Read Central Bicolano 1 Samuel 29 Bible Online

1 Samuel 29 - Central Bicolano bible

1 Samuel 29

¹Tiniripon sa Afek kan mga Filisteo an gabos nindang hukbo, mantang an mga Israelita nagkampo sa may burabod nin Jezreel.

²Nagmartsa an limang hadeng Filisteo kaiba an saindang mga sakop na ginatos saka rinibong kalalakihan; si David asin an saiyang mga tawohan nasa hurihan, kaiba ni Hadeng Akis.

³Nahiling sinda kan mga pamayo kan mga Filisteo asin naghapot, “Ano an ginigibo digdi kan mga Hebreyong iyan?” Nagsimbag si Akis, “Iyo ini si David na sarong opisyal ni Saul na hade nin Israel. Haloy na siyang nasa kaibahan ko asin mayo akong nakukuang sala saiya poon kan magdolok siya sako.”

⁴Alagad naanggot ki Akis an mga pamayo kan mga Filisteo asin nagsabi, “Papulion mo na an lalaking iyan sa lugar na itinao mo saiya. Hare siya pagpaibaha ta tibaad kita an saiyang kalabanon mantang nagraralaban. Mayo nang pinakamarahay na paagi para sa saiya tanganing makipag-olian nin boot sa saiyang kagurangnan, kundi an kagadanan kan satong mga tawohan!

⁵Bakong iyo ini an David na ikinakanta kan kababaehan, mantang nagsasayaw sinda, ‘Nakagadan si Saul nin rinibo, alagad nakagadan si David nin manampolong ribo?’”

⁶Inapod ni Akis si David asin sinabihan, “Minasumpa ako sa ngaran kan buhay na Dios nin Israel na nagin maimbod ka sako; maninigo kang magin kaiba ko sa gerang ini. Mayo akong nakuang sala saimo poon kan dumolok ka sako sagkod ngunyan. Alagad habo saimo an ibang mga hade.

⁷Magpuli ka na; matoninong kang maghale tanganing dai mo mapaanggot an mga namamayo kan mga Filisteo.”

⁸Nagsimbag si David, “Alagad ano an ginibo ko? Ano an nakua mong sala ko poon kan magdolok ako saimo sagkod ngunyan kun kaya dai mo ako papaibahon sa pakilaban sa mga kaiwal mo, sakong kagurangnan asin hade?”

⁹Nagsimbag si Akis, “Aram kong mayo kang sala arog sa sarong anghel nin Dios; alagad nagsarabi an ibang mga hade na dai ka pwedeng mag-iba samo sa gera.

¹⁰Kaya, sa agang amay, magbangon ka asin maghale digdi, kamo gabos na naghale sa paglingkod ki Saul.”

¹¹Kaya amay na naghale si David asin an saiyang mga tawohan, tanganing magpuli sa daga kan mga Filisteo, asin nagpadagos an mga Filisteo pasiring sa Jezreel.