magkagaradan. Aram mi na ngunyan, na idinagdag mi pa sa gabos ming kasalan an karatan na ini, kan maghagad kami nin sarong hade.”

²⁰Nagsimbag si Samuel, “Dai kamo matakot; maski nakaginibo kamo kaining dakulang karatan dai sana kamo magtalikod sa Kagurangnan, kundi paglingkodan nindo siya sa bilog nindong puso.

²¹Dai kamo magsamba sa mga dios-dios na dai makakatabang o makakaligtas saindo, huli ta bako sinda an totoong Dios.

²²Nagsumpa an Kagurangnan na dai niya kamo papabayaan, huli ta pinagmarahay niya na kamo an saiyang magin banwaan.

²³Siring man dapit sako, irayo logod nin Kagurangnan na magkasala ako saiya huli sa pag-ontok sa pagpapamibi para saindo. Tutukdoan ko kamo kan marahay asin tamang paagi.

²⁴Matakot kamo sa Kagurangnan asin maimbod na paglingkodan nindo siya sa bilog nindong puso. Giromdoma nindo an darakulang mga bagay na ginibo niya para saindo.

²⁵Alagad kun magpadagos kamo sa paggibo nin kasalan, gagadanon niya kamo asin an saindong hade.”