Read Central Malay MATIUS 10 Bible Online

MATIUS 10 - Central Malay bible

MATIUS 10

¹Yesus milia duau belas anak-buaHau, dienjuakkaNyau kuasau endak melaratka iblis ngan meghaduka gegalau idapan ngan gegalau cacat.

²Inila namau duau belas rasul itu: Diau dulu sekali Simun diau dinamauka pulau Pitrus ngan Anderias ading Simuntu, mangku Yakubus anak Sebedius ngan adingau Yuhanis,

³mangku Pilipus ngan Bartulumius, Tumas ngan Matius tukang tagia cukitu, mangku Yakubus anak Alpius ngan Tadius,

⁴mangku Simun diau dikiciakka jemau Silut ngan Yudas Iskariut, diaunila njualka Yesus.

⁵Mangku duau belas anak-buaHau diajung Yesus pegi ngan kici'an luak ini, “Jangan nyimpang ke jalan jemau bangsau lain ngan jangan pulau masuak kuta jemau Samaria,

⁶tapitu pegila njenguak jemau Israil, jemau diau sesat.

⁷Kiciakkala ngan ughangtu, ‘Allah laka merinta luak rajau.’

⁸Ghadukala jemau buidapan, idupkala jemau mati, ghadukala jemau buidapan ja'at, laratkala iblis. Gegalau kuasau itu dienjuakka ngan kamu nidau dibeli. Karnau itu enjuakkala pulau nidau mintak bayighan.

⁹Jangan kamu mbatak tanci emas, pirak ngan tembagau dalam bebat.

¹⁰Jangan mbatak dumpit, amun endak bejalan. Batak baju duau jangan, sepatu jangan, tungkat jangan, karnau sughang pekerjau pantas dienjuakka upa.

¹¹Amun kamu masuak kuta ngan dusun, dalakla jemau diau endak nerimau kamu. Mendamla di situ enggut kamu pegi jak di situ.

¹²Amun kamu masuak ghuma jemau, kiciakkala salam damai ngan ughangtu, ‘Kiraunyau Tuhan njagaui kapu dighi.’

¹³Amun ughang di ghuma itu nerimau kamu, salamtu ka mendam ngan ughangtu. Amun nidau, salamtu ka ngulang ke kamu.

¹⁴Amun endiak bediau jemau diau nerimau kamu ngan ndengaghka kici'an kamu, pegila jak di ghuma ngan kuta itu, mangku kepaskala debu jak di keting kamu.

¹⁵Keruanila, masau aghi kiamat banyakla tanggungan kuta itu sangkan Sudum ngan Gumura.”

¹⁶“Dengaghkala, Aku ngajung kamu luak bebiri pegi di pugan setuau. Karnau itu kamu mesti cerdiak luak ulagh ngan tulus luak burung darau.

¹⁷Sepepadaula ngan gegalau jemau. Kamu ka ditangkap, diadapka ngan pengadilan agamau. Kamu ka disaraui di ghuma sembayang.

¹⁸Kamu ka dibata'i ke adapan penguasau ngan rajau-rajau, karnau percayau ngan Aku. Itula kesempatan kamu nceritauka Aku ngan ughangtu ngan jemau diau nidau keruan Allah.

¹⁹Amun kamu dibatak endak diadili, jangan kamu ghegak ngan setu diau endak kamu kiciakka, karnau katau diau mesti kamu katauka ka dienjuakka ngan kamu masau itu pulau.

²⁰Karnau diau ngiciak masau itu ukan kamu, tapitu Rua Bapak diau di sergau. Diautu ka ngiciak di ati kamu.

²¹Jemau ka nyeraka ading-beghadingau endak dibunua. Luak itu pulau bak ka mbuati ana'au. Mangku anak pulau ka melawan pejadiau mangku nyeraka ughangtu endak dibunua.

²²Kamu ka diluatka gegalau jemau, karnau kamu percayau ngan Aku. Anyautu jemau diau beta'an enggut kesudiman ka selamat.

²³Amun jemau nganiayau kamu di sebua kuta, laratla ke kuta diau lain. Aku bekatau ngan kamu, ‘Antak ka kamu udim nandangi gegalau kuta di Israil, Anak Manusiau la datang.’

²⁴Anak-murip nidau lebia penting jak di guruau, apu budak jak di tuanau.

²⁵Jadila, amun anak-murip la semegi ngan guruau, mangku budak la semegi ngan tuanau. Amun tuan ghuma dikiciakka Bilsebul, apau lagi jemau seghumahau.”

²⁶“Jangan kamu penakut ngan jemau. Gegalaunyau diau nyemuni ka kina'an ngan gegalaunyau diau diresiauka ka keruan.

²⁷Setu diau Kukiciakka aghi malam, kiciakkala aghi siang. Setu diau dibisiakka ngan kamu, kiciakkala jak di berendau.

²⁸Jangan kamu penakut ngan jemau diau cuman pacak mbunua badan, tapitu nidau bekuasau mbunua jiwa. Takutla ngan Allah diau bekuasau mbenasauka dalam nerakau badan ngan jiwa.

²⁹Nyela nian, burung pipit dijual duau ikuak seringgit. Anyautu sikuak kia nidau ka umban ke tana, amun ukan kendak Bapak kamu.

³⁰Ngan kamu, gumbak kamu di palak la dibilangi galau.

³¹Amun luak itu, jangan kamu takut, karnau beregaula kamuni sangkan burung pipit.

³²Jemau diau ngaku'i Aku di mukau jemau banyak, ka Kuaku'i di adapan BapakKu diau di sergau.

³³Anyautu jemau diau nidau ngaku'i Aku di adapan manusiau, nidau pulau ka Kuaku'i di adapan BapakKu diau di sergau.”

³⁴“Jangan sangkau, bansau Aku datang endak mbatak damai ke deniauni. Aku nidau mbatak damai tapitu pelawanan.

³⁵Karnau Aku datang mbuat jemau belawanan ngan ba'au, anak tinau melawan ma'au, nantu tinau melawan mentuau tinaunyau.

³⁶Nyela, diau ka njadi musua nian jemau seghuma itula.

³⁷Jemau diau lebia nyayangi pejadiau jak di Aku nidau pantas njadi anak-buaKu. Luak itu pulau jemau diau lebia nyayangi ana'au empuak tinau empuak lanang jak di Aku nidau pantas njadi anak-buaKu.

³⁸Jemau diau nidau mikul salipau mangku ngikut Aku, nidau pantas njadi anak-buaKu.

³⁹Jemau diau endak ngilakka nyawaunyau ka kelengitan nyawaunyau. Anyautu jemau diau kelengitan nyawaunyau karnau ta'at ngan Aku, diautu ka bulia idup.

⁴⁰Jemau diau nerimau kamu nerimau Aku. Jemau diau nerimau Aku nerimau pulau diau ngajung Aku.

⁴¹Jemau diau nerimau sughang nabi karnau diau nabi ka bulia upa nabi. Jemau diau nerimau jemau iluak karnau diau iluak ka bulia upa jemau iluak.

⁴²Mangku jemau diau ngenjuak minum ayiak bangkau, empuak cuman semangkuak, ngan sala sughang diau inau ini, karnau njadi anak-buaKu, percayaula, diau cetau ka nerimau upahau.”