Read Central Bicolano 1 Samuel 15 Bible Online

1 Samuel 15 - Central Bicolano bible

1 Samuel 15

¹Sinabihan ni Samuel si Saul, “Sinugo ako nin Kagurangnan tanganing lahidan ka bilang hade kan saiyang banwaan na Israel. Dangoga an itinataram nin Kagurangnan.

²Ini an itinataram nin Kagurangnan nin mga hukbo, ‘Papadusahan ko an mga Amalekita huli ta kinalaban kan saindang mga ginikanan an mga Israelita kan magharale sinda sa Egipto.

³Lakaw asin salakayon mo an mga Amalekita; raoton mo an gabos nindang pagsadiri. Dai ka magtada nin ano man; gadanon mo an gabos na kalalakihan, kababaehan, kaakian asin mga pasuso; an mga baka, karnero, kamelyo, saka asno.’”

⁴Kaya pinatiripon ni Saul an saiyang mga soldados asin binilang sinda sa Telem; dos syentos mil an hale sa Israel asin dyes mil an hale sa Juda.

⁵Dangan nagpasiring siya asin an saiyang mga tawohan sa syudad nin Amalek dangan naghipa duman sa sarong salog na nagmara na.

⁶Nagpatanid siya sa mga Cineo, “Maghale kamo; bayaan nindo an mga Amalekita, tanganing dai kamo makaiba sa paggadan ko sainda, huli ta nagin maboot kamo sa mga Israelita kan mag-abot sinda hale sa Egipto.” Kaya nagharale an mga Cineo.

⁷Nadaog ni Saul an mga Amalekita, na saiyang linabanan magpoon sa Havila sagkod sa Sur, sa sirangan nin Egipto.

⁸Nabihag niya si Hadeng Agag kan mga Amalekita asin ginaradan niya an gabos na tawo.

⁹Alagad dai ginadan ni Saul asin kan saiyang mga tawohan si Agag; dai man ninda ginaradan an pinakamarahay na mga karnero asin baka, an mga ogbon kan mga baka asin kan mga karnero, saka an gabos na mapapakinabangan; an ginadan sana ninda iyo idtong mga mayo nin pakinabang o halaga.

¹⁰Tinaraman nin Kagurangnan si Samuel,

¹¹“Nagbabasol ako ta ginibo kong hade si Saul; tinalikodan niya ako asin sinuhay an sakong mga pagboot.” Naanggot si Samuel; bilog na bangging nakimaherak siya sa Kagurangnan.

¹²Kan sunod na aldaw, amay na nagmata si Samuel sa pagsabat ki Saul. Nabaretaan niya na nagduman si Saul sa Carmelo, sa lugar na pinatindogan niya nin sadiring monumento, dangan nagdagos sa Gilgal.

¹³Dinuman ni Samuel si Saul na nagsabi saiya, “Bendisyonan ka logod nin Kagurangnan, Samuel! Kinuyog ko an kabotan nin Kagurangnan.”

¹⁴Naghapot si Samuel, “Kun siring, tano ta nakakadangog ako nin pag-ungal nin mga baka asin mga karnero?”

¹⁵Nagsimbag si Saul, “Kinurua an mga iyan sa mga Amalekita kan sakong mga tawohan. Linaen ninda an pinakamarahay kan mga karnero saka baka tanganing idolot bilang atang sa Kagurangnan na saimong Dios; an iba samong ginaradan.”

¹⁶“Mag-ontok ka,” an pagboot ni Samuel. “Sasabihan taka kan itinaram sako nin Kagurangnan kasubanggi.” “Sabihan sako,” an simbag ni Saul.

¹⁷Nagsabi si Samuel, “Maski hababa an paghiling mo sa saimo man sana, ika pa giraray an lider kan mga tribu nin Israel. Linahidan ka nin Kagurangnan bilang hade nin Israel;

¹⁸sinugo ka niya asin pinagbotan na gadanon an makasalan na mga Amalekita. Pinagbotan ka niyang makilaban sagkod na maubos sinda.

¹⁹Kun siring, tadaw ta dai mo siya kinuyog. Tadaw ta naghidali ka sa pagkua kan masasamsam asin naggibo nin karatan sa atubangan nin Kagurangnan?”

²⁰Nagsimbag si Saul, “Kinuyog ko an Kagurangnan. Nagduman ako sa pinapadumanan niya sako; binihag ko si Hadeng Agag, asin ginaradan an gabos na Amalekita.

²¹Alagad dai ginaradan kan sakong mga tawohan an pinakamarahay na mga karnero asin baka na saindang nagkadarakop tanganing idolot sa Kagurangnan na saimong Dios digdi sa Gilgal.”

²²Nagsabi si Samuel, “Orog daw na naoogma an Kagurangnan sa mga tinutong na atang asin mga dolot, ki sa pagkuyog kan saiyang pagboot? Tara, an pagkuyog mas marahay ki sa dolot, asin an paghinanyog mas marahay ki sa taba nin mga karnero.

²³Huli ta an pagrebelde arog sa kasalan nin panghuhula; an katagasan nin payo arog sa kasombikalan asin sa pagsamba sa ladawan. Huli ta sinayumahan mo an pagboot nin Kagurangnan, isinikwal ka man niya bilang hade.”

²⁴Nagsimbag si Saul, “Nagkasala ako; dai ko kinuyog an kabotan nin Kagurangnan asin an saimong katukdoan. Natakot ako sa mga tawo, kaya sinunod ko an saindang kamawotan.

²⁵Alagad nakikimaherak ako saimo, patawada an sakong kasalan asin ibahan mo ako tanganing makapagsamba ako sa Kagurangnan.”

²⁶“Dai ako maiba sa pagbalik mo,” an simbag ni Samuel. “Isinikwal mo an kabotan nin Kagurangnan, kaya isinikwal ka man niya bilang hade nin Israel.”

²⁷Kan magtalikod si Samuel tanganing maghale, kinapotan ni Saul an saiyang alikboy, asin napakit ini.

²⁸Sinabihan siya ni Samuel, “Pinakit na saimo nin Kagurangnan an kahadean nin Israel ngunyan na aldaw asin itinao na sa sarong lalaking mas marahay ki sa saimo.

²⁹Dai nagpuputik o nagbabago nin isip an mamurawayon na Dios nin Israel. Bako siya tawo—dai siya nagbabago nin isip.”

³⁰“Nagkasala ako,” an simbag ni Saul. “Maski siring, pahilingan man giraray sa mga lider kan sakong banwaan asin sa bilog na Israel na ginagalangan mo ako. Mag-iba ka sako tanganing makapagsamba ako sa Kagurangnan na saimong Dios.”

³¹Kaya nag-iba si Samuel ki Saul pasiring sa Gilgal, asin nagsamba si Saul sa Kagurangnan.

³²Nagboot si Samuel, “Daraha nindo sako si Agag na hade kan mga Amalekita.” Maogmang nagdolok saiya si Agag na nagsasaboot, “Totoong nakaagi na an kapaitan nin kagadanan!”

³³Nagsabi si Samuel, “Huli kan saimong espada, nawaraan nin aki an kadakul na ina; sa siring na paagi, mawawaraan man nin aki an saimong ina.” Dangan pineredaso ni Samuel si Agag sa atubangan nin Kagurangnan duman sa Gilgal.

³⁴Dangan nagpasiring sa Rama si Samuel, asin nagpuli man sa Gibea si Saul.

³⁵Mantang nabubuhay si Samuel, dai na nanggad siya nakipaghilingan ki Saul, alagad nagmondo siya para ki Saul. Nagbasol an Kagurangnan kun tadaw ta ginibo niyang hade si Saul sa Israel.