Read Central Malay MATIUS 2 Bible Online

MATIUS 2 - Central Malay bible

MATIUS 2

¹Yesus lahir di Betlihim, timpau Herudis njadi rajau di daira Yudia. Yesus la adau, adau jemau ahli bintang jak di sebela matau-aghi idup datang ke Yerusalim.

²La sampai di situ ughangtu betanyau, kataunyau, “Di manau Kupiak diau empai adau batan Rajau jemau Yahudi? Kami la nginak bintangAu di sebela matau-aghi idup, mangku kami datang endak nyemba Diau.”

³Satu rajau Herudis ndengagh ceritau itu, diau tegagau nian. Luak itu pulau gegalau jemau di Yerusalim.

⁴Mangku diajungau gegalau imam bepangkat tinggi ngan guru ukum Taurat betunggal, mangku diau betanyau, “Di manau Rajau diau dijanjika Allah ka lahir?”

⁵Timbal ughangtu, “Di kuta Betlihim di daira Yudia, karnau luak inila ditulis sughang nabi,

⁶‘Kaba Betlihim di daira Yudia, kaba ukan diau keciak sekali di antarau kuta Yehuda, karnau jak di kabanila ka datang sughang pengulu diau ka njagaui umatKu Israil.’ ”

⁷La udim ndengagh gegalaunyautu Herudis mantau ahli bintang itu ngan carau diam-diam, mangku ngan neghagi diau betanyau ngan ughangtu, kebilau pastiau bintangtu mulai kina'an.

⁸Mangku diau ngajung ughangtu ke Betlihim, kataunyau, “Pegila, dala'i keruani nian Kupiak itu. Mangku amun la betemu, kiciakka ngan aku, mangku aku pulau pegi nyemba Diau.”

⁹La udim ndengagh titu, ughangtu pegi. Di tenga jalan bintang diau tekinak di sebela matau-aghi idup senitu ndului ughangtu, mangku mendam di tipatan bada Kupiak itu.

¹⁰Alaka riangau ughangtu nginak bintang itu.

¹¹Ughangtu masuak ke ghuma, nginak Kupiak itu ngan endu'Au Maria. Ughangtu nunduak nyemba Kupiaktu, dibukakkanyau bada retau bendaunyau, dienjuakkanyau emas, keminyan ngan damagh ghum.

¹²Mangku ughangtu baliak ke nenggeriau wuan jalan lain, karnau Allah la ngiciakka ngan ughangtu dalam mimpi, supayau jangan ngulang njenguak Herudis.

¹³La udim ditinggalkanyau jemau ahli bintang tadi, Yusup tekinak malaikat Tuhan dalam mimpi. Malaikattu bekatau, “Bangunla kaba, bata'ila Kupiak ini ngan endu'tu, mangku pegila nyingkir ke Mesir. Mendamla di situ, enggut aku ngulang ngiciak agi ngan kaba, karnau rajau Herudis ndala'i Kupiak ini endak mbunuAu.”

¹⁴Mangku malam itu pulau Yusup bangun, dibata'inyau Kupiaktu ngan endu'Au mangku pegi nyingkir ke Mesir.

¹⁵Diau mendam di situ, enggut rajau Herudis mati. Luak itula ditepati setu diau la dikiciakka Tuhan ngan nabiAu, “Aku mantau AnakKu jak di Mesir.”

¹⁶Satu rajau Herudis keruan, bansau ahli bintang tadi la nipukanyau, diau mara kematila. Mangku diau merintaka endak mbunua gegalau budak keciak di Betlihim ngan ngepungannyau diau beumur duau taun ke bawa. Itu sesuai ngan masau bintangtu kina'an luak diau dikiciakka ahli bintangtu.

¹⁷Luak itula ditepati setu diau la dikiciakka nabi Yeremia,

¹⁸“Di Rama tedengagh tangis berandaian. Rahil merandaika anak-ana'au, enggup dipuji, karnau ana'au la abis galau.”

¹⁹Rajau Herudis la mati, Yusup tekinak agi malaikat Tuhan dalam mimpi, kataunyau,

²⁰“Bangunla, batakla Budak keciak ini ngan endu'Au, baliakla ke Israil, karnau jemau diau endak mbunua Budak keciak ini la mati.”

²¹Mangku Yusup bangun, dibata'inyau Budak keciaktu ngan endu'Au, mangku baliak ke Israil.

²²Anyautu Yusup ndengagh, bansau Arkelaus anak Herudis nggentika ba'au njadi rajau di nenggeri Yudia, mangku diau takut pegi ke situ. Diau pegi ke daira Galilia, karnau diau dapat petunjuak Tuhan dalam mimpi.

²³La sampai di Galilia diau mendam di kuta Nasarit. Luak itula ditepati katau Allah diau la dikiciakka nabi, “Diau ka dikiciakka jemau Nasarit.”