Read Central Malay MATIUS 23 Bible Online

MATIUS 23 - Central Malay bible

MATIUS 23

¹Mangku Yesus ngiciak ngan jemau banyak ngan anak-buaHau, katauNyau,

²“Guru-guru ukum Taurat ngan jemau Parisi dapat kuasau meretika ukum Taurat.

³Itula sebapau kamu mesti na'ati ngan nuruti gegalau ajaghan ughangtu. Anyautu jangan kamu ngerjauka setu diau ughangtu kerjauka, karnau ughangtu nidau ngerjauka setu diau diajaghkanyau.

⁴Ughangtu nuntut setu diau segau ngan ngenjuakka peraturan diau segau, anyautu dikit kia ughangtu nidau nulung jemau ngerjaukanyau.

⁵Gegalaunyau diau dikerjauka ughangtu cuman endak dikinak jemau ajau. Ughangtu makai tali sembayang diau libagh ngan ghambu baju diau panjang.

⁶Ughangtu galak duduak di bada diau iluak di jamuan ngan di mukau dalam ghuma sembayang.

⁷Ughangtu galak diregaui di pekan ngan dikiciakka ‘pak guru’.

⁸Tapitu kamu jangan endak dipantau ‘pak guru’, karnau guru kamu cuman sughang, mangku gegalau kamu anak-buaHau.

⁹Mangku jangan kamu mantau sughang kia ‘bapak’ di deniau ini, karnau bapak kamu cuman sughang, Bapak diau adau di sergau.

¹⁰Jangan pulau kamu endak dikiciakka ‘pengulu’, karnau pengulu kamu cuman sughang, diautu Rajau Penyelamat.

¹¹Jemau diau endak njadi pengulu jak di kamu, jemautu mesti njadi luak anak-bua.

¹²Jemau diau ninggika diriau ka dimaluka, mangku jemau diau ngensian ka diregaui.”

¹³“Celakaula kapu dighi, ai guru-guru ukum Taurat ngan jemau Parisi, kapu dighi jemau cak alim. Kapu dighi ngalangi jemau njadi umat Allah. Kapu dighitu nidau ka njadi umat Allah, mangku jemau lain diau endak nidau kapu dighi ajung.

¹⁴Celakaula kapu dighi, ai guru-guru ukum Taurat ngan jemau Parisi, kapu dighi jemau cak alim. Kapu dighi nipuka randau-randau ngan ngambiak ghumahau, mangku mbunika perembak kapu dighi ngan bedu'a panjang-panjang. Karnau itu ukuman kapu dighi ka beghat.

¹⁵Celakaula kapu dighi, ai guru-guru ukum Taurat ngan jemau Parisi, kapu dighi jemau cak alim. Kapu dighi pegi jawua-jawua nyembeghang laut ngan ngidari daghatan cuman endak dijadika sughang ajau anak-bua kapu dighi. La udim diau njadi anak-bua kapu dighi, dijadika anak nerakau diau lebia ja'at jak di kapu dighi.

¹⁶Celakaula kapu dighi, ai pengulu-pengulu butau. Kapu dighi ngajagh luak ini, ‘Amun jemau besumpa demi Ghuma Allah, sumpa itu nidau nanti ditepatinyau. Anyautu amun besumpa demi emas Ghuma Allah, diau mesti nepati sumpahautu.’

¹⁷Ai, kapu dighi jemau bigal diau butau. Manau diau penting, apu emasau apu Ghuma Allah diau njadika emastu suci?

¹⁸Lagi ‘Amun jemau besumpa demi mija bada bekerban, sumpa itu nidau nanti ditepatinyau. Anyautu amun besumpa demi kerban diau adau di mija bada bekerbantu, jemautu mesti nepati sumpahau.’

¹⁹Ai, kapu dighi jemau butau. Manau diau penting, apu kerban apu mija bada bekerban diau njadika kerbantu suci?

²⁰Itula sebapau, amun jemau besumpa demi mija bada bekerban, jemautu besumpa demi mija bada bekerbantu ngan pulau demi gegalaunyau diau adau di pucu'au.

²¹Mangku jemau diau besumpa demi Ghuma Allah, jemautu besumpa demi Ghuma Allah ngan pulau demi Allah diau mendam di situ.

²²Jemau diau besumpa demi sergau, jemautu besumpa demi bada duduak Allah ngan pulau demi Allah diau duduak di situ.

²³Celakaula kapu dighi, ai guru-guru ukum Taurat ngan jemau Parisi, kapu dighi cak alim. Gheghuku ngan rerempahan diau lain, kapu dighi enjuakka bagi sepulua sebagi, anyautu diau penting dalam ukum Allah luak keadilan ngan keilu'an ngan kasia ngan Allah nidau kapu dighi sanauka. Awuak itula diau mesti kapu dighi kerjauka, diau lain pulau jangan dilalaika.

²⁴Kapu dighi pengulu-pengulu diau butau. Lalat dalam minuman kapu dighi saring, anyautu untau diau di dalamau kapu dighi teguak.

²⁵Celakaula kapu dighi, ai guru-guru ukum Taurat ngan jemau Parisi. Kapu dighi jemau cak alim. Mangkuak ngan piring kapu dighi basua banci-banci di luaghau, anyautu di dalamau kumua kematila ngan selak ngan barang nidau alal.

²⁶Ai jemau Parisi diau butau, basuala kudai banci-banci sebela dalam jak di mangkuak ngan piring kapu dighi, mangku luaghau ka banci pulau.

²⁷Celakaula kapu dighi, ai guru-guru ukum Taurat ngan jemau Parisi. Kapu dighi jemau cak alim. Kapu dighi luak kuburan diau dicat putia. Di luaghau kina'an alap, anyautu di dalamau penua ngan tulang ngan gegalaunyau diau busuak.

²⁸Luak itula pulau kapu dighi. Jak di luagh kapu dighi kina'an iluak ngan jemau. Anyautu di dalam kapu dighi cak alim ngan ja'at.”

²⁹“Celakaula kapu dighi, ai guru-guru ukum Taurat ngan jemau Parisi. Kapu dighi jemau cak alim. Kapu dighi mbuat kuburan diau alap batan endak nabi-nabi ngan meriasi tugu-tugu jemau alim.

³⁰Kapu dighi bekatau, ‘Misalau kami idup timpau niniak puyang kami senitu, cengki kami nidau ngikut ughangtu mbunua nabi-nabi itu.’

³¹Kapu dighi ngakuak, bansau kapu dighi pengadau jemau diau mbunua nabi.

³²Amun luak itu, majukala ngan ngudimila dusau niniak puyang kapu dighi.

³³Ai, kapu dighi jemau ja'at ngan pengadau jemau ja'at luak ulagh bebisau. Luak manau kapu dighi pacak nyelamatka diri jak di ukuman di nerakau?

³⁴Dengaghkala iluak-iluak, aku ngajung nabi, jemau bepengertian ngan guru-guru ukum Taurat njenguak kapu dighi. Adau jak di ughangtu diau ka kapu dighi bunua ngan pakuka di kayu salip. Adau diau ka kapu dighi siksau di ghuma-ghuma sembayang. Adau pulau diau ka kapu dighi jagal ke sutiak kuta ke kuta diau lain.

³⁵Mangku kapu dighi ka nanggung ukuman pembunuan diau dikerjauka di jemau diau nidau besala, mulai ngan Habel diau nidau besala enggut Sakaria anak Berekia diau kapu dighi bunua di Ghuma Allah di entaghau bada diau suci ngan mija bada bekerban.

³⁶Percayaula, gegalaunyautu ka ditanggung jemau mbak kini.”

³⁷“Ai jemau Yerusalim, nabi-nabi kamu bunua, ajungan Allah kamu sipati ngan batu enggut mati. La rajin Aku endak nunggalka anak-anak kamu, luak bai ayam nunggalka ana'au meghekupi di bawa sayapau, anyautu kamu enggup.

³⁸Mangku ghuma kamu ka ditinggalka, ka suni.

³⁹Keruanila, mulai mbak kini kamu nidau ka nginak Aku agi, enggut kamu bekatau, ‘Tepujila jemau diau datang dalam namau Tuhan!’ ”