Read Central Malay MATIUS 19 Bible Online

MATIUS 19 - Central Malay bible

MATIUS 19

¹La udim ngiciakka gegalaunyautu, Yesus ninggalka Galilia pegi ke Yudia di beghang ayiak Yurdan.

²Jemau banyak ngikut Diau, mangku Diau meghadui ughangtu di situ.

³Mangku jemau Parisi datang endak nguji Diau ngan betanyau, “Apu bulia jemau nyagha'i biniau ngan kenda'au ajau?”

⁴Yesus nimbal, “Apu kapu dighi lum mbacau dalam Injil, bansau empai penembai Allah mbuat manusiau, dibuatAu lanang ngan tinau.

⁵Mangku katau Allah, ‘Itula sebapau jemau lanang ka ninggalka enduak-bapa'au endak seghundak ngan biniau, mangku ughang duautu njadi sutiak.’

⁶Mangku ughangtu ukan agi duau tapitu sutiak. Karnau itu setu diau disatuka Allah nidau bulia disagha'i manusiau.”

⁷Mangku jemau Parisi betanyau agi, “Amun luak itu, ngapau Musa ngajung jemau ngenjuakka surat saghak ngan biniau, amun biniau disagha'i?”

⁸Katau Yesus, “Musa mbuliaka kamu nyagha'i bini, karnau kamu segau diajagh. Anyautu jak di penembai nidau luak itu.

⁹Dengaghkala ini, jemau diau nyagha'i biniau, empuak biniautu nidau bebuat ja'at, mangku nika ngan tinau lain, jemautu menaugawia.”

¹⁰Mangku anak-buaHau bekatau, “Amun luak itu ceritau jemau belaki bebini, iluakla nidau nanti nika.”

¹¹Yesus nimbal, “Nidau gegalau jemau pacak nerimau kici'an ini, cuman jemau diau dienjuakka Allah pengertian.

¹²Adau jemau nidau pacak nika, karnau lahir luak itu. Adau pulau diau nidau pacak nika, karnau dibuat jemau lain luak itu. Adau pulau diau milia nidau endak nika, mangku pacak bekerjau batan endak Allah. Jemau diau pacak nerimau ajaghan ini, nengkela diau nerimaunyau.”

¹³Mangku adau jemau diau mbatak anak-ana'au diau gi keciak njenguak Yesus, supayau Diau natap budak-budak keciaktu ngan ndu'aka ughangtu. Anyautu anak-buaHau marai ughangtu.

¹⁴Anyautu Yesus bekatau, “Nengkela budak-budak keciak datang njenguak Aku. Jangan dialangi, karnau jemau luak inila Allah pacak njadi rajau dalam idupau.”

¹⁵Mangku Diau nepiakka tanganAu di palak budak keciaktu, didu'akaNyau. Mangku Diau pegi jak di situ.

¹⁶Adau sughang jemau datang njenguak Yesus ngan betanyau, “Pak guru, kerjau diau iluak luak manau diau mesti kukerjauka, mangku aku bulia idup selelamaunyau?”

¹⁷Timbal Yesus, “Ngapau kaba betanyau ngan aku kerjau diau iluak? Cuman sutiak diau iluak. Amun kaba endak idup, kaba mesti nuruti perinta Allah.”

¹⁸Jemau itu betanyau, “Perinta diau manau?” Yesus nimbal, “Jangan mbunua, jangan menaugawia, jangan maling, jangan mbu'ung,

¹⁹regauila enduak-bapak kaba, mangku sayangila kantin kaba luak kaba nyayangi diri kaba.”

²⁰“Gegalaunyautu la kuturuti.” Katau jemau itu, “Tuapau agi?”

²¹Yesus bekatau, “Amun kaba endak njadi iluak nian, pegila, jualkala gegalau retau kaba, enjuakkala tanciautu ngan jemau serik, mangku kaba ka bulia retau di sergau. La udim itu datangla ke sini ngikut Aku.”

²²Ndengagh kici'anNyautu jemau mudau itu pegi ngan bingung, karnau diau kayau nian.

²³Mangku Yesus ngiciak ngan anak-buaHau, “KatauKuni benagh, segau nian jemau kayau nerimau Allah njadi rajau dalam idupau.

²⁴Ini pulau diau endak Kukiciakka ngan kamu, murala sikuak untau lalu wuan tebuak jaghum sangkan jemau kayau masuak sergau.”

²⁵Satu anak-buaHau ndengagh kici'an Yesus itu, ughangtu kemangan nian ngan bekatau, “Amun luak itu, sapau diau pacak selamat?”

²⁶Yesus nimbal, “Amun manusiau, nidau ka adau. Anyautu amun Allah, gegalaunyau ka adau.”

²⁷Mangku Pitrus bekatau ngan Yesus, “Kina'ila, kamini la ninggalka gegalau retau kami endak ngikut Dighi. Tuapau diau ka dienjuakka ngan kami?”

²⁸Katau Yesus ngan ughangtu, “Percayaula, di deniau diau empai, amun Anak Manusiau ka duduak di kerusi rajau, kamu diau ngikut Aku ka duduak pulau di duau belas kerusi mangku ngukum duau belas jungku jemau Israil.

²⁹Jemau diau ninggalka ghumahau, ading-beghadingau, pejadiau, anak-ana'au ngan umaunyau karnau Aku, jemautu ka nerimau agi lipat gandau, mangku diau ka nerimau idup selelamaunyau.

³⁰Anyautu banyak jemau diau dulu ka njadi mendian, jemau diau mendian ka njadi dulu.”