Read Central Malay MATIUS 8 Bible Online

MATIUS 8 - Central Malay bible

MATIUS 8

¹Yesus tughun jak di bukit, mangku banyak jemau ngikut Diau.

²Mangku adau sughang jemau njenguak Diau. Jemautu buidapan ja'at diau mbayauka. Diautu nunduak nyemba Yesus sampai bekatau, “Pak, amun Dighi endak, Dighi pacak meghadui aku.”

³Yesus nyurungka tanganAu ngecakka jemau itu ngan bekiciak, “Aku endak, ghadula kaba.” Masau itu pulau idapannyau ghadu.

⁴Mangku Yesus bekatau ngan diau, “Ingatkala, jangan kaba kiciakka ngan sughang kia ceritau ini. Anyautu pegila njenguak imam, mintak diau merisau kaba. Udim itu enjuakkala kerban diau diajung Musa njadi buktiau ngan jemau, bansau kaba la ghadu.”

⁵Masau Yesus masuak ke Kapernaum, adau sughang kepalak tentera njenguak Diau ngan mintak tulung, kataunyau,

⁶“Pak, budakku tebadai di ghuma karnau buidapan lumpua, la nanggung nian.”

⁷Katau Yesus ngan diau, “Aku ka pegi meghaduka diau.”

⁸Anyautu tentera itu bekatau, “Gaula, aku nidau pantas nerimau Dighi di ghumaku. Kiciakka sepata katau ajau, mangku budakku ghadu.

⁹Aku sughang bawahan, mangku di bawa aku adau pulau tentera. Amun aku ngajung ngan sughang tentera ‘Pegi!’, mangku diau pegi, ngan sughang agi, ‘Ke sini!’ mangku diau datang, lagi ngan budakku, ‘Kerjaukala ini!’, mangku dikerjaukanyau.”

¹⁰Ndengagh kici'annyautu Yesus kemangan nian, mangku Diau ngiciak ngan jemau banyak diau ngikut Diau, katauNyau, “Nyela nian katauKu ini, di guak jemau Israil lum kekela Aku nemuka iman sebesak ini.

¹¹Ngenian, banyak jemau ka datang jak di sebela matau-aghi tumbua, jak di sebela matau-aghi tumban duduak makan serempak ngan Abraham, Isak ngan Yakub di sergau.

¹²Anyautu jemau diau behak njadi umat Allah ka dicapakka di bada diau keleman sekali. Di situ ughangtu ka nangis ngan sengsarau.”

¹³Mangku Yesus bekatau ngan tentera tadi, “Baliakla, setu diau kaba percayaui ka tejadi.” Masau itu pulau buda'au ghadu.

¹⁴Yesus pegi ke ghuma Pitrus. Di situ Diau nginak mentuau tinau Pitrus dang tiduak karnau demam.

¹⁵Yesus ngecakka tanganau mangku demamautu ghadu. Tinautu bangun nepi'i Diau.

¹⁶Aghi laka malam, banyak jemau diau diarung iblis dibatak guak Yesus. Mangku ngan sepata katau ajau Yesus ngisitka iblis itu ngan meghaduka gegalau jemau buidapan.

¹⁷Yesus ngerjauka gegalaunyautu, mangku ditepati setu diau la dikiciakka nabi Yesaya, “Diaula nanggungka sengsarau kitau ngan meghaduka idapan kitau.”

¹⁸Banyak nian jemau di guak Yesus. Masau Diau nginak gegalau ughangtu, Diau ngajung anak-buaHau nyembeghangi danau.

¹⁹Mangku adau sughang guru agamau datang njenguak Diau ngan bekatau, “Pak guru, aku endak ngikut Dighi, ke manau ajau Dighi pegi.”

²⁰Katau Yesus, “Landak adau lubangau, burung adau saghangau, anyautu Anak Manusiau endiak bediau badaHau.”

²¹Mangku sughang agi diau la njadi anak-buaHau bekatau, “Pak, ajungla aku baliak kudai endak nguburka bak kami.”

²²Yesus nimbal, “Mela ngikut Aku. Nengkela jemau mati nguburka jemau mati.”

²³Udim itu Yesus nayiak perawu ngan anak-buaHau ngikut pulau.

²⁴Mangku adau angin nyaghu di danau itu. Adau pulau umbak besak ngan ayiak masuak dalam perawu. Anyautu Yesus dang tiduak.

²⁵Mangku anak-buaHau pegi mbangunkaNyau ngan bekatau, “Pak, tulung, kitau celakau!”

²⁶Yesus ngiciak ngan ughangtu, “Ngapau kamu takut? Ngapau kamu nidau percayau?” Diau bangun mbentak angin ngan danau, mangku danautu tenang.

²⁷Ughangtu kemangan ngan bekiciak, “Sapau sebenaghau jemau ini? Diau merintaka angin ngan danau, mangku diau ta'at.”

²⁸Mangku Yesus sampai di beghang danau di daira Gadara. Adau duau ughang datang diau diarung iblis. Ughang duautu buas nian, mangku nidau sughang kia beghani lalu di situ. Ughangtu ngeluagh jak di perantuan

²⁹ngan tegauk-gauk, kataunyau, “Ka Kaba apauka kami, ui Anak Allah? Apu Kaba endak nyaraui kami, empuak lum masaunyau?”

³⁰Nidau jawua jak di situ banyak kaput ingunan dang ndalak makanan.

³¹Mangku iblistu mintak ngan Yesus, kataunyau, “Amun Kaba endak ngisitka kami, ajungla kami ngarung kaput itu.”

³²“Pegila!” katau Yesus. Mangku iblis itu ngeluagh jak di ughangtu ngarung kaput. Kaput diau banyak itu belaghi tumban ke badas masuak danau mangku mati tebenak.

³³Tukang-tukang sayia kaput itu belaghi ke kuta nceritauka gegalaunyau diau la tejaditu, pulau ceritau ughang duau diau diarung iblis tadi.

³⁴Mangku gegalau jemau di kuta itu pegi nemui Yesus. La betemu ngan Yesus, ughangtu mintak nian, supayau Diau pegi jak di bada itu.