Read Central Bicolano 1 Samuel 18 Bible Online

1 Samuel 18 - Central Bicolano bible

1 Samuel 18

¹Pakatapos kan pag-olay ni David asin ni Saul, nawili nin marahay ki David si Jonatan na aking lalaki ni Saul asin namoot saiya siring kan pagkamoot niya sa saiyang sadiri.

²Poon kaidto, danay nang kaiba ni Saul si David asin dai na niya ini pinapuli.

³Nagsumpa si Jonatan kan saiyang daing tapos na pakikitood ki David huli ta namotan niya si David siring kan pagkamoot niya sa saiyang sadiri.

⁴Hinuba niya an sulot niyang alikboy asin itinao ki David; itinao man niya an saiyang gubing na panggera, pantahob sa daghan, espada, pana asin paha.

⁵Nagin mapanggana si David saen man na gera siya ipinadara ni Saul, kaya ginibo siyang opisyal ni Saul sa saiyang hukbo. Ikinaogma ini kan mga opisyal asin kan mga tawohan ni Saul.

⁶Kan magpuli si David pakatapos na magadan si Goliat asin kan magpuruli na an mga soldados, nagruluwas an kababaehan hale sa gabos na banwa nin Israel tanganing sabaton si Hadeng Saul. Nag-aarawit sinda nin maogmang mga awit, nagsasarayaw, asin nagtuturugtog nin mga tamborin saka lira.

⁷Sa saindang kaogmahan, nag-arawit an kababaehan, “Nakagadan si Saul nin rinibo, alagad nakagadan si David nin manampolong ribo.”

⁸Dai ini nagustohan ni Saul, asin naanggot siya nin marahay. Nagsabi siya, “Ipinanongod ninda ki David an manampolong ribo, alagad rinibo sana sako. Ano pa an sunod na ipapanongod ninda saiya kundi an kahadean!”

⁹Kaya magpoon kaidto, naori si Saul ki David.

¹⁰Sunod na aldaw, naglaog ki Saul an sarong marompot na espiritu na hale sa Dios asin nagparakurahaw siya sa laog kan saiyang harong na siring sa sarong bua, mantang nagtutugtog si David sa saiyang arpa, arog kan ginigibo niya aroaldaw. Igwang kapot na garod si Saul asin

¹¹nagsaboot siya, “Itatadok ko si David sa lanob,” dangan ginarod niya si David nin makaduwang beses, alagad nakalikay si David.

¹²Natakot si Saul ki David huli ta inibahan si David nin Kagurangnan asin pinabayaan na siya.

¹³Kaya pinahale niya si David; dangan ginibo niyang pamayo nin sangribong soldados. Pinangenotan ni David an saiyang mga tawohan sa gera

¹⁴asin nagin mapanggana siya sa gabos niyang gibo, huli ta kaiba niya an Kagurangnan.

¹⁵Naaraman ni Saul an panggagana ni David kaya orog siyang natakot saiya.

¹⁶Alagad namoot ki David an gabos na taga Israel asin taga Juda huli ta saro siyang mapangganang lider.

¹⁷Dangan nagsabi si Saul ki David, “Uya an matua kong aking babae na si Merab. Itatao ko siya saimo bilang agom bastang paglingkodan mo ako bilang sarong maisog asin maimbod na soldados, saka ipaglalaban mo an mga gera nin Kagurangnan.” (Nagsaboot si Saul na sa paaging ini, magagadan si David sa kamot kan mga Filisteo, asin dai na niya kaipuhan na gibohon pa iyan.)

¹⁸Nagsimbag si David, “Siisay ako asin siisay an sakong mga kadugo tanganing magin manugang ako kan hade?”

¹⁹Alagad kan mag-abot an panahon na dapat itao na si Merab ki David, itinao siya sa lalaking an ngaran Adriel na taga Mehola.

²⁰Alagad namoot ki David an saro pang aking babae ni Saul na si Mical, asin kan maaraman ini ni Saul, naogma siya.

²¹Nagsaboot si Saul, “Itatao ko si Mical ki David; siya an gagamiton ko sa pagsiod ki David, tanganing magadan si David kan mga Filisteo. Kaya sa ikaduwang beses, sinabihan ni Saul si David. “Magigin manugang taka.”

²²Pinagbotan ni Saul an saiyang mga opisyal na hilom na kaolayon si David asin sabihan, “Nawiwilihan ka kan hade asin kan gabos niyang opisyal; ngunyan an tamang panahon tanganing agomon mo an saiyang aki.”

²³Kaya isinabi ninda ini ki David. Nagsimbag si David, “Sarong dakulang onra an magin manugang kan hade, dakulang marahay para sa sarong arog sakong dukha asin mayong halaga.”

²⁴Inosip kan mga opisyal ki Saul an sinabi ni David.

²⁵Pinagbotan sinda ni Saul na sabihan si David, “Dai man nagmamawot nin dote sa kasal an hade; an boot sana niya iyo an sanggatos na kaputol na kublit kan kinabuhay kan mga Filisteo, tanganing makabalos siya sa saiyang mga kaiwal.” (Iyo ini an plano ni Saul tanganing magadan si David kan mga Filisteo.)

²⁶Kan sabihan si David kan mga opisyal kun ano an sinabi ni Saul, naogma si David na magin manugang kan hade. Bago nag-abot an talaan na aldaw kan kasal,

²⁷naglakaw si David asin an saiyang mga tawohan dangan ginaradan an duwang gatos na Filisteo. Dinara niya sa hade an mga kaputol na kublit kan mga kinabuhay ninda, asin duman binilang niya gabos sa atubangan kan hade tanganing magin manugang siya ni Saul. Itinao ni Saul an saiyang aking babae na si Mical bilang agom ni David.

²⁸Nasabotan ni Saul na kaiba ni David an Kagurangnan asin na namomoot ki David an aki niyang si Mical.

²⁹Kaya orog na natakot siya saiya. Nagin kaiwal ni Saul si David sagkod na nabubuhay pa siya.

³⁰Minaabot an mga hukbo kan mga Filisteo tanganing makilaban; alagad sa lambang gera, orog na mapanggana si David ki sa arin man na opisyal ni Saul. Kaya orog na nagin bantog si David.