Read Central Malay MATIUS 9 Bible Online

MATIUS 9 - Central Malay bible

MATIUS 9

¹La udim itu Yesus nayiak perawu mangku nyembeghangi danau baliak ke dusunAu.

²Mangku adau jemau mbatak sughang jemau lumpua. Diau maju tebadai di bada tidu'au. Satu Yesus nginak ughangtu percayau nian, Diau bekatau ngan jemau lumpua tadi, “Ui, kantinKu, dusau kaba la diabiska.”

³Di situ adau guru-guru ukum Taurat diau berupuak, “Jemau ini nggelakka Allah?”

⁴Yesus ngeruani rupu'an ughangtu, mangku Diau bekatau, “Ngapau rupu'an kapu dighi ja'at?

⁵Manau diau lebia mura, ngiciakka, ‘Dusau kaba la diabiska,’ apu ngiciakka, ‘Bangunla kaba bejalanla.’?

⁶Anyautu Akuni ka ngajung jemau ini bangun, supayau kapu dighi keruan, bansau Anak Manusiau bekuasau di deniauni ngabiska dusau.” Mangku Diau ngiciak ngan jemau lumpua itu, katauNyau, “Bangunla kaba, katangkala penjagang kaba, mangku baliakla ke ghuma kaba!”

⁷Mangku jemau itu bangun baliak.

⁸Masau jemau banyak nginak setu diau tejaditu, ughangtu takut galau mangku ngagungka Allah, karnau Allah ngenjuakka kuasau besak ngan manusiau.

⁹Udim itu Yesus pegi jak di bada itu, mangku Diau nginak sughang tukang tagia cuki. Namaunyau Matius. Diau dang duduak di kanturau. “Mela, ngikut Aku.” katau Yesus. Matius betegak, mangku ngikut Yesus.

¹⁰Udim itu Yesus makan di ghumahau. Mangku banyak nian tukang tagia cuki ngan jemau bedusau datang makan serempak ngan Diau ngan anak-buaHau.

¹¹Adau jemau Parisi diau nginak itu ngan betanyau ngan anak-bua Yesus, kataunyau, “Ngapau guru kamu makan ngan penagia cuki ngan jemau bedusau?”

¹²Yesus ndengagh kici'an ughangtu mangku nimbal, “Jemau diau sihat nidau endak duktur, jemau diau buidapan ajau.

¹³Cubau keruani kudai retiau katau ini, ‘Diau Kukenda'i sial ukan kerban benatang.’ Aku datang ukan endak ndalak jemau diau benagh, tapitu jemau diau bedusau.”

¹⁴Mangku adau anak-bua Yuhanis datang njenguak Yesus ngan betanyau, “Ngapau kami ngan anak-bua jemau Parisi puasau, anyautu anak-bua Dighi nidau?”

¹⁵Yesus nimbal, “Apu kamu pacak ngajung kantin pengantin bingung ngan dukau di jamuan nika, selamau pengantinan gi adau guak ughangtu? Cengki nidau! Masaunyau ka sampai, pengantinantu ka diambiak jak di ughangtu. Masau itula ughangtu ka puasau.

¹⁶Endiak bediau jemau diau ngambiak batan penampit jak di kain empai endak nampiti baju diau bughuak, karnau penampit jak di kain empai itu ka ncebaghka kain baju diau bughuak tadi mangku tamba besak cebaghau.

¹⁷Luak itu pulau nidau bediau sughang kia ngisika ayiak anggur diau empai ke dalam kantung bawak diau lamau, karnau ayiak anggur diau empaitu ka mecaka kantungtu, mangku anggurau tebuang ngan kantungtu rusak. Ayiak anggur diau empai mesti dimasuakka ke dalam kantung diau empai pulau, mangku anggur ngan kantungtu maju iluak.”

¹⁸Yesus gi ngiciak luak itu, adau sughang pengulu ghuma sembayang datang nunduak guak Yesus ngan bekatau. “Anak gadisku empai mati. Datangla tepiakkala tangan Dighi di diau, mangku diau idup agi.”

¹⁹Mangku Yesus betegak ngikutka jemautu, anak-buaHau ngikut pulau.

²⁰Yesus dang bejalan adau sughang jemau tinau diau buidapan bedagha, la duau belas taun lamaunyau. Tinau itu masighi Yesus jak di belakang ngan nginggut bajuAu,

²¹karnau diau berupuak, “Asal aku nginggut bajuAu, aku ka ghadu.”

²²Mangku Yesus nulia nginak diau sampai bekatau, “Tetapkala ati kaba. Karnau kaba percayau kaba dighadui.” Masau itu pulau daghahau mandak melilia.

²³Mangku Yesus sampai di ghuma pengulu ghuma sembayang tadi. Diau nginak tukang seruling ngan jemau banyak ganau,

²⁴Diau bekatau, “Keluaghla, karnau budak gadis ini nidau mati. Diauni cuman tiduak.” Gegalau ughangtu nawauka Yesus.

²⁵Ughangtu la ngeluagh galau, Yesus masuak ngecakka tangan budak gadis tadi, mangku budak gadistu bangun mangku betegak.

²⁶Ceritau itu tesiar di gegalau daira itu.

²⁷Yesus pegi jak di situ, mangku adau jemau butau duau ughang ngikut Diau sampai mantauiNyau, kataunyau, “Ui, Anak Daud, sialkala kamini!”

²⁸La sampai di ghuma, ughang duautu datang njenguak Yesus. Yesus betanyau ngan ughangtu, “Apu kamu percayau, bansau Aku pacak meghaduka kamu?” “Kami percayau, Pak!” katau jemau butautu.

²⁹Mangku Yesus ngecakka matau ughang duautu sampai bekatau, “Karnau kamu percayau, tejadila di kamu setu diau kamu aghapka.”

³⁰Mangku ughang duautu pacak nginak. Yesus ngingatka ngan ughangtu nian, katauNyau, “Jangan ngiciakka ceritau ini ngan sughang kia.”

³¹Anyautu ughang duautu ngeluagh, mangku ngiciakka ceritau Yesus di gegalau daira itu.

³²Masau ughang duautu tadi pegi, jemau bisu diau diarung iblis dibata'i guak Yesus.

³³Yesus ngisitka iblis itu, mangku jemautu pacak ngiciak agi. Jemau banyak itu kemangan ngan bekatau, “Setu luak ini lum kekela tekinak ngan jemau Israil.”

³⁴Anyautu jemau Parisi bekatau, “Pengulu iblis ngenjuak Diau kuasau batan endak ngisitka iblistu.”

³⁵Luak itula Yesus pegi ngidari gegalau kuta ngan dusun. Diau ngajagh dalam ghuma-ghuma sembayang ngan ngiciakka ceritau iluak, bansau Allah laka merinta luak rajau, mangku Diau meghaduka jemau jak di gegalau idapan ngan cacat.

³⁶Nginak jemau banyak itu, Yesus sial ngan ughangtu, karnau ughangtu litak ngan kebingungan, luak bebiri diau nidau bediau tukang sayiau.

³⁷Mangku Diau bekatau ngan anak-buaHau, “Sawa libagh, jemau ngetamau dikit.

³⁸Karnau itu mintakla ngan jemau ngempu sawa itu, mangku diau ngajung jemau ngetaminyau.”