Read Central Malay MATIUS 14 Bible Online

MATIUS 14 - Central Malay bible

MATIUS 14

¹Masau itu rajau Herudis nguasaui daira itu. Mangku diau ndengagh ceritau Yesus.

²Katau Herudis ngan anak-buahau, “La cetau Yuhanis Pembaptis la ngulang idup. Itula sebapau kuasauNyau luak itu ngerjauka gegalaunyautu.”

³Antak ka itu Herudis la ngajung nangkap Yuhanis, dighimpus ngan dimasuakka di jil. Herudis ngerjauka titu, karnau Herudias, bini Pilipus, kaka'au.

⁴Karnau Yuhanis negughi Herudis, kataunyau, “Nidau bulia dighi nika ngan Herudias.”

⁵Herudis endak mbunua Yuhanis, anyautu diau takut ngan jemau, karnau ughangtu nganggap Yuhanis nabi.

⁶Masau Herudis ulang taun, anak gadis Herudias nari di mukau mendahau. Tariannyau meriangka ati Herudis.

⁷Mangku Herudis bejanji ngan diau ngan sumpa setu diau enda'au ka dienjuakkanyau.

⁸Mangku karnau diajung endu'au, gadistu bekatau, “Aku mintak palak Yuhanis Pembaptis dienjuakka ngan aku mbak kini di dalam talam.”

⁹Ndengagh pinta'an itu Herudis bingung. Anyautu karnau la besumpa di mukau mendahau diajungau, supayau pinta'an gadistu dibulihi.

¹⁰Diau ngajung anak-buahau pegi ke jil endak mancung liagh Yuhanis.

¹¹Mangku palak Yuhanistu dibatak masuak, ditepiakka dalam talam, dienjuakka ngan gadis itu, mangku gadistu ngenjuakkanyau ngan endu'au.

¹²Udim itu anak-bua Yuhanis ngambiak mayatau mangku dikuburkanyau. Udim itu ughangtu pegi ngiciakkanyau ngan Yesus.

¹³Udim ndengagh ceritau itu, Yesus nayiak perawu ninggalka bada itu endak pegi sughang ke bada diau suni. Anyautu jemau banyak ndengagh itu, mangku ughangtu ninggalka dusunau pegi nuruti Yesus jalan daghat.

¹⁴Satu Yesus tughun jak di perawu ngan nginak jemau banyak itu, Diau sial ngan ughangtu, mangku dighadukaNyau jemau diau buidapan.

¹⁵Aghitu la petang, anak-buaHau njenguak Yesus, ngan bekatau, “Aghi la petang, bada ini suni. Ajungla jemau banyak ini pegi, mangku ughangtu pacak mbeli makanan di dusun.”

¹⁶“Nidau nanti ughangtu pegi.” Katau Yesus, “Kamunila ngenju'i ughang ini makan.”

¹⁷Anak-buaHau bekatau, “Diau adau di kami cuman limau bua ruti ngan ikan duau ikuak.”

¹⁸“Batak ke sini.” Katau Yesus.

¹⁹Mangku diajungAu jemau banyaktu duduak di ghumput. Udim itu Diau ngambiak limau bua ruti ngan duau ikuak ikan tadi, mangku ncungak ke langit sampai bedu'a beterimau-kasia, mangku dipiyak-piya'Au rutitu, dienjuakkaNyau ngan anak-buaHau, mangku diagiakanyau ngan jemau banyak itu.

²⁰Gegalau ughangtu makan enggut kenyang. Udim itu anak-buaHau nunggalka tigha ruti tadi, duau belas kinjagh penua.

²¹Jemau diau makan kekirau limau ribu ughang, lum temasuak jemau tinau ngan budak keciak.

²²Mangku Yesus ngajung anak-buaHau nayiak perawu nduluiNyau ke beghang sanau, penarau Diau ngajung jemau banyak baliak.

²³La udim diajungAu jemau banyaktu baliak, Yesus nayiak bukit endak bedu'a sughang. Aghi la malam, Diau sughang di situ.

²⁴Perawu anak-buaHau la jawua jak di tepi, dibanting-bantingka umbak, karnau angin belawanan jak di adapan.

²⁵Antak ka paghak siang Yesus datang njenguak anak-buaHau tadi bejalan di atas ayiak.

²⁶Satu anak-buaHautu nginak Diau bejalan di atas ayiak, ughangtu tegagau. “Itu antu!” Ughangtu tegauk-gauk karnau takut.

²⁷Anyautu Yesus ngiciak, katauNyau, “Tenangla ajau. Nidau nanti takut, ini Aku.”

²⁸Mangku Pitrus nimbal, kataunyau, “Amun Dighitu nyela nian, Tuhan, ajungla aku njenguak Dighi bejalan di atas ayiakni!”

²⁹Katau Yesus, “Mela, ke sini!” Mangku Pitrus tughun jak di perawu ngan bejalan di atas ayiak njenguak Yesus.

³⁰Anyautu satu teghasau angin deghas, diau penakut, diau mulai tebenak mangku tegauk, “Tulung aku, Tuhan!”

³¹Mangku Yesus cecepatan nyurungka tanganAu ngan ngecakkanyau, katauNyau, “Ui, kaba nidau percayau nian. Ngapau kaba asau-asau?”

³²La udim itu ughang duautu nayiak perawu, mangku angin mandak.

³³Mangku jemau diau adau di perawu nyemba Yesus, kataunyau, “Nyela nian, Dighila Anak Allah!”

³⁴La sampai di beghang danautu, ughangtu ndaghat di Genesarit.

³⁵Satu jemau di situ nginak, bansau diau datangtu Yesus, ughangtu nyiarka ceritau itu di gegalau dairatu. Mangku gegalau jemau buidapan dibatak guak Yesus.

³⁶Ughangtu mintak, supayau bulia nginggut bajuAu, empuak cuman ujungau ajau. Mangku gegalau jemau diau nginggutau ghadu.