Read Central Malay MATIUS 7 Bible Online

MATIUS 7 - Central Malay bible

MATIUS 7

¹“Jangan kamu ngukum jemau, mangku kamu nidau diukum.

²Karnau luak kamu ngukum jemau kamu pulau ka diukum. Luak manau kamu ngulaki jemau, luak itu pulau jemau ngulaki kamu.

³Ngapau kaba nginak kempenan di matau kantin kaba, anyautu baluk di matau kaba nidau kaba keruani?

⁴Luak manau kamu pacak ngiciak ngan kantin kaba, ‘Nengkela aku ngeluaghka kempenan di matau kaba.’, awuak di matau kabatula adau baluk.

⁵Ui, kaba cak iluak! Keluaghkala kudai baluk jak di matau kaba, mangku kaba nginak ngan terang endak ngeluaghka kempenan jak di matau kantin kaba.

⁶Jangan ngenjuakka setu diau beresia ngan anjing. Jangan pulau nyipatka mutiara ngan kaput, mangku nidau dipijak-pijakkanyau ngan nidau ngelipat nyerang kamu.”

⁷“Pintakla, mangku kamu ka dienju'i. Bedalakla, mangku kamu ka bepulian. Gagurla duaghau, mangku kamu ka dibuka'i.

⁸Karnau bilang jemau diau mintak dienju'i, bilang jemau diau ndalak bulia, mangku bilang jemau diau nggagur duaghau dibuka'i.

⁹Apu adau jak di kamuni diau ngenju'i ana'au batu, amun diau mintak makan?

¹⁰Apu dienju'i ulagh, amun diau mintak ikan?

¹¹Amun kamu diau ja'at pacak ngenjuak diau iluak ngan anak kamu, apau lagi Bapak kamu diau di sergau! Diau ka ngenju'i setu diau iluak ngan jemau diau mintak ngan Diau.

¹²Bebuatla ngan jemau luak kamu endak ughangtu mbuati kamu. Itula isi gegalau ukum Taurat ngan kitab nabi-nabi.”

¹³“Masuakla wuan duaghau diau supit, karnau duaghau ngan jalan diau nuju ke nerakau besak ngan alap, mangku banyak jemau lalu wuan jalan itu.

¹⁴Anyautu duaghau ngan jalan diau nuju idup supit ngan segau, mangku cuman dikit jemau diau ndapatkanyau.”

¹⁵“Sepepadaula ngan cak nabi. Ughangtu datang di guak kamu luak bebiri, anyautu sebenaghau ughangtu luak setuau diau ganas.

¹⁶Kamu ka ngeruani ughangtu jak di kerjaunyau. Di ghumput bedughi nidau bediau bua anggur. Di kayu bedughi nidau bediau bua aghau.

¹⁷Di batang diau iluak adau bua diau iluak. Di batang diau nidau iluak adau bua diau nidau iluak.

¹⁸Nidau ka adau batang diau iluak ngasilka bua diau karut. Mangku batang diau nidau iluak nidau pulau ngasilka bua diau iluak.

¹⁹Bilang kayu diau nidau ngasilka bua diau iluak, cetau ditebang mangku dicapakka dalam api.

²⁰Luak itula pulau ngan cak nabi tadi. Kamu ka ngeruani ughangtu jak di asil kerjaunyau.”

²¹“Nidau gegalau jemau diau mantau aku, ‘Tuhan, Tuhan!’ njadi angguta umat Allah, anyautu cuman jemau diau ngerjauka kendak BapakKu diau di sergau.

²²Masau aghi kiamat banyak jemau ka bekatau ngan Aku, ‘Tuhan, Tuhan, ngan namau Tuhan kami la ngiciakka katau Allah. Ngan namau Tuhan kami la melaratka iblis. Lagi ngan namau Tuhan kami la banyak mbuat tandau nyelia.’

²³Masau itula Aku ka nimbali ughangtu, ‘Aku nidau kekela ngeruani kamu. Laratla jak di sini, kamu diau ngerjauka setu diau ja'at.’ ”

²⁴“Bilang jemau diau ndengagh kici'anKu ini ngan nurutinyau, jemautu umpamau jemau bepengertian diau negakka ghumahau bepelapiak batu.

²⁵Amun aghi ujan ngan ayiak merampus ngan angin deghas nempua ghuma itu, ghumatu nidau rubua, karnau ditegakka bepelapiak batu.

²⁶Mangku bilang jemau diau ndengagh kici'anKu ini ngan nidau nurutinyau, jemautu umpamau jemau diau bigal diau negakka ghumahau bepelapiak bungin.

²⁷Amun aghi ujan ngan ayiak merampus ngan angin deghas nempua ghuma itu, ghumatu rubua mangku rusak galau.”

²⁸Mangku Yesus ngudimka kici'anNyautu. Jemau banyak tadi kemangan nian ndengaghka ajaghanNyautu,

²⁹karnau Diau ngajagh ngan kuasau, lain nian ngan guru-guru ukum Taurat.