Read Central Malay MATIUS 18 Bible Online

MATIUS 18 - Central Malay bible

MATIUS 18

¹Masau itu anak-bua Yesus njenguak Diau ngan betanyau, “Sapau diau penting sekali di guak umat Allah?”

²Yesus mantau sughang budak keciak, diajungAu betegak di adapan ughangtu,

³mangku bekatau, “Percayaula kamu nidau pacak njadi umat Allah, amun nidau beghuba njadi luak budak keciak.

⁴Jemau diau ngensianka diriau, njadi luak budak keciak ini, diaula penting sekali di guak umat Allah.

⁵Jemau diau nerimau sughang budak keciak luak diauni karnau Aku diautu nerimau Aku.”

⁶“Jemau diau nyesatka sala sughang jak di budak keciak diau percayau ini, iluakla digerintungka batu besak di liaghau, mangku dicapakka ke laut.

⁷Celakaula deniau ini ngan gegalaunyau diau nyesatka jemau. Nyela, pencubauan cengki ka adau, anyautu celakaula jemau diau nyebapkanyau.

⁸Mangku amun tangan ngan keting kaba mbuat kaba bedusau, tetakla ngan capakkala. Iluakla kaba idup ngan tangan ngan keting sebela sangkan dicapakka dalam api nerakau ngan duau tangan ngan duau keting.

⁹Amun matau kaba mbuat kaba bedusau, cungkilla ngan capakkala matau itu. Iluakla kaba idup ngan Allah ngan sebela matau sangkan dicapakka dalam api nerakau ngan duau matau.

¹⁰Ingatkala, mangku kamu jangan nggelakka sala sughang jak di budak keciak ini, karnau malaikatau maju adau di adapan BapakKu di sergau.

¹¹Karnau Anak Manusiau datang endak nyelamatka jemau diau sesat.”

¹²“Tuapau pendapat kamu? Misalau adau sughang diau adau seratus ikuak bebiri, mangku lengit sikuak, tuapau diau ka dibuat jemau itu? Cengki diau ka ninggalka bebiriau diau sembilan pulua sembilan itu di bukit, mangku pegi ndala'i diau lengit itu.

¹³Mangku amun bebiritu la dapat agi, percayaula, riangla diau karnau bebiri diau lengit tadi sangkan bebiri diau sembilan pulua sembilan diau nidau lengit.

¹⁴Luak itu pulau Bapak kamu di sergau enggup sala sughang jak di budak keciak ini benasau.”

¹⁵“Misalau kantin kaba besala ngan kaba, tegughila diau nidau bediau jemau ndengagh. Amun diau nurut kici'an kaba, mangku kaba la buasil mbatak diau ngulang njenguak Allah.

¹⁶Amun diau enggup, batakla sughang apu duau ughang agi, karnau dalam Injil ditulis, ‘Senidau-nidaunyau adau duau tigau ughang batan endak mbuktika jemau besala.’

¹⁷Amun diau enggup nerimau kici'an jemau tadi, kiciakkala ngan kumpulan jemau Keristen. Amun diau pulau nidau nerimau kici'an ughangtu, anggapla diau luak jemau diau nidau keruan Allah ngan tukang tagia cuki.

¹⁸Keruanila, setu diau kamu larang di deniau ini ka dilarang pulau di sergau. Mangku setu diau kamu benaghka di deniau ka dibenaghka pulau di sergau.

¹⁹Keruanila pulau, amun duau ughang jak di kamu di deniauni la sepakat endak mintak tuapau kila, pinta'an itu ka dibulihi BapakKu diau di sergau.

²⁰Karnau di manau duau tigau ughang betunggal bedu'a dalam namauKu, Aku adau di guak ughangtu.”

²¹Mangku Pitrus njenguak Yesus ngan betanyau, “Tuhan, amun kantinku besala ngan aku, enggut beghapau kali aku mesti ngabiska salahau? Apu tujua kali?”

²²Yesus nimbal, “Nidau, ukan tujua kali, tapitu tujua pulua kali tujua kali.

²³Karnau amun Allah merinta, umpamau sughang rajau diau endak mbirisi utang anak-buahau.

²⁴Satu diperisau, diadapka ngan diau sughang anak-buahau diau beghutang ratusan juta.

²⁵Karnau jemautu nidau pacak mbayighi utangau, mangku rajau merintaka, supayau diau dijual serempak ngan anak-biniau ngan gegalau retau-bendaunyau batan pembayigh utangautu.

²⁶Anak-buahau itu nunduak sampai di tana nyemba rajau. ‘Tunggu kudai, Rajau!’ kataunyau, ‘Utangku ka kubayighi galau.’

²⁷Mangku rajautu sial ngan anak-buahau tadi, mangku diau dibuliaka baliak, utangau diabiskanyau galau.

²⁸Anyautu anak-buahau itu pegi jak di rajau tadi, mangku betemu ngan sughang kantinau, diau beghutang ngan diau cuman puluan ribu, dikecakkanyau, dipicitau kantinautu, kataunyau, ‘Bayighila galau utang kaba ngan aku!’

²⁹Mangku kantinautu nunduak ngiciak ngan diau, ‘Tunggu kudai!’ kataunyau, ‘Utangku ka kubayighi galau.’

³⁰Anyautu diau nidau nerimaunyau, mangku diserakanyau kantinau tadi di jil enggut utangau dibayighi galau.

³¹Ngina'autu kantin-kantin diau lainau bingung nian, mangku dikiciakkanyau ngan rajau setu diau dibuatautu.

³²Rajau itu ngajung mantau anak-buahau tadi, mangku ngiciakka ngan diau, ‘Ui, kabani ja'at nianan. Gegalau utang kaba la kuabiska galau, nidau mintak dibayighi, karnau kaba mintak ngan aku.

³³Sepantasau kaba nyialka kantin kaba, luak aku la nyialka kaba.’

³⁴Mangku rajautu mara nian ngan anak-buahautu, dimasuakkanyau ke jil enggut gegalau utangau dibayighinyau galau.”

³⁵Mangku Yesus ngudimi ceritaunyau ngan katau ini, “Luak itu pulau BapakKu di sergau ka mbuati kamu, amun kamu nidau ngabiska sala kantin kamu nian.”