Read Central Malay MATIUS 16 Bible Online

MATIUS 16 - Central Malay bible

MATIUS 16

¹Adau bebeghapau jemau Parisi ngan jemau Saduki datang njenguak Yesus endak ncubaui Diau. Ughangtu mintak, supayau Diau mbuat tandau nyelia batan endak mbuktika, bansau Diau datang jak di Allah.

²Yesus nimbal, “Amun matau-aghi la umban ngan langit abang, kapu dighi bekatau, ‘Aghi ka iluak.’

³Mangku akap-akap, amun langit ghenung, kapu dighi bekatau, ‘Aghi ini ka ujan.’ Langit pacak kapu dighi bidaka, tandau saman nidau pacak kapu dighi keruani.

⁴Alaka ja'at ngan jeditau jemau mbak kini. Kapu dighi mintak Aku mbuat tandau nyelia. Anyautu kamu nidau ka dienjuakka sutiak kia tandau nyelia, lain jak di tandau nabi Yunus.” Udim ngiciak luak itu, Yesus pegi ninggalka ughangtu.

⁵Masau anak-bua Yesus nyembeghang danau, ughangtu nidau teghingat mbatak ruti.

⁶Yesus bekatau ngan ughangtu, “Sepepadaula ngan bejagaula ngan ghagi jemau Parisi ngan jemau Saduki.”

⁷Ndengagh titu, ughangtu mulai ngiciak sughang ngan diau lain, “Diau ngiciak luak itu, karnau kitau nidau mbatak ruti.”

⁸Yesus keruan setu diau ughangtu kiciakka, Diau bekatau, “Ngapau kamu ngiciakka nidau bediau ruti? Kamu nidau percayau nian.

⁹Masia lum terti kamu? Apu kamu nidau teghingat agi limau ruti batan endak limau ribu ughang, beghapau kinjagh tigha ruti diau kamu tunggalka?

¹⁰Luak manau pulau ngan tujua ruti batan endak empat ribu ughangtu, beghapau kinjagh tigha kamu tunggalka?

¹¹Ngapau kamu nidau terti, bansau Aku ukanau ngiciakka ruti ngan kamu? Diau Kukatauka, ‘Sepepadaula ngan ghagi jemau Parisi ngan jemau Saduki.’ ”

¹²Mangku anak-buaHau pulau ngerti, bansau Yesus ngajung ughangtu sepepadau ukanau ngan ghagi ruti, tapitu ngan ajaghan jemau Parisi ngan jemau Saduki.

¹³Yesus la sampai di daira Kaisaria Pilipi. Di situ Diau betanyau ngan anak-buaHau, “Katau jemau, sapau Anak Manusiau?”

¹⁴Ughangtu nimbal, “Adau diau bekatau, ‘Yuhanis Pembaptis.’ Adau diau ngiciakka, ‘Elia.’ Adau pulau diau bekatau, ‘Yeremia’ ngan ‘Sughang jak di nabi.’ ”

¹⁵Mangku Yesus betanyau ngan ughangtu, “Pendapat kamutu, sapau Akuni?”

¹⁶Simun Pitrus nimbal, “Dighila Almasih, Rajau Penyelamat, Anak Allah diau idup.”

¹⁷Katau Yesus ngan diau, “Riangla kaba Simun anak Yuna, karnau ukan manusiau diau ngiciakka titu ngan kaba, tapitu Bapakku diau di sergau.

¹⁸Ingatkala, kabatu Pitrus, mangku di pucuak batu pelapiak ini Aku ka negakka umatKu. Diau nidau pacak dikalaka, empuak maut.

¹⁹Kaba ka dienjuakka kunci sergau. Setu diau ka kaba tegahi di deniauni ka ditegahi pulau di sergau. Setu diau ka kaba benaghka di deniauni ka dibenaghka pulau di sergau.”

²⁰Mangku Yesus nidau nian ngajung ughangtu ngiciakka ngan jemau, bansau Diaula Rajau Penyelamat.

²¹Jak masau itu Yesus mulai ngiciakka ngan anak-buaHau, bansau Diau mesti pegi ke Yerusalim, mangku meghasauka banyak penanggungan jak di pengulu-pengulu, imam-imam bepangkat tinggi ngan guru-guru ukum Taurat. Diau mesti dibunua, mangku la duau malam Diau ka idup agi.

²²Mangku Pitrus ngajung Yesus ke peridingannyau, nengul Diau, kataunyau, “Tuhan, Allah njawuaka titu! Jangan titu sampai tejadi ngan Dighi.”

²³Yesus nulia mangku bekatau ngan Pitrus, “Laratla iblis! Kaba ngalangi Aku. Rupu'an kabatu rupu'an manusiau, ukan rupu'an Allah.”

²⁴Mangku Yesus ngiciak ngan anak-buaHau, katauNyau, “Bilang jemau diau endak ngikut Aku jangan ndalak jalan idup batan endak diau sughang. Diau mesti mikul salipau, mangku maju ngikut Aku.

²⁵Karnau jemau diau endak ngilakka nyawaunyau ka kelengitan nyawaunyau. Jemau diau kelengitan nyawaunyau karnau Aku ka selamat.

²⁶Tuapau untungau, amun jemau bulia gegalau deniau njadi retaunyau, anyautu diau ka benasau? Tuapau diau pacak ditukarka batan endak nyawaunyau?

²⁷Karnau Anak Manusiau ka datang agi nanti ngan kuasau Bapa'Au, dikantini malaikat-malaikatAu. Masau itu Diau ka mbalas bilang jemau nurut kerjaunyau.

²⁸Keruanila, jak di kamuni di sini adau diau nidau ka mati, amun lum nginak Anak Manusiau datang luak rajau.”