Read Central Malay MATIUS 24 Bible Online

MATIUS 24 - Central Malay bible

MATIUS 24

¹Udim itu Yesus ngeluagh jak di Ghuma Allah, mangku anak-buaHau njenguak Diau ngan nunjuakka Ghuma Allah.

²Yesus bekatau ngan ughangtu, “Apu kamu nginak gegalaunyau itu? Keruanila, nidau bediau sutiak kia batu di sini diau ka tinggal tepasang di badahau. Gegalaunyau ka rubua.”

³Mangku Yesus pegi ke Bukit Saitun. Diau dang duduak di situ, anak-buaHau datang endak ngiciak ngan Diau sughang. Katau ughangtu, “Kiciakkala ngan kami, kebilau titu ka tejadi? Tuapau tandaunyau Dighi ka ngulang agi ngan deniau laka kiamat?”

⁴Yesus bekatau, “Sepepadaula, jangan kamu disesatka jemau.

⁵Banyak jemau ka datang makai namau aku ngan bekatau, ‘Akula Rajau Penyelamat.’ Ughangtu ka nyesatka banyak jemau.

⁶Kamu ka ndengagh muni perang ngan ceritau perang. Sepepadaula, nidau nanti takut. Gegalaunyautu mesti tejadi kudai. Anyautu deniau lum ka kiamat.

⁷Bangsau ka melawan bangsau, nenggeri diau sutiak melawan nenggeri diau lain. Ka adau kelapaghan ngan gempau di manau-manau.

⁸Anyautu gegalaunyautu empai penembai ajau luak tinau diau empai kesakitan endak merunggu.

⁹Masau itu kamu ka ditangkap ngan diseraka endak disaraui ngan dibunua. Kamu ka diluatka gegalau jemau, karnau kamu percayau ngan Aku.

¹⁰Banyak jemau ka ngelipat ngan sangi luatka ngan nyeraka sughang ngan diau lain.

¹¹Banyak cak nabi ka datang ngan nyesatka banyak jemau.

¹²Mangku karnau deniau ka tamba ja'at, banyak jemau nidau agi nyayangi diau lain.

¹³Anyautu jemau diau beta'an enggut udim ka selamat.

¹⁴Mangku ceritau iluak ceritau Allah endak merinta ka dikiciakka di gegalau deniau, mangku gegalau jemau ka ndengaghau. Udim itu kiamat.”

¹⁵“Kamu ka nginak ‘Keja'atan diau ngancurka’ betegak di bada suci, luak la dikiciakka nabi Daniil. Jemau diau mbacau ini peratikala tuapau retiau.

¹⁶Masau itu jemau diau adau di Yudia mesti belaghi ke gunung.

¹⁷Jemau diau adau di gaghang jangan masuak ghuma endak ngambiak retau jak di ghumahau.

¹⁸Jemau diau adau di umau jangan baliak ngambiak pekakasau.

¹⁹Ka celakau tinau-tinau diau dang ngandung ngan tinau diau minumi budak keciak masau itu.

²⁰Bedu'ala, supayau masau kamu belaghi jangan tekenau pangkau ujan madak aghi Sabat.

²¹Karnau masau aghi diau nakutka itu ka adau kesengsarauan luak diau lum kekela tejadi jak deniau adau enggut mbak kini ngan pulau nidau ka adau agi.

²²Misalau masau itu nidau dipandakka, mangku nidau bediau sughang kia diau selamat. Anyautu karnau umatAu mangku masau itu ka dipandakka.

²³Masau itu amun adau jemau diau ngiciak ngan kamu, ‘Kina'ila, Rajau Penyelamat adau di sini.’ ngan ‘Diau adau di situ.’, jangan percayau ngan jemau itu.

²⁴Karnau ka adau cak rajau penyelamat ngan cak nabi. Ughangtu ka ngerjauka tandau-tandau nyelia, mangku amun pacak, endak nipuka umat Allah pulau.

²⁵Dengaghkala Aku la ngiciakkanyau ngan kamu, antak ka titu tejadi.

²⁶Amun jemau bekatau ngan kamu, ‘Kina'ila Diau adau di padang bungin.’, jangan kamu tetipu. Amun ughangtu bekatau, ‘Kina'ila Diau nyemuni dalam biliak di sini.’, jangan kamu percayau.

²⁷Karnau luak cayau kilat diau besinagh jak di sebela matau-aghi idup enggut ke sebela matau-aghi padam, luak itula nanti, amun Anak Manusiau ka datang.

²⁸Di manau adau buntang, di situ adau anjing.”

²⁹“Nidau lamau udim sengsarau masau itu, langit ka kacau-balau. Matau-aghi ka njadi keleman, bulan nidau ka besinagh agi ngan bintang-bintang ka umban jak di langit.

³⁰Masau itula Anak Manusiau ka kina'an di langit. Mangku gegalau bangsau di deniau ka nangis. Ughangtu ka nginak Anak Manusiau datang di aban ngan gegalau kuasauNyau ngan keagunganNyau.

³¹Terumpit diau besak ka dimunika, mangku Anak Manusiau ka ngajung malaikatAu nunggalka umatAu jak di gegalau deniau.”

³²“Belajaghla jak di batang aghau. Amun ghantingau ijang ngan lembut ngan mulai nyinggit, kamu keruan, bansau laka musim panas.

³³Luak itu pulau, amun kamu nginak gegalaunyau tadi tejadi, kamu keruan, bansau masaunyau la pasigh nian.

³⁴Keruanila, gegalaunyautu ka tejadi, antak ka jemau mbak kini mati galau.

³⁵Langit ngan deniau ka lengit, tapitu kici'anKu nidau ka lengit, ka tetap selelamaunyau.”

³⁶“Nidau bediau diau keruan, kebilau masaunyau ngan aghiau. Malaikat di sergau nidau keruan, Anak Allah pulau nidau, cuman Bapak ajau keruan.

³⁷Amun Anak Manusiau datang nanti, deniau ka semegi ngan timpau Nua senitu:

³⁸Antak ka ayiak merampus itu, jemau makan ngan minum, nika ngan dinikaka, enggut Nua masuak perawu besak.

³⁹Masau ughangtu kerampusan ngan mati galau, mangku ughangtu nyadari setu diau dang tejadi. Luak itula pulau nanti, amun Anak Manusiau datang.

⁴⁰Masau itu adau duau ughang diau bekerjau di umau, diau sughang ka dibata'i, diau sughang agitu ditinggalka.

⁴¹Adau ughang duau jemau tinau dang nutuak ghebuak setabangan, diau sughang ka dibata'i, diau sughang agi ka ditinggalka.

⁴²Sepepadaula, karnau kamu nidau keruan, kebilau Tuhan datang.

⁴³Ingatkala ini, amun tuan ghuma keruan, masaunyau aghi malam pemaling datang, cengki diau nidau ka tiduak, mangku pemaling nidau masuak ghumahautu.

⁴⁴Itula sebapau kamu mesti siagau, karnau Anak Manusiau datang masau diau nidau kamu sangkau.”

⁴⁵Katau Yesus agi, “Budak diau manau, diau pacak dipercayaui mangku diau dijadika tuanau kepalak jak di gegalau buda'au, supayau ngenju'i ughangtu makanan padau masaunyau?

⁴⁶Alaka riang budaktu, amun tuanau baliak, mangku nginak diau dang ngerjauka tugasau.

⁴⁷Percayaula tuanautu ka nyeraka gegalau retaunyau ngan buda'autu.

⁴⁸Anyautu, amun budaktu ja'at ngan bekatau dalam atiau,

⁴⁹‘Tuanku lum ka baliak.’, mangku diau mbaduki gegalau kantinau ngan makan-minum ngan mabu'an.

⁵⁰Mangku tuanautu ka baliak, masau ngan aghiau diau nidau disangkau-sangkau, masau diau nidau keruan.

⁵¹Mangku budaktu ka diukum beghat ngan dijadika senasip ngan jemau diau nidau percayau ngan Allah. Di situ diau ka nangis ngan sengsarau.”