Read Central Malay MATIUS 25 Bible Online

MATIUS 25 - Central Malay bible

MATIUS 25

¹“Amun Allah merinta luak rajau nanti, keadaannyau luak cuntau ceritau ini. Adau sepulua ughang gadis ngambiak lampu, mangku pegi nyungsung pengantinan.

²Limau ughang jak di ughangtu bigal, limau ughang agi calak.

³Gadis diau bigaltu mbatak lampu, anyautu nidau mbatak minyak cadangan.

⁴Gadis diau calaktu mbatak lampu ngan mbatak minyak cadangan.

⁵Pengantinan itu lamau lum datang-datang, mangku gadistu tekantuak ngan tekelap.

⁶Aghi la tenga malam, mangku kedengaghan suarau, ‘Pengantinan datang! Mela ngampak diau!’

⁷Sepulua gadis itu bangun ngan maghakka lampuau.

⁸Gadis diau bigaltu bekatau ngan gadis diau calak, ‘Enju'i kami minyak dikit, karnau lampu kami laka padam.’

⁹‘Nidau.’ katau gadis diau calaktu. ‘Nanti nidau ka cukup batan endak kami ngan batan endak kamu. Pegila, mbeli di warung.’

¹⁰Mangku gadis diau bigaltu pegi endak mbeli minyak. Penarau ughangtu pegi, pengantinan sampai. Limau gadis diau besiaptu masuak serempak ngan pengantinan ke bada jamuan, mangku duaghau dikatupka.

¹¹Udim itu gadis diau mbeli minyak tadi sampai. Ughangtu bekatau, ‘Tuan, tuan, buka'ila kami duaghau!’

¹²Anyautu pengantinantu nimbal, ‘Nidau, aku nidau kecinauan kamu!’ ”

¹³Mangku Yesus ngudimi ceritauNyau luak ini, “Karnau itu, kamu mesti bejagau-jagau, karnau kamu nidau keruan aghiau ngan masaunyau.”

¹⁴“Amun Allah merinta luak rajau, keadaannyau luak ceritau ini. Adau sughang diau endak pegi ke bada diau jawua. Antak ka pegi, diau mantau anak-buahau ngan nyeraka retaunyau ngan ughangtu.

¹⁵Bilang anak-buahau dienjuakkanyau nurut kesanggupan sesughangan. Diau sughang dienjuakkanyau limau ribu tanci emas, diau sughang duau ribu, diau sughang agi dienjuakkanyau seribu. Mangku diau pegi.

¹⁶Anak-bua diau nerimau limau ribu tanci emas tadi pegi bedagang ngan tancitu, mangku bulia untungau limau ribu tanci emas agi.

¹⁷Luak itu pulau anak-bua diau nerimau duau ribu tanci emas tadi bulia untungau duau ribu agi.

¹⁸Anyautu anak-bua diau nerimau seribu tanci emas tadi pegi mbuat tebuak di tana, mangku dibunika tanci tuanautu di situ.

¹⁹La lamau pulau udim itu, mangku tuan tadi baliak, mangku diau ngadauka peritungan ngan ughangtu.

²⁰Anak-bua diau nerimau limau ribu tanci emas itu datang ngan mbatak untungau limau ribu, kataunyau, ‘Tuan, dighi nyeraka ngan aku limau ribu tanci emas. Kina'ila, aku bulia asil limau ribu agi.’

²¹‘Iluakla,’ katau tuanautu. ‘Kaba anak-buaku diau iluak ngan pacak dipercayaui. Setu diau keciak kaba pacak dipercayaui, mangku aku ka nyeraka setu diau besak ngan kaba. Mela, masuak ngan ngikut beriang-riang ngan aku.’

²²Mangku anak-bua diau nerimau duau ribu tanci emas itu datang ngan mbatak untungau duau ribu, kataunyau, ‘Tuan, dighi nyeraka ngan aku duau ribu tanci emas. Kina'ila, aku bulia asil duau ribu agi.’

²³‘Iluakla,’ katau tuanautu. ‘Kaba anak-buaku diau iluak ngan pacak dipercayaui. Setu diau keciak kaba pacak dipercayaui, mangku aku ka nyeraka setu diau besak ngan kaba. Mela, masuak ngan ngikut beriang-riang ngan aku.’

²⁴Udim itu anak-buahau diau nerimau seribu tanci emas itu datang ngan bekatau, ‘Tuan, aku keruan dighi jemau kejam. Dighi ngetam di bada diau nidau dighi tanam. Dighi ngambiak asilau di bada diau nidau dighi amburka benia.

²⁵Aku takut, mangku pegi nyemunika tanci dighi dalam tana. Inila tanci dighi!’

²⁶‘Ui, kabani anak-bua diau ja'at ngan malas! Kaba la keruan aku ngetam setu diau nidau kutanam ngan ngambiak asilau di bada diau nidau kuamburka benia.

²⁷Amun luak itu, semestiau kaba menyapi tanciku di bang, mangku amun aku baliak, pacak kuambiak ngan ana'au.

²⁸Karnau itu ambiakla tanci itu jak di diau, enjuakka ngan jemau diau la adau sepulua ribu itu.

²⁹Karnau bilang jemau diau buadau ka dienjuakka agi, mangku diau belebia. Anyautu jemau diau nidau bediau tuapau-apau, setu diau gi adau di diau ka diambiak pulau jak di diau.

³⁰Mangku anak-bua diau nidau begunau itu capakka keluagh di keleman. Di situ diau ka nangis ngan sengsarau.’ ”

³¹“Amun Anak Manusiau datang luak Rajau dikantini gegalau malaikat, mangku Diau ka duduak di bada duduak rajau diau agungtu.

³²Gegalau jemau ka ditunggalka di adapanNyau. Mangku Diau ka nceghaika ughangtu njadi duau rumbungan, luak tukang sayia nceghaika bebiri ngan kambing.

³³Mangku jemau diau ngerjauka kendak Allah ka ditunggalka di sebela kananAu, ngan diau lain di sebela kidauNyau.

³⁴Mangku Rajau itu ka bekatau ngan ughang di sebela kananAu, ‘Mela, kamu diau disayangi BapakKu. Masuakla ke bada diau disediauka batan endak kamu jak deniau adau.

³⁵Karnau masau Aku lapagh, kamu ngenju'i Aku makan. Masau Aku aus, kamu ngenju'i Aku minum. Aku sughang merantau, kamu nerimau Aku di ghuma kamu.

³⁶Aku nidau bebaju, kamu ngenju'i Aku baju. Aku buidapan, kamu nyayia Aku. Aku dijilka, kamu ngaruaka Aku.’

³⁷Mangku ughangtu ka bekatau, ‘Tuhan, kebilau kami nginak Dighi lapagh, mangku kami ngenju'i Dighi makan, Dighi aus, mangku kami ngenju'i Dighi minum?

³⁸Kebilau kami nginak Dighi luak jemau merantau, mangku kami nerimau Dighi di ghuma kami, ngan Dighi nidau bebaju, mangku kami ngenju'i Dighi baju?

³⁹Kebilau kami nginak Dighi buidapan ngan dijilka, mangku kami ngaruaka Dighi?’

⁴⁰Mangku Rajau itu ka nimbal, ‘Keruanila, setu diau kamu ngerjauka ngan sala sughang kantinKu ini empuak diau inau sekali, kamu kerjauka batan endak Aku.’

⁴¹Mangku Rajau itu ka bekatau ngan jemau di sebela kidauNyau, ‘Laratla jak di adapanKu! Kamu jemau keparat. Pegila ke dalam api diau nidau ka padam-padam, diau disediauka batan endak Iblis ngan anak-buahau.

⁴²Karnau masau Aku lapagh, kamu nidau ngenju'i Aku makan. Masau Aku aus, kamu nidau ngenju'i Aku minum.

⁴³Aku sughang merantau, kamu nidau nerimau Aku di ghuma kamu. Aku nidau bebaju, kamu nidau ngenju'i Aku baju. Aku buidapan ngan dijilka, kamu nidau ngaruaka Aku.’

⁴⁴Mangku ughangtu pulau ka bekatau, ‘Tuhan, kebilau kami nginak Dighi lapagh ngan aus ngan luak jemau merantau ngan nidau bebaju ngan buidapan ngan dijilka, mangku kami nidau nulung Dighi?’

⁴⁵Mangku Rajau itu ka nimbal, ‘Keruanila, masau kamu nidau nulung sala sughang kantinKu ini, empuak diau inau sekali, kamu nidau nulung Aku.’

⁴⁶Mangku ughangtu ka diukum ngan ukuman selelamaunyau. Jemau diau ngerjauka kendak Allah tadi ka riang selelamaunyau.”