Read Central Malay MATIUS 12 Bible Online

MATIUS 12 - Central Malay bible

MATIUS 12

¹Aghi Sabat Yesus lalu di umau. Karnau lapagh anak-buaHau ngambiak padi mangku dimakanau.

²Nginak titu jemau Parisi ngiciak, katauNyau, “Kina'ila, anak-bua Kaba ngerjauka setu diau nidau bulia dikerjauka aghi Sabat.”

³Mangku Yesus nimbali ughangtu, “Cengki kapu dighi la mbacau setu diau dikerjauka Daud, masau diau ngan anak-buahau lapagh.

⁴Diautu masuak ke dalam Ghuma Allah, mangku ughangtu makan ruti pesembahan, awuak nurut ukum agamau kitau diautu ngan anak-buahau pulau nidau bulia makanau, cuman imam ajau bulia makan.

⁵Apu lum kapu dighi mbacau dalam ukum Musa, bansau idang aghi Sabat imam diau betugas di Ghuma Allah melanggar peraturan aghi Sabat, anyautu nidau disalaka?

⁶Dengaghkala katauKu ini: Di sini adau diau lebia besak jak di Ghuma Allah.

⁷Di Injil ditulis luak ini, ‘Keilu'an ati diau Kukenda'i ukan kerban benatang.’ Amun kapu dighi terti nian kici'an itu, cengki kapu dighi nidau nyalaka jemau diau nidau besala.

⁸Karnau Anak Manusiau nguasaui aghi Sabat.”

⁹Yesus pegi jak di situ mangku masuak ghuma sembayang.

¹⁰Di situ adau jemau diau mati sebela tanganau. Ughangtu betanyau ngan Diau, “Apu bulia meghaduka jemau aghi Sabat?” Ughangtu betanyau luak itu mangku pacak nyalaka Yesus.

¹¹Yesus nimbali ughangtu, katauNyau, “Misalau sughang jak di kapu dighi adau sikuak bebiri diau temasuak ke pelubang aghi Sabat, apu diau nidau ka ncubau ngeluaghka bebiriautu?

¹²Manusiau jawua lebia beregau jak di bebiri. Karnau itu bulia kitau nulung jemau aghi Sabat.”

¹³Udim itu Yesus bekatau ngan jemau diau mati sebela tanganau, “Unjughkala tangan kaba!” Jemau itu ngunjughka tanganau, mangku tanganautu ghadu njadi luak tangan diau sebela.

¹⁴Anyautu jemau Parisi ngeluagh mangku sepakat endak mbunua Yesus.

¹⁵Yesus keruan rencanau ughangtu mangku nyingkir jak di bada itu. Banyak jemau ngikut Yesus, mangku Diau meghaduka gegalau jemau buidapan.

¹⁶Diau negahi nian ughangtu ngiciakka ceritau Diau ngan jemau lain.

¹⁷Luak itu ditepati kici'an nabi Yesaya,

¹⁸“Inila BudakKu diau Kupilia, diau Kusayangi ngan melemakka atiKu. Aku ka ngenjuakka RuaKu ngan Diau, mangku Diau ka ngiciakka kendakKu ngan bangsau-bangsau.

¹⁹Diau nidau ka bebala ngan nidau tegauk ngan nidau bepidatau di jalan.

²⁰Bulua diau tekulai nidau ka dilalukaNyau, lampu diau keciak magha'au nidau ka dipadamkaNyau. Diau ka ngerjaukanyau enggut ukum Allah dita'ati.

²¹Mangku gegalau bangsau ka ngaghapka Diau.”

²²La udim itu dibatak njenguak Yesus sughang butau ngan bisu karnau diarung iblis. Yesus meghaduka jemautu, mangku diau pacak ngiciak ngan nginak.

²³Jemau banyak di situ kepagauan galau, kataunyau, “Asauku Diauni Anak Daud diau dijanjikatu.”

²⁴Jemau Parisi ndengagh kici'an itu mangku bekatau, “Diau ngisitka iblis ngan kuasau Bilsebul, pengulu iblis itu.”

²⁵Anyautu Yesus keruan rupu'an ughangtu, mangku Diau bekatau, “Amun nenggeri teceghai-beghai sangi bemusuan, nenggeritu nidau ka beta'an. Lagi pulau amun jemau sedusun ngan seghuma nidau suijauan ngan bemusuan sughang ngan diau lain, ughangtu ka kacau.

²⁶Luak itula pulau ngan iblis. Amun iblis ngisitka iblis, mangku iblistu teceghai-beghai ngan kuasauannyau nidau pacak beta'an.

²⁷Kapu dighi ngiciak, Aku ngisitka iblis ngan kuasau Bilsebul. Amun luak itu, ngan kuasau sapau anak-bua kapu dighi ngisitkanyau? Anak-bua kapu dighitula mbuktika kapu dighi besala.

²⁸Anyautu Aku ngisitka iblis ngan kuasau Rua Allah, mangku ngenian Allah la mulai merinta di guak kapu dighi.

²⁹Luak manau jemau pacak masuak ke ghuma jemau diau kuat endak ngambiak retau bendaunyau, amun jemau kuat tadi nidau dikebat kudai? La udim dikebat, mangku pacak merampuk ghuma itu.

³⁰Jemau diau nidau mihak ngan Aku, diautu melawan Aku, mangku jemau diau nidau nulung aku nunggalka jemau, diautu nceghai-beghaika.

³¹Itula sebapau Aku bekatau ngan kamu: Gegalau dusau ngan kici'an nggelak pacak diabiska, anyautu jemau diau nggelakka Rua Allah nidau pacak diabisi dusaunyau.

³²Amun jemau ngiciakka setu melawan Anak Manusiau, jemautu pacak diampuni. Anyautu jemau diau ngiciakka setu nggelakka Rua Allah nidau pacak diabisi dusaunyau, empuak di deniau mbak kini empuak nantitu.”

³³“Batang diau kamu katauka iluak ngasilka bua diau iluak. Batang diau kamu katauka nidau iluak ngasilka bua diau nidau iluak. Bilang batang dikeruani jak di buahau.

³⁴Ui, kamu jemau ja'at. Manau ka adau kamu pacak ngiciakka setu diau iluak, amun kamu ja'at. Setu diau dikiciakka mulut, itula diau ngeluagh jak di ati.

³⁵Jemau iluak ngiciakka setu diau iluak, karnau atiau iluak. Jemau ja'at ngiciakka setu diau ja'at, karnau atiau ja'at.

³⁶Ingatkala masau aghi kiamat bilang katau diau nidau begunau mesti ditanggung-jawabka.

³⁷Karnau nurut kici'an kaba, kaba ka dibenaghka, mangku nurut kici'an kaba pulau, kaba ka diukum.”

³⁸Mangku adau guru agamau ngan jemau Parisi bekatau, “Pak guru, kami endak nginak Kaba mbuat tandau nyelia.”

³⁹“Alaka ja'at jemau mbak kini.” Katau Yesus ngan ughangtu, “Kapu dighi mintak tandau nyelia, anyautu nidau ka bulia lain jak di tandau nabi Yunus.

⁴⁰Nabi Yunus mendam dalam peghut ikan tigau aghi tigau malam. Luak itula pulau Anak Manusiau ka mendam dalam tana tigau aghi.

⁴¹Aghi kiamat jemau Niniwi ka diidupka serempak ngan jemau mbak kini, mangku ughangtu ka mburuakka jemau mbak kini, karnau ughangtu ngubai peremba'au jak di dusaunyau, masau ndengagh kici'an Yunus. Ngenian, diau adau di sini lebia besak jak di Yunus.

⁴²Aghi kiamat ratu jak di selatan ka diidupka serempak ngan jemau mbak kini, mangku diau ka mburuakka ughangtu, karnau ratu itu datang jak di ujung deniau endak ndengagh ajaghan Salumu diau bepengertian. Ngenian, diau adau di sini lebia besak jak di Salumutu.”

⁴³“Amun rua ja'at ngeluagh jak di jemau, diau ngidari ghimbau ndalak bada gheghadu, anyautu endiak dapat.

⁴⁴Mangku diau bekatau, ‘Aku endak ngulang agi ke ghuma diau kutinggalka tadi.’ La sampai di situ, diau nginak ghumatu nidau betunggu, la beresia ngan alap.

⁴⁵Mangku diau pegi ngajak tujua kantinau diau lebia ja'at agi. Rua itu masuak mendam di ghumatu, mangku kesudimannyau jemautu lebia pansan jak di senitu. Luak itu pulau setu diau ka tejadi ngan jemau mbak kini.”

⁴⁶Yesus gi ngiciak ngan jemau banyak itu, endu'Au ngan ading-beghadingAu datang betegak di luagh endak betemu ngan Diau.

⁴⁷Mangku adau jemau ngiciakka ngan Diau, kataunyau, “Mak Kaba ngan ading-beghading Kaba adau di luagh endak betemu ngan Kaba.”

⁴⁸Yesus nimbali ughangtu, katauNyau, “Sapau makKu ngan sapau ading-beghadingKu?”

⁴⁹Mangku Diau nunjuakka anak-buaHau ngan bekatau, “Inila makKu ngan ading-beghadingKu!

⁵⁰Karnau jemau diau ngerjauka kendak BapakKu di sergau, ughang itula ading-beghadingKu ngan makKu.”