Read Central Malay MARKUS 1 Bible Online

MARKUS 1 - Central Malay bible

MARKUS 1

¹Inila Ceritau Iluak nceritauka Yesus Keristus, Anak Allah.

²Ceritau iluak itu mulai luak diau la ditulis nabi Yesaya, “ ‘Inila ajunganKu,’ katau Allah, ‘Aku ngajung diau dulu datang sangkan Kaba. Diau ka nyediauka jalan batan endak Kaba.’

³Adau suarau jemau di padang bungin, ‘Sediaukala jalan batan endak Tuhan. Lughuskala jalan batan endak Diau.’ ”

⁴Luak itula Yuhanis Pembaptis muncul di padang bungin sampai bekatau, “Ubaila perembak ngan dusau kamu, ngan mintak dibaptis, mangku Allah ka ngabiska dusau kamu.”

⁵Jemau jak di gegalau Yudia ngan gegalau jemau Yerusalim datang njenguak diau. Ughangtu ngaku'i dusaunyau mangku dibaptis di ayiak Yurdan.

⁶Yuhanis makai baju jak di bulu untau, bebat jak di bawak. Makanannyau belalang ngan madu utan.

⁷Ceritau ini dikiciakkanyau, “Nanti udim aku ka datang sughang Jemau. Bekuasaula Diau sangkan aku. Nunduak melegha'i tali sepatuAu ajau aku nidau pantas.

⁸Aku mbaptis kamu ngan ayiak. Anyautu Diau ka mbaptis kamu ngan Rua Allah.”

⁹Masau itu Yesus datang jak di Nasarit di daira Galilia, mangku Diau dibaptis Yuhanis di ayiak Yurdan.

¹⁰Diau dang ngeluagh jak di ayiaktu, Diau nginak langit tebukak, mangku Rua Allah tughun luak burung darau inggap di Diau.

¹¹Mangku adau suarau jak di langit, “Kabanila AnakKu diau Kusayangi. Kaba melemakka atiKu.”

¹²Udim itu Rua Allah mbatak Yesus pegi ke padang bungin.

¹³Selamau empat pulua aghi Diau mendam di situ, dicubaui Iblis. Di guak Diau adau benatang belia. Mangku malaikat nepi'i Diau.

¹⁴Yuhanis la dijilka, mangku Yesus pegi ke Galilia ngiciakka ceritau iluak jak di Allah.

¹⁵KatauNyau, “Masaunyau la sampai. Allah laka merinta. Ubaila perembak ngan dusau-dusau kamu, mangku percayaula ngan ceritau iluak jak di Allah.”

¹⁶Yesus dang bejalan di tepi laut Galilia, mangku Diau nginak jemau duau beghading tukang ndalak ikan, namaunyau Simun ngan Anderias. Duau beghadingtu dang ngipaska jalau di laut.

¹⁷Yesus ngajak tukang ndalak ikan tadi, “Mela, ngikut Aku! Aku ka ngajaghi kamu njadi tukang ndalak jemau.”

¹⁸Masau itu pulau jemau duau beghadingtu ninggalka jalaunyau, mangku ngikut Yesus.

¹⁹Yesus bejalan dikit agi, mangku tekinak jemau duau beghading lainau, namaunyau Yakubus ngan Yuhanis, anak Sebedius. Diau dang ngilu'i jalaunyau dalam perawu.

²⁰Satu Yesus nginak ughangtu, dipantauNyau Yakubus ngan Yuhanis. Mangku duau beghadingtu ninggalka ba'au ngan jemau upahan di perawu, mangku ngikut Yesus.

²¹Yesus ngan anak-buaHau sampai di Kapernaum. Aghi Sabat di mukau Yesus masuak ghuma sembayang mangku mulai ngajagh.

²²Jemau kemangan galau ndengagh Diau ngajagh, karnau Diau ngajagh ngan kuasau ukan luak guru-guru ukum Taurat.

²³Yesus dang ngajagh, adau sughang jemau di ghuma sembayang tadi diau diarung iblis. Jemau itu tegauk, kataunyau,

²⁴“Ui, Yesus, jemau Nasarit! Endak tuapau ngan kami? Dighi ke sini endak ncapakka kami? Aku keruan sapau Dighi. Dighitu Ajungan Allah diau suci!”

²⁵Anyautu Yesus marai iblistu, “Diam!” katauNyau, “Keluaghla jak di jemau ini!”

²⁶Jemautu dibanting-bantingka iblistu, mangku sampai tegauk ngeluagh iblistu jak di jemau tadi.

²⁷Gegalau jemau diau ngina'autu tegagau ngan kemangan, mangku sangi tanyaui, “Tuapau titu? Apu titu ajaghan empai? Diau ngajagh ngan kuasau. Iblis pulau diperintakaNyau, mangku diau na'atiNyau.”

²⁸Mangku ceritau Yesustu cepat tesiar di gegalau daira Galilia.

²⁹Yesus ngan anak-buaHau keluagh jak di ghuma sembayang, mangku Diau pegi tandang ke ghuma Simun ngan Anderias. Yakubus ngan Yuhanis ngikut pulau.

³⁰Mentuau tinau Simun dang tiduak karnau buidapan demam. Yesus la sampaitu, dikiciakka ngan Diau, bansau mentuau Simun tadi buidapan.

³¹Mangku Diau pegi masighi mentuau Simuntu, dikecakkaNyau tanganau, dibangunkaNyau, mangku demamau ghadu. La udim itu tinautu nepi'i mendahau.

³²Aghitu la sangkup malam, gegalau jemau buidapan ngan diau diarung iblis dibata'i galau njenguak Yesus.

³³Mangku gegalau jemau di dusuntu betunggal di mukau duaghau masuak ghuma itu.

³⁴Yesus meghadui serbau idapan jemau banyaktu ngan ngisitka iblis. Diau nidau ngajung iblistu ngiciak, karnau diau keruan, sapau Yesustu.

³⁵Pagi di aghiau paghak siang butau Yesus bangun ninggalka ghuma pegi ke bada diau suni mangku bedu'a di situ.

³⁶Anyautu Simun ngan kantin-kantinau pegi ndala'i Diau.

³⁷La betemu ughangtu bekatau, “Gegalau jemau ndala'i Dighi.”

³⁸Anyautu Yesus nimbal, “Mela kitau pegi ke bada lain, ke dusun-dusun ngepungan ini. Aku mesti ngiciakka pulau ceritau iluak di situ. Itula tujuan Aku ke sini.”

³⁹Mangku Yesus pegi ngidari gegalau Galilia ngan ngiciakka ceritau iluak di ghuma-ghuma sembayang ngan ngisitka iblis.

⁴⁰Adau sughang jemau diau buidapan ja'at datang njenguak Yesus. Jemautu nunduak di adapanNyau ngan mintak tulung nian, kataunyau, “Pak, amun Dighi endak, Dighi pacak meghadui aku.”

⁴¹Yesus sial ngan jemautu. Diau nyurungka tanganAu, dikecakkaNyau jemautu katauNyau, “Arau, ghadula kaba.”

⁴²Masau itu pulau idapannyau lengit, mangku diau ghadu.

⁴³Mangku Yesus ngajung diau pegi ngan diingatka nian, katauNyau,

⁴⁴“Awas, jangan kaba kiciakka ceritau ini ngan sughang kiala. Pegila, kinakkala badan kaba ngan imam, enjuakkala kerban diau diperintaka Musa, buktiau ngan ughangtu, bansau kaba la ghadu.”

⁴⁵Anyautu jemautu pegi ngan ngiciakka ceritau itu ngan gegalau jemau, mangku Yesus nidau pacak agi masuak kuta ngan terang-terangan. Diau mendam di luagh di bada diau suni. Anyautu jemau maju datang jak di manau-manau.