Read Central Malay MATIUS 15 Bible Online

MATIUS 15 - Central Malay bible

MATIUS 15

¹Adau rumbungan jemau Parisi ngan guru agamau. Ughangtu datang jak di Yerusalim njenguak Yesus ngan betanyau ngan Diau,

²“Ngapau pulau anak-bua Kaba melanggar adat lembagau niniak puyang kitau? Ughangtu nidau bebasua tangan nurut peraturan antak ka makan.”

³Timbal Yesus, “Ngapau pulau kapu dighi melanggar perinta Allah, cuman karnau endak ngikuti adat lembagau kapu dighi?

⁴Allah bekatau, ‘Regauila enduak-bapak’, lagi ‘Jemau diau ndawaika pejadiau mesti diukum mati.’

⁵Anyautu kapu dighi ngajaghka, ‘Amun jemau bekatau ngan pejadiau, tanci diau semestiau dienjuakka ngan bak ngan mak la kuenjuakka ngan Allah,

⁶mangku jemautu nidau diajung agi meregaui mak ngan bak.’ Ngan carau luak itu kapu dighi nidau nyanauka katau Allah karnau adat lembagau niniak puyang kapu dighi.

⁷Kapu dighi jemau cak alim! Ngenian diau dikiciakka nabi Yesaya ceritau kapu dighitu,

⁸‘Luak ini katau Allah, bangsau ini meregaui Aku cuman di mulut, anyautu ati ughangtu nidau terupuak Aku.

⁹Melata ajau ughangtu nyemba Aku. Ajaghan diau ughangtu ajaghka katau manusiau ajau.’ ”

¹⁰Mangku Yesus mantau jemau banyak ngan bekatau, “Dengaghkala mangku ngerti!

¹¹Diau masuak ke mulut nidau ngaramka jemau. Anyautu diau ngeluagh jak di mulut, itula diau mbuat jemau aram.”

¹²Mangku anak-bua Yesus datang ngan betanyau ngan Diau, “Apu Dighi keruan, bansau jemau Parisi purik karnau Dighi ngiciak luak itu?”

¹³Yesus nimbal, “Bilang tanaman diau nidau ditanam Bapakku di sergau ka dicabut ngan akaghau.

¹⁴Nengkela ughangtu. Ughangtu luak jemau butau diau mapa jemau butau. Amun jemau butau mapa jemau butau, cetau ughang duautu ka telabua masuak pelubang.”

¹⁵Mangku Pitrus bekatau, “Tulung retika umpamau itu ngan kami.”

¹⁶Yesus nimbal, “Kamu lum pulau terti?

¹⁷Nidau keruan ngan kamu, bansau setu diau masuak ke dalam mulut tughun dalam busung, mangku ngeluagh agi?

¹⁸Anyautu setu diau ngeluagh jak di mulut asalau jak di ati. Itula diau mbuat jemau aram.

¹⁹Karnau jak di ati nimbul gegalau rupu'an ja'at, diau mbuat jemau mbunua, menaugawia ngan kerjau ja'at diau lain, maling, ngiciakka setu mbu'ung ngan nggelakka jemau.

²⁰Itula diau ngaramka jemau, ukan makan nidau bebasua tangan.”

²¹Udim itu Yesus ninggalka bada itu pegi ke daira Tirus ngan Sidun.

²²Mangku adau sughang tinau Kanaan datang njenguak Diau sampai bekatau, “Tuhan, anak Daud, sialkala aku. Anak gadisku diarung iblis. Diau nanggung nian.”

²³Yesus nidau nimbali tinau itu dikit kiala. Mangku anak-buaHau njenguak Diau ngan bekatau, “Ajungla tinau itu pegi. Diauni maju ngikut kitau ngan tegauk-gauk.”

²⁴Mangku Yesus bekatau ngan tinau tadi, “Aku diajung njenguak jemau sesat jak di jemau Israil ajau.”

²⁵Tinautu datang nunduak nyemba Diau sampai bekatau, “Tulung aku, Tuhan.”

²⁶Anyautu Yesus nimbal, “Nidau iluak ngambiak makanan budak keciak, disipatka ngan anjing.”

²⁷“Nyela, Tuhan,” katau tinautu, “Anyautu anjing pulau makan ghima diau tumban jak di mija tuanau.”

²⁸Mangku katau Yesus, “Ui, dighi percayau nian. Tejadila setu diau dighi kenda'i.” Masau itu pulau ana'au ghadu.

²⁹La udim ninggalka daira itu, Yesus pegi bejalan di tepi danau Galilia. Diau nayiak bukit mangku duduak di situ.

³⁰Banyak nianan jemau datang bererumbungan njenguak Diau mbatak jemau lumpua, jemau cingkung ngan kincut, jemau butau, jemau bisu ngan banyak diau buidapan lain, ditepiakkanyau guak keting Yesus, mangku dighaduiNyau gegalau ughangtu.

³¹Mangku jemau banyak diau adau di situ kemangan nginak jemau bisu pacak ngiciak, jemau cingkung ngan kincut ghadu, jemau lumpua pacak bejalan ngan jemau butau pacak nginak, mangku ughangtu ngagungka Allah jemau Israil.

³²Mangku Yesus mantau anak-buaHau ngan bekatau, “Aku sial nginak jemau banyak ini. La tigau aghi ughangtu ngikut Aku, mbak kini nidau bediau makanan. Aku enggup ngajung ughangtu baliak ngan lapagh, kalu tebandam di jalan.”

³³Anak-buaHau betanyau, “Luak manau kitau pacak dapat makan batan endak jemau banyak luak ini di bada diau sudut ini?”

³⁴Yesus betanyau, “Beghapau ruti adau ngan kamu?” “Tujua bua ruti,” timbal ughangtu, “Ngan bebeghapau ikan keciak.”

³⁵Mangku Yesus ngajung jemau banyak itu duduak di tana.

³⁶Udim itu Diau ngambiak tujua ruti ngan ikan tadi, beterimau-kasia ngan Allah, dipiyak-piya'Au, dienjuakkaNyau ngan anak-buaHau, mangku anak-buaHautu ngagiakanyau ngan jemau banyak itu.

³⁷Gegalau ughangtu makan enggut kenyang. Mangku tigha ruti ditunggalka, tujua kinjagh banya'au.

³⁸Jemau lanang ajau diau makan masau itu empat ribu ughang, lum temasuak jemau tinau ngan budak keciak.

³⁹Udim itu Yesus ngajung jemau banyak itu baliak. Diau nayiak perawu pegi ke daira Magadan.