Read Central Malay MATIUS 21 Bible Online

MATIUS 21 - Central Malay bible

MATIUS 21

¹Yesus ngan anak-buaHau la pasigh ngan Yerusalim mangku sampai di Betpagi di Bukit Saitun. Mangku Yesus ngajung duau ughang anak-buaHau

²ngan bekatau, “Pegila ke dusun diau di adapan kamutu. Di situ kamu ka nginak sikuak keledai tetambang ngan ana'au adau di pasighau. Legha'ila keledaitu, mangku batak ke sini.

³Amun adau jemau betanyau ngan kamu, kiciakkala ngan jemaunyau, ‘Tuhan endak makaiau.’ Mangku diau ka cepat ngenangka kamu mbata'au.”

⁴Luak itu ditepati setu diau dikiciakka nabi,

⁵“Kiciakkala ngan Siun, ‘Rajau kamu datang njenguak kamu. Diautu iluak atiAu ngan nayiak keledai, anak keledai diau mudau.’ ”

⁶Duau ughang anak-buaHau tadi pegi, mangku ngerjauka setu diau la dikiciakka Yesus ngan ughangtu.

⁷Ughang duautu mbatak keledaitu ngan ana'au. Ughangtu ngalasi belakang keledaitu ngan bajuau, mangku Yesus nayiak.

⁸Banyak jemau diau di situ mbentangka bajuau di jalan. Adau pulau diau neta'i daun-daunan, mangku ditepiakka di jalan.

⁹Jemau banyak diau bejalan di adapan ngan di belakang Yesus tegauk-gauk, “Idup, Anak Daud! Tepujila diau datang atas namau Tuhan. Tepujila Allah diau Mahatinggi!”

¹⁰Mangku masau Yesus dang masuak Yerusalim, gegalau kuta itu ganau. Jemau betanyau, “Sapau ini?”

¹¹“Diauni nabi Yesus jak di Nasarit di Galilia.” Timbal jemau banyak diau ngikut Yesus.

¹²Mangku Yesus masuak ke Ghuma Allah ngan mulai ngisitka gegalau jemau diau bedagang di tengalaman Ghuma Allah. Mija-mija tukang nukar tanci ngan bangku tukang njual burung darau dikangkangkaNyau,

¹³mangku dikiciakkaNyau ngan ughangtu, “Di Injil Allah bekatau, ‘GhumaKu ghuma du'a.’ Anyautu kamu njadikanyau saghang bandit.”

¹⁴Jemau butau ngan jemau lumpua datang njenguak Yesus di Ghuma Allah, mangku dighadukaNyau.

¹⁵Anyautu imam-imam bepangkat tinggi ngan guru-guru ukum Taurat mara nian nginak gegalau tandau nyelia diau dibuatAutu, karnau budak-budak keciak besurak di Ghuma Allah, “Idup, Anak Daud!”

¹⁶Ughangtu bekatau ngan Yesus, “Kaba ndengagh setu diau dikiciakka ughangtu?” Katau Yesus, “Au, Aku ndengagh. Apu lum kapu dighi mbacau ayat ini, ‘Budak-budak keciak la diajagh batan endak ngiciakka pujian diau ngenianau.’ ”

¹⁷La udim itu Yesus ninggalka ughangtu, mangku ngeluagh jak di kuta itu pegi ke Betania. Diau temalam di situ.

¹⁸Pagi di aghiau akap-akap Yesus ngulang ke kuta. Masau itu Diau lapagh.

¹⁹Diau nginak sebatang aghau di tepi jalan, dijengu'Au batang aghau itu. Diau nidau tekinak sebua kia buahau, cuman daunau ajau. Mangku Diau bekatau ngan batang aghautu, “Kaba nidau ka bebua agi selelamaunyau.” Mangku batang aghautu layu.

²⁰Anak-bua Yesus nginak setu diau tejaditu, ughangtu kemangan nian. “Luak manau batang aghau itu pacak mati bekejut gegalaunyau?” katau ughangtu.

²¹“Ngenian,” katau Yesus, “Amun kamu percayau ngan nidau asau-asau, kamu pacak ngerjauka setu diau la kukerjauka ngan batang aghau ini. Ukan itu ajau, kamu pulau pacak bekatau ngan bukit ini, ‘Tuangkatla ngan tecapakla ke dalam laut!’ Mangku titu ka tejadi.

²²Tuapau ajau diau kamu pintak dalam du'a kamu ka nerimaunyau, amun kamu percayau nian.”

²³La udim itu Yesus ngulang agi ke Ghuma Allah mangku masuak ngan ngajagh di situ. Diau dang ngajagh, imam-imam bepangkat tinggi ngan tuau-tuau jemau Yahudi datang njenguak Diau ngan betanyau, “Pakai kuasau apau Kaba ngerjauka gegalaunyautu? Mangku sapau ngenjuakkanyau ngan Kaba?”

²⁴Yesus nimbal, “Aku pulau endak betanyau ngan kapu dighi. Amun kapu dighi nimbal, Aku pulau ka ngiciakka ngan kapu dighi, ngan kuasau sapau Aku ngerjauka gegalaunyau ini.

²⁵Baptisan Yuhanis itu asalau jak di manau? Apu jak di Allah, apu jak di manusiau?” Ughangtu buijau, “Amun kitau kiciakka, ‘Asalau jak di Allah’, Diau ka bekatau, ‘Ngapau kapu dighi nidau percayau ngan diau?’

²⁶Anyautu amun kitau kiciakka, ‘Asalau jak di manusiau,’ kitau takut ngan jemau banyak, karnau gegalau ughangtu nganggap Yuhanistu sughang nabi.”

²⁷Mangku ughangtu nimbal, “Kami nidau keruan.” Mangku Yesus bekatau ngan ughangtu, “Amun luak itu, Aku enggup pulau ngiciakka ngan kapu dighi ngan kuasau sapau Aku ngerjauka gegalaunyau ini.”

²⁸“Mangku luak manau pendapat kapu dighi?” katau Yesus. “Adau sughang bak, anak lanangau adau duau ughang. Jemau itu njenguak ana'au diau tuau ngan bekatau, ‘Nak, pegila bekerjau di kebun anggur saghini.’

²⁹‘Jadi, bak.’ katau anak itu. Anyautu diau nidau pegi.

³⁰Mangku jemau tadi njenguak ana'au diau bunsu ngan ngiciak luak itu pulau. Katau ana'autu, ‘Aku enggup.’ Anyautu rupu'annyau beghuba, mangku diau pegi ke kebun.

³¹Sapau jak di duau ughangtu ngerjauka kendak bapa'au?” Imam itu ngan tuau-tuau jemau Yahudi nimbal, “Diau bunsu.” Mangku Yesus bekatau ngan ughangtu, “Percayaula, dulula tukang tagia cuki ngan tinau pelacur ka njadi umat Allah sangkan kapu dighi.

³²Karnau Yuhanis Pembaptis datang nunjuakka ngan kapu dighi carau idup diau dikenda'i Tuhan. Anyautu kapu dighi enggup percayau ngan ajaghannyau. Tapitu tukang tagia cuki ngan tinau pelacur percayau ngan diau. Empuak kapu dighi la nginak gegalaunyau itu, kapu dighi nidau kila ngubai rupu'an ngan nidau percayau ngan diau.”

³³“Dengaghkala ceritau ini agi,” katau Yesus. “Adau sughang diau mbukak kebun anggur, mangku dikandangau, digalikanyau lubang batan bada neghit anggur, ditegakka bada njagaunyau di kebun tadi. Udim itu diparauka kebuntu ngan bebeghapau jemau parauan. Mangku diau pegi ke nenggeri lain.

³⁴Laka pangkaunyau mutigh anggur, jemau ngempu kebun tadi ngajung anak-buahau pegi njenguak jemau parauan tadi endak mintak bagian asil kebunau.

³⁵Anyautu jemau parauantu nangkap anak-bua tadi. Diau sughang dibaduki, diau lain dibunua, diau lain agi disipati ngan batu.

³⁶Mangku jemau ngempu kebuntu ngajung anak-buahau diau lain lebia banyak agi. Anyautu ughangtu dibuati ngan carau diau semegi ngan kantinau tadi.

³⁷Mangku jemau ngempu kebuntu ngajung ana'au njenguak jemau parauan tadi, rupu'annyau, ‘Cengki anakku ka diregaui ughangtu.’

³⁸Anyautu satu jemau parauan nginak anak jemau ngempu kebuntu, ughangtu ngiciak sughang ngan diau lain, ‘Diautu behak ngempu kebun ini nanti. Mela kitau bunua diau, mangku kebunni njadi hak kitau.’

³⁹Mangku ana'autu ditangkap, dicapakka keluagh kebun, udim itu dibunuau.”

⁴⁰Mangku Yesus betanyau, “Amun jemau ngempu kebuntu la baliak, tuapau ka dibuatau ngan jemau parauan itu?”

⁴¹Ughangtu nimbal, “Cengki diau ka mbunua jemau ja'at tadi, mangku marauka kebunau ngan jemau lain diau endak ngenjuakka bagian asilau, amun la pangkaunyau.”

⁴²Mangku Yesus bekatau ngan ughangtu, “Apu kapu dighi lum kekela mbacau ayat ini, ‘Batu diau dicapakka tukang negak ghuma, la njadi pelapiak tiang. Inila kerjau Tuhan, setu diau nyelia batan endak kitau.’ ”

⁴³Katau Yesus agi, “Gegalau hak njadi umat Allah ka diambiak jak di kapu dighi. Hak itu ka dienjuakka ngan bangsau lain diau ka ngerjauka perinta Allah. [

⁴⁴Jemau diau tumban di batu itu ka pata, mangku jemau diau ditinggang batu itu ka lulua.”]

⁴⁵Imam-imam bepangkat tinggi ngan jemau Parisi ndengagh cuntau ceritau Yesus tadi, mangku ughangtu keruan, Diau ngiciakka ughangtu.

⁴⁶Itula sebapau ughangtu beusaha endak nangkap Diau. Anyautu ughangtu takut ngan jemau banyak, karnau jemau banyaktu nganggap Yesus sughang nabi.