Read Central Malay MATIUS 3 Bible Online

MATIUS 3 - Central Malay bible

MATIUS 3

¹Masau itu Yuhanis Pembaptis datang ke padang bungin di Yudia ngan mulai beketuba, kataunyau,

²“Ubaila perembak ngan dusau kamu, karnau nidau lamau agi Allah ka merinta luak rajau.”

³Nyela, Yuhanis itula diau dikiciakka nabi Yesaya ngan katau ini, “Adau suarau jemau di padang bungin, ‘Sediaukala jalan batan endak Tuhan, lughuskala jalan batan endak Diau.’ ”

⁴Baju Yuhanis jak di bulu untau, bebatau jak di bawuak, makanannyau belalang ngan manisan medu.

⁵Banyak jemau jak di Yerusalim, jak di gegalau nenggeri Yudia, ngan jak di daira Yurdan datang njenguak Yuhanis.

⁶Ughangtu ngaku'i dusau-dusaunyau mangku dibaptis Yuhanis di ayiak Yurdan.

⁷Banyak pulau jemau Parisi ngan jemau Saduki datang endak dibaptis. Anyautu satu nginak ughangtu datang, Yuhanis bekatau, “Ui, kamutu jemau ja'at luak ulagh. Sapau diau ngiciakka, bansau kamu pacak lepas jak di ukuman Allah diau ka datangtu?

⁸Nyataukala ngan perembak kamu, bansau kamu la ngubai jak di dusau kamu.

⁹Jangan kamu sangkau, kamu ka lepas jak di ukuman ngan ngiciakka, bansau kamu pengadau Abraham. Keruanila, jak di batu-batu ini Allah pacak mbuat pengadau batan endak Abraham.

¹⁰Kapak la adau di akagh kayu, mangku bilang kayu diau nidau ngasilka bua diau iluak ditebang mangku dicapakka dalam api.

¹¹Aku mbaptis kamu ngan ayiak, tandau la betubat. Nanti ka datang Jemau diau lebia bekuasau jak di aku. Melegha'i tali sepatuAu ajau aku endiak pantas. Diau ka mbaptis kamu ngan Rua Allah ngan api.

¹²Di tanganAu la adau nighu endak nampi ighi'anNyau, padiAu endak ditunggalka dalam tengkiang. Gegalau ampaunyau ka disilap ngan api diau nidau ka padam.”

¹³Masau itu Yesus pegi jak di Galilia ke ayiak Yurdan. Di situ Diau datang njenguak Yuhanis endak dibaptis.

¹⁴Anyautu Yuhanis enggup mbaptiskaNyau, kataunyau, “Aku diau semestiau dibaptis Kaba, mangku ngapau Kaba mintak dibaptis ngan aku?”

¹⁵Mangku Yesus nimbal, katauNyau, “Nengkela mbak kini luak ini, karnau ngan carau luak ini kitau ngerjauka gegalau kendak Allah.” Mangku Yuhanis nurut.

¹⁶La udim dibaptis, Yesus ngeluagh jak di ayiak. Masau itu pulau langit tebukak, mangku Yesus nginak Rua Allah tughun luak burung darau inggap di Diau.

¹⁷Mangku adau suarau jak di langit, katauNyau, “Inila AnakKu diau Kusayangi. Diau melemakka atiKu.”