Read Central Bicolano 1 Samuel 24 Bible Online

1 Samuel 24 - Central Bicolano bible

1 Samuel 24

¹Pagbalik ni Saul hale sa pakikilaban sa mga Filisteo, naaraman niyang idtoon si David sa kalangtadan harani sa Engedi.

²Ipinag-iba ni Saul sa paghanap niya ki David an tolong ribong piling soldados nin Israel; nagduman sinda sa sirangan kan Kagapoan kan Lalaw na Kanding.

³Nakaabot siya sa sarong lungib harani sa nagkapirang laoman nin mga karnero sa may dalan; naglaog siya sa lungib tanganing magkasilyas. Kan panahon na idto, si David asin an saiyang mga kairiba yaon duman nagtatago sa pinakaporong parte kan lungib.

⁴Sinabihan si David kan saiyang mga tawohan, “Iyo na ini an oportunidad mo! Tinaraman ka baga nin Kagurangnan na itatao niya sa saimong kamot an saimong kaiwal asin magigibo mo saiya an boot mong gibohon.” Nagkamang si David pasiring ki Saul asin tuminabas nin sadit na pedaso sa gubing niya; dai nagmangno an hade.

⁵Alagad pakatapos, nagbasol si David.

⁶Sinabihan niya an saiyang mga tawohan, “Ilikay logod ako nin Kagurangnan na makaginibo nin ano man na karatan laban sa sakong kagurangnan, an pinili nin Kagurangnan na magin hade! Kaipuhan dai ko siya pag-anohon maski kadikit, huli ta siya an piniling hade kan Kagurangnan!”

⁷Kaya napakiolayan ni David an saiyang mga tawohan na dai ninda pagsalakayon si Saul. Nagtindog si Saul, binayaan an lungib, asin nagpadagos sa saiyang paglakaw.

⁸Sinunod siya ni David dangan inapod, “Mahal na Hade!” Nagsalingoy si Saul; nagdapa sa daga si David sa pagtaong galang.

⁹Nagsabi si David, “Tano ta dinadangog mo an mga tawong nagsasabing boot takang gadanon?

¹⁰Nahiling mo ngunyan na aldaw kun paano ka itinao sako nin Kagurangnan sa laog kan lungib. Sinabihan ako kan nagkapira kong tawohan na gadanon ka, alagad dai taka ginadan, kundi nagsabi akong, ‘Dai ko gagadanon an sakong kagurangnan, huli ta siya an linahidan nin Kagurangnan.’

¹¹Hilinga, sakong ama, hilinga an sadit na pedasong ini kan saimong gubing! Pwede taka kutanang gadanon, alagad iyo sana ining pedaso kan saimong gubing an tinabas ko. Katunayan ini na mayo akong isip na magrebelde laban saimo o magkasala. Pinaghahanap mo ako tanganing gadanon maski mayo ako nin naginibong maraot saimo.

¹²Hukoman logod kita nin Kagurangnan kun siisay sato an may sala! Padusahan ka logod nin Kagurangnan huli kan ginibo mo sako; alagad dai ako matumang saimo.

¹³Aram mo an suanoy na kasabihan, ‘An karatan minagikan sa maraot na tawo.’ Kaya dai ako matumang saimo.

¹⁴Siisay an pinaghahanap kan hade nin Israel tanganing gadanon? Hilinga kun ano an saiyang pinaglalamag! Sarong gadan na ayam, sarong purgas!

¹⁵An Kagurangnan iyo an maghuhukom, asin siya an masentensiya kun siisay sato an sala. Siyasaton logod niya an bagay na ini, surogon ako, asin iligtas saimo.”

¹⁶Pakasabi ni David kaini, nagsabi si Saul, “David, aki ko, ika mananggad iyan?” Dangan naghibi an hade.

¹⁷Nagsabi pa si Saul ki David, “Mas matanos ka ki sa sako. Ginibohan mo ako nin karahayan, mantang karatan an ginibo ko saimo!

¹⁸Ipinahayag mo ngunyan kun gurano ka karahay sako, huli sa dai mo paggadan sako kan itao ako nin Kagurangnan sa saimong kamot.

¹⁹Huli ta kun makua na nin sarong tawo an saiyang kaiwal, pinapaligtas pa daw niya? Bendisyonan ka logod nin Kagurangnan huli kan ginibo mo sako ngunyan na aldaw!

²⁰Ngunyan ko napatunayan na ika an magigin hade nin Israel asin an kahadean na iyan magdadanay sa pamamahala mo.

²¹Kaya magsumpa ka sako sa ngaran nin Kagurangnan na dai mo gagadanon an sakong kapagarakian, tanganing dai malingawan an sakong ngaran asin an ngaran kan sakong pamilya.”

²²Nagsumpa si David. Dangan nagpuli si Saul, asin nagbalik man si David saka an saiyang mga kairiba sa saindang lugar na pinagtatagoan.