Read Central Bicolano 1 Samuel 26 Bible Online

1 Samuel 26 - Central Bicolano bible

1 Samuel 26

¹Nagduman ki Saul sa Gibea an nagkapirang lalaki na hale sa Zif asin binaretaan siya na nagtatago si David sa Bukid nin Hakila sa gilid kan kalangtadan nin Juda.

²Nagduman tolos si Saul sa kalangtadan nin Zif kaiba an tolong ribo kan pinakamarahay na mga soldados nin Israel, tanganing hanapon si David.

³Nagkampo si Saul sa may dalan sa Bukid nin Hakila. Yaon pa si David sa kalangtadan, asin kan maaraman niyang pinaghahanap siya ni Saul,

⁴nagsugo siya nin mga espiya asin napag-araman niyang totoo mananggad na yaon duman si Saul.

⁵Nagduman tolos si David sa pinagkampohan ni Saul asin nahiling niya an lugar na tinotorogan ni Saul saka ni Abner na aking lalaki ni Ner, an pamayo kan hukbo ni Saul. Nagkakatorog sa laog kan kampo si Saul, asin napapalibotan siya kan saiyang mga tawohan.

⁶Hinapot ni David si Ahimelec na Heteo, asin si Abisai na tugang ni Joab (an ina ninda iyo si Zeruias), “Siisay sa saindong duwa an maiba sako pasiring sa kampo ni Saul?” “Ako,” an simbag ni Abisai.

⁷Kaya kan bangging idto, linaog ni David saka ni Abisai an kampo ni Saul asin nanumpongan ninda siyang nagkakatorog sa tahaw kan kampo; sa may pamayohan niya, nakatusok sa daga an saiyang garod. Si Abner asin an mga soldados nagkakatorog sa palibot ni Saul.

⁸Nagsabi si Abisai ki David, “Ngunyan na banggi, itinao nin Dios sa saimong kamot an saimong kaiwal. Tugote akong itadok si Saul sa daga kan saiya man sanang garod; saro sanang tusok asin dai na kaipuhan uliton pa!”

⁹Alagad nagsabi si David, “Dai mo siya paggadanon! Papadusahan nanggad nin Kagurangnan an siisay man na gumadan sa hade na saiyang pinili.

¹⁰Siring na buhay an Kagurangnan,” an padagos ni David, “aram kong an Kagurangnan mismo an magadan ki Saul, magin iyan sa natural na paagi o sa gera.

¹¹Dai logod itugot nin Kagurangnan na ako an magbikyaw kan sakong kamot tanganing gadanon an saiyang linahidan! Alagad kuaha an saiyang garod saka an dulay, asin maghale na kita.”

¹²Kaya kinua ni David an garod asin an dulay sa may pamayohan ni Saul, dangan naghale na sindang duwa. Mayo nin siisay man na nakahiling o nakaaram kan nangyari; mayo nin nagimata—tororog sinda gabos, huli ta pinakatorog sindang marahay nin Kagurangnan.

¹³Nagbalyo si David sa kapantayan asin nagtindog sa alitoktok kan bukid, sa sarong ligtas na lugar,

¹⁴dangan kinurahawan niya an mga soldados ni Saul asin si Abner, “Abner! Nadadangog mo ako?” “Siisay an nagkukurahaw na iyan asin boot pukawon an hade,” an hapot ni Abner.

¹⁵Nagsimbag si David, “Abner, bakong ika an pinakabantog na lalaki sa bilog na Israel? Tano ta dai mo binantayan an saimong kagurangnan, an hade? Dai pa nahahaloy, igwang naglaog sa kampo tanganing gadanon an saimong kagurangnan.

¹⁶Nagpabaya ka sa saimong katongdan. Isinusumpa ko sa ngaran nin Kagurangnan, na kamo gabos maninigong gadanon, huli ta dai nindo binantayan an saindong kagurangnan, an linahidan nin Kagurangnan. Hilinga! Haen an garod kan hade? Haen an dulay nin tubig na nasa saiyang pamayohan?”

¹⁷Namidbidan ni Saul an tingog ni David asin naghapot siya, “David, aki ko, ika iyan?” “Iyo, Mahal na Hade,” an simbag ni David.

¹⁸Dangan nagpadagos siya, “Tano ta padagos mo akong linalamag? Ano an sakong ginibo? Anong krimen an naginibo ko?

¹⁹Mahal na Hade, dangoga an sasabihon ko. Kun an Kagurangnan an nagpasabong saimo na labanan ako, pwedeng magbago an saiyang isip huli sa sarong dolot. Alagad kun mga tawo an kaggibo kaiyan, mapasainda logod an maldisyon nin Kagurangnan, huli ta pinahale ninda ako sa daga nin Kagurangnan asin pinaduman sa sarong daga saen mga dayuhan na dios an pwede ko sanang sambahon.

²⁰Hare pagtugotan na magadan ako sa dayuhan na daga, harayo sa atubangan nin Kagurangnan. Tano ta magdigdi an hade nin Israel sa paggadan nin sarong purgas na arog sako? Tano ta pinaglalamag niya ako na garo sarong lalaw na gamgam?”

²¹Nagsimbag si Saul, “Nagkasala ako. Magbalik ka David, aki ko! Dai na ako mag-iisip na gadanon ka, huli ta dai mo ako ginadan ngunyan na banggi. Nagin lolong ako, asin dakula an ginibo kong karatan!”

²²Nagsimbag si David, “Uya an saimong garod, Mahal na Hade; ipakua mo sa saro kan saimong mga tawohan.

²³Binabalosan nin Kagurangnan idtong mga maimbod asin matanos. Itinao ka nin Kagurangnan sa sakong kamot ngunyan na aldaw, alagad dai ko ginadan an linahidan nin Kagurangnan.

²⁴Siring na pinahalagahan ko an saimong buhay ngunyan na aldaw, pahalagahan man logod nin Kagurangnan an sakong buhay; irayo niya logod ako sa gabos na karatan!”

²⁵Sinabihan ni Saul si David, “Bendisyonan ka logod nin Dios, aki ko! Dakul na bagay an saimong gigibohon asin magigin mauswag ka!” Kaya nagpadagos si David sa saiyang paglakaw asin nagpuli man si Saul.