Read Central Malay MATIUS 26 Bible Online

MATIUS 26 - Central Malay bible

MATIUS 26

¹La udim Yesus ngajaghka gegalaunyautu, Diau bekatau ngan anak-buaHau,

²“Kamu keruan duau aghi agi aghi rerayau Paska, mangku Anak Manusiau ka diseraka endak dipakuka di kayu salip.”

³Masau itu imam-imam bepangkat tinggi ngan tuau-tuau jemau Yahudi betunggal di istana Imam Besak Kayapas.

⁴Ughangtu buijau endak nangkap Yesus carau diam-diam mangku endak mbunua Diau.

⁵Anyautu ughangtu bekatau, “Jangan titu dikerjauka masau aghi rerayau, mangku jangan jemau banyak ganau.”

⁶Yesus dang adau di Betania, di ghuma Simun diau senitu buidapan ja'at.

⁷Mangku adau sughang jemau tinau datang guak Yesus mbatak sebua kacau buisi minyak ghum diau besak regaunyau. Yesus dang duduak makan, mangku tinau itu numpaka minyak ghumtu ke pucuak palak Yesus.

⁸Anak-bua Yesus nginak titu mangku mara, “Tuapau gunau meghayakka gegalaunyautu?

⁹Minyak itu pacak dijual ngan regau diau besak, mangku tanciau pacak dienjuakka ngan jemau serik.”

¹⁰Yesus keruan rupu'an ughangtu, mangku Diau bekatau, “Ngapau kamu nyinggung tinau ini? Diau ngerjauka setu diau iluak batan endak Aku.

¹¹Jemau serik maju guak kamu, anyautu Akuni nidau maju guak kamu.

¹²Ngan carau numpaka minyak ghum itu di badanKu diau la nyiapka Aku batan endak penguburanKu.

¹³Percayaula, di gegalau deniau di manau ceritau iluak jak di Allah diceritauka, setu diau dikerjauka tinau ini ka dikiciakka pulau endak ngingatka diau.”

¹⁴Mangku sughang jak di duau belas anak-bua Yesus pegi njenguak imam-imam bepangkat tinggi. Namaunyau Yudas Iskariut.

¹⁵Diau bekatau ngan ughangtu, “Tuapau diau ka kapu dighi enjuakka ngan aku, amun aku nyeraka Yesus ngan kapu dighi?” Mangku ughangtu ngenjuakka tigau pulua tanci pirak ngan diau.

¹⁶Jak masau itu Yudas ndalak jalan endak nyeraka Yesus ngan ughangtu.

¹⁷Aghi petamau aghi rerayau Ruti Nidau Beghagi, anak-buaHau njenguak Yesus ngan betanyau, “Ke manau bada Dighi ngajung kami nyediauka jamuan Paska mangku Dighi makan?”

¹⁸Yesus nimbal, “Pegila ke kuta njenguak sughang diau la ditetapka di situ, kiciakkala ngan diau, ‘Katau guru, masauKu la sampai. Aku endak makan jamuan Paska di ghuma dighi serempak ngan anak-buaKu!’ ”

¹⁹Mangku anak-buaHau ngerjauka luak diau dikiciakka Yesus, mangku disediaukanyau jamuan Paska.

²⁰Aghi la malam, Yesus ngan duau belas anak-buaHau duduak makan.

²¹Ughangtu dang makan, Diau bekatau, “Dengaghkala! Sughang jak di kamu ka njualka Aku.”

²²Ndengagh titu ughangtu bingung, mangku sejagh sughang ughangtu bekatau ngan Yesus, “Cengki ukan aku diau Dighi kiciakka?”

²³Yesus nimbal, “Jemau diau nceculka ruti dalam mangkuak serempak ngan Aku jemautu ka njualka Aku.

²⁴Nyela, Anak Manusiau ka mati nendiau, luak la ditulis dalam Injil. Anyautu celakaula jemau diau njualka Anak Manusiautu. Iluakla diau nidau dilahirka.”

²⁵Mangku Yudas diau endak njualka Yesustu bekatau, “Cengki ukan aku diau Dighi kiciakka.” Yesus nimbal, “Luak itula katau kaba.”

²⁶Ughangtu dang makan, mangku Yesus ngambiak ruti, bedu'a beterimau-kasia, dipiyak-piya'Au mangku dienjuakkaNyau ngan anak-buaHau sampai bekatau, “Ambiakla, makanla. Inila badanKu.”

²⁷Udim itu Yesus ngambiak mangkuak besak, bedu'a beterimau-kasia, dienjuakkaNyau ngan ughangtu sampai bekatau, “Gegalau kamu minumla jak di mangkuak ini.

²⁸Inila daghaKu diau neguaka janji Allah. Dagha itu ditumpaka batan endak ngampuni dusau banyak jemau.

²⁹Percayaula, mulai mbak kini Aku nidau ka minum anggur ini agi, enggut Aku minum anggur diau empai serempak ngan kamu di bada BapakKu merinta.”

³⁰Udim itu ughangtu benyanyi ngagungka Allah, mangku pegi ke Bukit Saitun.

³¹Mangku Yesus bekatau ngan ughangtu, “Malam ini gegalau kamu ka belaghi ninggalka Aku. Karnau di Injil ditulis, ‘Aku ka mbunua tukang sayia, mangku bebiriau ka teceghai-beghai.’

³²Anyautu amun Aku la ngulang idup agi, Aku ka pegi ndului kamu ke Galilia.”

³³Pitrus bekatau ngan Yesus, “Empuak gegalau diau lainau ninggalka Dighi, aku nidau ka ninggalka Dighi.”

³⁴“Ingatkala,” katau Yesus, “Malam ini antak ka ayam bekukuak, kaba la tigau kali ngiciakka nidau keruan Aku.”

³⁵Pitrus nimbal, “Empuak aku mati serempak ngan Dighi, aku nidau ka bekatau, bansau aku nidau keruan Dighi.” Gegalau anak-buaHau diau lain ngiciak luak itu pulau.

³⁶Mangku Yesus ngan anak-buaHau pegi ke bada diau benamau Getsimani. Di situ Diau bekatau ngan ughangtu, “Duduakla di sini, penarau Aku pegi bedu'a.”

³⁷Mangku Diau ngajak Pitrus ngan duau anak Sebedius pegi serempak ngan Diau. Mangku Diau mulai meghasau sedia ngan gelisa.

³⁸Diau bekatau ngan ughang tigautu, “AtiKu madak nian, asaunyau luak ka mati. Mendamla kamu di sini, ngikut njagau ngan Aku.”

³⁹Udim itu Diau pegi jawua dikit, mangku nunduak ngan bedu'a, katauNyau, “Bak, amun pacak, jawuakala sengsarau itu jak di Aku. Anyautu jangan nurut kendak Aku, tapitu kendak Dighi ajau.”

⁴⁰La udim bedu'a Diau ngulang guak tigau ughang anak-buaHau tadi, ditemuiNyau ughangtu dang tiduak, mangku Diau bekatau ngan Pitrus, “Cuman sejam ajau kamu nidau pacak njagau ngan Aku.

⁴¹Siagaula ngan bedu'ala, supayau kamu jangan bedusau, amun dicubaui. Nyela, kamu endak ngerjauka setu diau benagh, anyautu nidau pacak.”

⁴²Yesus pegi agi endak bedu'a, katauNyau, “Bak, amun sengsarau ini mesti Kualami, nengkela kendak Dighi tejadi.”

⁴³Udim itu Diau ngulang agi, ditemuiNyau anak-buaHau tadi masia pulau tiduak, karnau ughangtu ghungau nian.

⁴⁴Mangku Yesus ninggalka ughangtu agi endak bedu'a ketigau kaliau diau semegi luak du'a tadi.

⁴⁵La udim itu Diau ngulang agi njenguak anak-buaHau ngan bekatau, “Masia kamu tiduak ngan gheghadu? Kina'ila, la masaunyau Anak Manusiau diseraka ngan kuasau jemau bedusau.

⁴⁶Bangunla, mela kitau pegi. Jemau diau njualka Aku la datang.”

⁴⁷Penarau Yesus gi ngiciak, Yudas, sughang jak di duau belas anak-buaHau, datang. Serempak ngan diau datang pulau jemau serumbungan besak mbatak pedang mbatak pembaduk. Ughangtu diajung Imam Besak ngan tuau-tuau jemau Yahudi.

⁴⁸Jemau diau njualka Yesus la ngiciakka tandau ini ngan ughangtu, “Jemau diau kucium itula jemaunyau. Tangkapla Diau.”

⁴⁹La sampai di bada itu, Yudas masighi Yesus ngan bekatau, “Salam, Pak Guru.” Mangku diciumau.

⁵⁰Yesus bekatau, “Ui kaba, endak ngapau kaba datang ke sini?” Udim itu ughangtu tadi masigh mangku nangkap Yesus.

⁵¹Sughang jak di anak-buaHau diau adau di situ ncabut pedangau, ngapak anak-bua Imam Besak mangku putus telingaunyau.

⁵²Yesus bekatau ngan anak-buaHau itu, “Berangkaukala pedang kaba. Karnau jemau diau makai pedang, ka mati ngan pedang.

⁵³Apu kaba kirau, Aku nidau pacak mintak tulung ngan BapakKu? Mangku Diau gancang ngajung duau belas lebia rumbungan tentera malaikat endak nulung Aku.

⁵⁴Anyautu amun luak itu, manau ka adau tejadi setu diau la dikiciakka dalam Injil, bansau nyela mesti tejadi luak ini?”

⁵⁵Mangku Yesus bekatau ngan jemau banyak tadi, “Kamu datang mbatak pedang, mbatak pembaduk endak nangkap Aku. Apu Aku jemau ja'at? Idang aghi Aku ngajagh di Ghuma Allah. Kamu enggup nangkap Aku.

⁵⁶Nyela, gegalaunyautu mesti tejadi, mangku ditepati setu diau ditulis dalam kitab nabi-nabi.” Mangku gegalau anak-buaHau belaghi ninggalka Yesus.

⁵⁷La udim ditangkap, Yesus dibata'i ke ghuma Imam Besak Kayapas. Di situ guru-guru ukum Taurat ngan tuau-tuau jemau Yahudi la betunggal.

⁵⁸Pitrus ngikut jak di jawua sampai ke tengalaman ghuma Imam Besaktu. Mangku diau pulau masuak ke tengalamantu, duduak guak penjagau. Diau endak keruan, luak manau gegalaunyautu ka udim.

⁵⁹Imam-imam bepangkat tinggi ngan gegalau pengadilan agamau beusaha nyalaka Yesus ngan kici'an mbu'ung, supayau pacak diukum mati.

⁶⁰Anyautu nidau bediau buktiau, empuak banyak jemau ngiciakka setu diau mbu'ung. Mangku adau duau ughang pegi ke mukau.

⁶¹Ughang duautu bekatau, “Jemau ini ngatauka, ‘Aku pacak merubuaka Ghuma Allah, mangku timpau tigau aghi negakkanyau agi.’ ”

⁶²Mangku Imam Besak betegak bekatau ngan Yesus, “Ngapau Kaba nidau nimbali buru'an diau mburuakka Kabatu?”

⁶³Anyautu Yesus diam ajau. Mangku Imam Besak ngiciak agi ngan Diau, kataunyau, “Demi Allah diau idup kiciakkala ngan kami, apu Kaba Mesias, Rajau Penyelamat, Anak Allah, apu nidau.”

⁶⁴Yesus nimbal, “Dighitu la ngiciakkanyau. Anyautu percayaula, mulai mbak kini kapu dighi ka nginak Anak Manusiau duduak di sebela kanan Allah diau Mahakuasau mangku datang ngan aban di langit.”

⁶⁵Mangku Imam Besak ncaghiakka bajuau ngan bekatau, “Diau nggelakka Allah. Nidau nanti dikiciakka jemau lain agi. Gegalau kapu dighi la ndengagh Diau nggelakka Allah.

⁶⁶Mbak kini luak manau pendapat kapu dighi?” Ughangtu nimbal, “Diau besala. Diau mesti mati.”

⁶⁷Mangku ughangtu meludai dayi Yesus ngan mbaduki Diau. Adau pulau diau nampaghAu.

⁶⁸ngan bekatau, “Ai, Rajau Penyelamat, cubau dedak ngan kiciakka ngan kami, sapau nampagh kaba?”

⁶⁹Penarau Pitrus dang duduak di luagh di tengalaman, adau sughang jemau tinau budak Imam Besak datang bekatau ngan Pitrus, “Kaba pulau maju seghundak ngan Yesus, jemau Galiliatu.”

⁷⁰Pitrus nidau ngaku'inyau di mukau gegalau ughangtu, kataunyau, “Aku nidau keruan tuapau dikiciakka kaba?”

⁷¹Mangku diau pegi ke duaghau tengalamantu, jemau tinau diau lain nginak Pitrus mangku bekatau ngan jemau di situ, “Jemau ini pulau la seghundak ngan Yesus, jemau Nasarittu.”

⁷²Pitrus nidau pulau ngaku'i Diau ngan sumpa, “Aku nidau nian keruan Jemau itu.”

⁷³Nidau lamau udim itu adau jemau lain diau betegak di situ njenguak Pitrus ngan bekatau, “Cetau kaba sughang jak di ughangtu. Itu nampak carau kaba ngiciak.”

⁷⁴Mangku Pitrus besumpa, “Aku nidau keruan Jemau itu. Nengkela Allah ngukum aku, amun aku mbu'ung.” Masau itula ayam bekukuak.

⁷⁵Mangku Pitrus teghingat setu diau la dikiciakka Yesus ngan diau, “Antak ka ayam bekukuak, kaba la tigau kali nidau ngaku'i Aku.” Mangku Pitrus ngeluagh jak di situ nangis sesedanan.