Read Central Bicolano 1 Samuel 28 Bible Online

1 Samuel 28 - Central Bicolano bible

1 Samuel 28

¹Naglihis an panahon, asin tiniripon kan mga Filisteo an saindang hukbo tanganing labanan an Israel. Sinabihan ni Akis si David, “Saboton mo nanggad na kaapil taka asin an saimong mga tawohan sa pakikilaban.”

²“Iyo,” an simbag ni David. “Sorogoon mo ako, asin ipapahiling ko an magigibo ko.” Nagsabi si Akis, “Marahay! Ika an gigibohon kong permanenteng bantay ko.”

³Gadan na kaidto si Samuel, asin nagmondo an gabos na Israelita para saiya; ilinubong siya ninda sa Rama na sadiri niyang banwa. Pinahale na kaidto ni Saul sa Israel an gabos na espiritista asin parahula.

⁴Nagtiripon an hukbo kan Filisteo asin nagkampo harani sa Sunem; tiniripon man ni Saul an mga Israelita asin nagkampo sinda sa Bukid nin Gilboa.

⁵Kan mahiling ni Saul an hukbo kan mga Filisteo, natakot siya

⁶kaya naghapot sa Kagurangnan kun ano an dapat niyang gibohon. Alagad dai siya sinimbag nin Kagurangnan, maski sa paagi nin pangatorogan o sa Urim saka Tummim o sa mga propeta.

⁷Pinagbotan ni Saul an saiyang mga opisyal, “Ihanap nindo ako nin sarong babaeng espiritista, tanganing magduman ako asin makihumapot saiya.” “Igwa nin saro sa Endor,” an simbag ninda.

⁸Kaya nagsulot nin ibang mga gubing si Saul tanganing dai siya mamidbidan dangan nagduman sa babae. Banggi siyang naghale kaiba an duwa kan saiyang mga tawohan. “Makihumapot ka sa mga espiritu para sako, asin sabihan mo ako kun ano an mangyayari,” an olay ni Saul sa babae. “Apodon mo an espiritu kan lalaking ngangaranan ko.”

⁹Nagsimbag an babae, “Aram mo na gayod an ginibo ni Saul, kun paano niya pinahale an mga parahula asin mga espiritista sa Israel. Tano ta dinadagka mo ako na maggibo kan magigin dahelan na mahidali an sakong kagadanan?”

¹⁰Alagad nagsumpa si Saul, “Siring na buhay an Kagurangnan nanunuga ako na dai ka papadusahan huli sa paggibo mo kaini.”

¹¹“Siisay an aapodon ko para saimo?” hapot kan babae. “Si Samuel,” an simbag ni Saul.

¹²Kan mahiling kan babae si Samuel, nagkurahaw siya nin makosog asin nagsabi ki Saul, “Tadaw ta dinaya mo ako? Ika si Hadeng Saul!”

¹³Nagsabi si Saul, “Dai ka matakot! Ano an nahihiling mo?” “Igwa akong nahihiling na espiritu na nagluluwas hale sa daga,” an simbag kan babae.

¹⁴Naghapot si Saul, “Ano an porma kan espiritu?” Nagsimbag an babae, “Sarong gurang na lalaking nakaalikboy an nagluwas.” Dangan naaraman ni Saul na iyo idto si Samuel, kaya nagdapa siya sa daga sa pagtaong galang.

¹⁵Sinabihan ni Samuel si Saul, “Tadaw ta pinurisaw mo ako? Tadaw ta pinabalik mo ako?” Nagsimbag si Saul, “Dakula an sakong kahaditan! Sinasalakay ako kan mga Filisteo, asin pinabayaan na ako nin Dios. Dai na niya ako sinisimbag, maski sa paagi kan mga propeta o sa mga pangatorogan. Kaya inapod taka tanganing sabihan mo ako kun ano an dapat kong gibohon.”

¹⁶Nagsabi si Samuel, “Tadaw ta inaapod mo ako kun pinabayaan ka na nin Kagurangnan asin nagi mo na siyang kaiwal?

¹⁷Ginibo na saimo nin Kagurangnan an itinaram niya sako; hinale na saimo an kahadean asin itinao na ki David.

¹⁸Linapas mo an pagboot nin Kagurangnan asin dai mo kinuyog an saiyang tingog; dai mo ginadan an gabos na Amalekita, kaya ginibo na saimo nin Kagurangnan an bagay na ini ngunyan na aldaw.

¹⁹Itatao ka niya asin an Israel sa mga Filisteo. Ika asin an saimong mga aking lalaki magigin kaiba ko sa aga. Itatao nin Kagurangnan sa mga Filisteo an hukbo nin Israel.”

²⁰Pakadangog kaini, unat na natumba sa daga si Saul; dakula an saiyang takot huli kan sinabi ni Samuel. Pinanluya siya huli ta mayo siyang kinakan sa bilog na aldaw asin banggi.

²¹Dinolok siya kan babae asin nahiling kaini na kanigoan an takot ni Saul, kaya sinabihan niya si Saul, “Mahal na Hade, ibinugtak ko sa pag-alaman an sakong buhay huli sa pagsunod kan hinagad mo.

²²Dangoga man ako ngunyan; tugote akong mag-andam nin pagkakan para saimo. Kaipuhan magkakan ka tanganing magin makosog ka sa saimong paglakaw.”

²³Nagsayuma si Saul asin nagsabing habo siyang magkakan. Alagad pinirit siya kan saiyang mga opisyal saka kan babae sagkod na mapiritan siya. Nagtindog siya, asin nagtukaw sa higdaan.

²⁴Hidaling binuno kan babae an pinataba niyang baka, asin nagkua nin arina, minasa idto dangan naggibo nin tinapay na mayo nin lebadura.

²⁵Inandam kan babae an mga pagkakan sa atubangan ni Saul asin kan saiyang mga opisyal, dangan nagkakan sinda. Kan banggi man sanang idto, naghale sinda.