Read Central Bicolano 1 Samuel 31 Bible Online

1 Samuel 31 - Central Bicolano bible

1 Samuel 31

¹Nakilaban an mga Filisteo sa mga Israelita sa Bukid nin Gilboa. Dakul na Israelita an nagkagaradan duman. Nagdurulag an iba sainda na kairiba si Hadeng Saul asin an mga aki niyang lalaki.

²Alagad naabotan sinda kan mga Filisteo asin ginadan an tolong aking lalaki ni Saul na si Jonatan, Abinadab, saka Malkisua.

³Nagin mangirhat an ralaban sa palibot ni Saul, asin natamaan siya kan mga parapana; grabe an saiyang lugad.

⁴Sinabihan ni Saul an paradara kan saiyang mga armas, “Hugkota an saimong espada asin gadana ako, tanganing dai ako pag-olog-ologon kan bakong sirkomsisyonadong mga Filisteong ini.” Alagad makuri an takot kan paradara nin armas, kaya dai siya nagkuyog. Kaya kinua ni Saul an saiyang espada asin dinapaan an tarom kaini.

⁵Kan mahiling kan hoben na gadan na si Saul, dinapaan man niya an tarom kan saiyang espada asin nagadan siya kaiba ni Saul.

⁶Siring kaidto an pagkagadan ni Saul, kan saiyang tolong aking lalaki, asin kan paradara kan saiyang mga armas, patin kan gabos niyang tawohan. Nagadan sinda sa parehong aldaw.

⁷Kan mahiling kan mga Israelita na nag-erok sa ibong kan Kapantayan nin Jezreel asin kan nasa sirangan kan Salog nin Jordan na duminulag an hukbo nin Israel, dangan nagadan si Saul pati an mga aking lalaki kaini, binarayaan ninda an saindang mga banwa asin nagdurulag. Nag-arabot an mga Filisteo asin nag-erok sinda sa mga banwang idto.

⁸Sunod na aldaw, kan magduman sa mga bangkay an mga Filisteo tanganing samsaman, nanumpongan ninda sa Bukid nin Gilboa an bangkay ni Saul asin kan saiyang tolong aking lalaki.

⁹Pinugotan ninda nin payo si Saul, asin hinubaan kan saiyang mga armas. Dangan nagpadara sinda nin mga sugo sa bilog na daga kan mga Filisteo tanganing ibalangibog an marahay na bareta sa saindang mga dios-dios asin sa saindang mga kahimanwa.

¹⁰Ibinugtak ninda an mga armas ni Saul sa templo kan diosa nindang si Astarte, asin ipinako ninda an bangkay ni Saul sa kudal kan syudad nin Bet-san.

¹¹Kan madangog kan mga taga Jabes-gilead an ginibo kan mga Filisteo ki Saul,

¹²nagduruman an mga maiisog na lalaki; bilog na banggi sindang nagralakaw pasiring sa Bet-san. Kinua ninda sa kudal an mga bangkay ni Saul asin kan saiyang mga aking lalaki. Dinara ninda idto sa Jabes, asin sinulo duman.

¹³Dangan kinua ninda an mga tolang asin ilinubong sa irarom kan kahoy na sampalok duman sa Jabes. Pakatapos, nag-ayuno sinda sa laog nin pitong aldaw.