Read Central Malay MATIUS 11 Bible Online

MATIUS 11 - Central Malay bible

MATIUS 11

¹La udim diau ngajagh duau belas anak-buaHau, Yesus pegi jak di situ endak ngajagh ngan ngiciakka ceritau iluak di kuta lain.

²Yuhanis dang dalam jil. Di situ diau ndengagh ceritau Keristus, mangku diau ngajung anak-buahau betanyau ngan Diau,

³“Apu Dighi jemau diau ka datangtu? Apu kami mesti nantika jemau lain?”

⁴Yesus nimbal, “Baliakla, kiciakkala ngan Yuhanis setu diau kamu kinak ngan dengagh:

⁵Jemau butau nginak, jemau lumpua bejalan, jemau buidapan ja'at ghadu, jemau tuli ndengagh, jemau mati ngulang idup, ngan ceritau iluak dikiciakka ngan jemau sarau.

⁶Mangku riangla jemau diau nidau keciwau ngan nulak Aku.”

⁷Ajungan Yuhanis la pegi, mangku Yesus mulai ngiciakka ceritau Yuhanis ngan jemau banyak itu, katauNyau, “Ngapau kamu pegi ke padang bungin? Apu kamu endak nginak ghumput diau digugak angin? Cengki ukan!

⁸Ngapau kamu pegi? Endak nginak jemau bebaju alap? Jemau diau bebaju alap adau di istana rajau.

⁹Mangku ngapau kamu pegi? Endak nginak sughang nabi? Nyela, lebia jak di nabi diautu.

¹⁰Ceritau Yuhanis la ditulis di Injil: ‘Katau Allah, keruanila, Aku ka ngajung ajunganKu ndului Kaba, diau ka mbukak jalan batan endak Kaba.’

¹¹Keruanila, endiak bediau jemau di deniau ini lebia besak jak di Yuhanis, anyautu jemau diau keciak sekali di bada Allah merinta, besakla jemau itu sangkan Yuhanis.

¹²Jak Yuhanis ngiciakka ceritaunyau enggut mbak kini, umat Allah diserang jemau diau endak nguasauinyau ngan masau.

¹³Enggut Yuhanis datang, gegalau nabi ngan ukum Taurat ngiciakkanyau.

¹⁴Mangku amun kamu endak percayau, Yuhanis itula Elia diau ka datang.

¹⁵Amun betelingau, dengaghkala!

¹⁶Ngan tuapau jemau mbak kini pacak diumpamauka? Ughangtu umpamau budak keciak diau duduak di tengalaman libagh, ngiciak sughang ngan diau lain,

¹⁷‘Kami nabua kelintang, anyautu kamu enggup nari. Kami berandaian, anyautu kamu enggup nangis.’

¹⁸Yuhanis datang, diau puasau ngan nidau minum anggur, mangku jemau ngiciakka, ‘Diau gilau.’

¹⁹Anak Manusiau datang, Diau minum-makan, mangku jemau bekatau, ‘Kina'ila, Jemau itu selak, pemabuak, kantin penagia cuki ngan kantin jemau bedusau.’ Empuak luak itu, pengertian dibenaghka asilau.”

²⁰Mangku Yesus nyalaka kuta diau nidau ngubai jak di dusaunyau, awuak di situ Diau banyak sekali ngerjauka tandau nyelia.

²¹“Celakaula kamu, jemau Kurasim! Celakaula kamu, jemau Betsaida. Misalau tandau nyelia diau dikerjauka guak kamu dikerjauka di Tirus ngan Sidun, cengki ughangtu la lamau ngubai peremba'au jak di dusaunyau ngan mbaduki pala'au.

²²Ingatkala, masau aghi kiamat banyakla tanggungan kamu sangkan tanggungan jemau Tirus ngan Sidun.

²³Mangku kamu, jemau Kapernaum, apu kamu ka ditinggika ke sergau? Nidau! Kamu ka dicapakka ke nerakau. Misalau tandau nyelia diau la diadauka guak kamu diadauka di Sudum, kuta itu cengki gi adau enggut mbak kini.

²⁴Keruanila, masau aghi kiamat banyakla tanggungan kamutu sangkan jemau Sudum.”

²⁵Masau itu Yesus bekatau, “Bak, Aku ngagungka dighi, Tuhan langit ngan deniau, karnau gegalaunyau ini Dighi resiauka ngan jemau diau sekul ngan jemau pintar. Anyautu Dighi nyataukanyau ngan jemau biasau.

²⁶Itula diau melemakka ati Dighi.

²⁷Gegalaunyau la Dighi seraka ngan Aku. Nidau bediau sughang kia diau keruan Anak, lain jak di Bapak. Nidau bediau pulau diau keruan Bapak, lain jak di Anak ngan jemau diau dikenda'i Anaktu nyataukanyau.

²⁸Mela, jenguakla Aku gegalau kamu diau litak ngan bebata'an beghat. Aku ka ngenjuakka ampung ngan kamu.

²⁹Tanggungkala selungku diau Kukenauka ngan kamu, mangku belajaghla jak di Aku, karnau Aku ngaligh ngan nidau geduak, mangku kamu ka njadi tenang.

³⁰Karnau selungku diau Kukenauka lemak ngan bata'an diau Kutanggungka ngan kamu ampung.”