Read Central Malay MARKUS 10 Bible Online

MARKUS 10 - Central Malay bible

MARKUS 10

¹La udim itu, Yesus ninggalka bada itu pegi ke Yudia ngan ke sebeghang ayiak Yurdan. Jemau banyak datang agi njenguak Diau, mangku luak idang kali Diau ngajagh ughangtu pulau.

²Mangku adau jemau Parisi datang endak nguji Diau ngan betanyau, “Apu bulia laki nyagha'i biniau?”

³Yesus nimbal, “Tuapau perinta Musa ngan kapu dighi?”

⁴Katau ughangtu, “Musa mbuliaka nyagha'i bini, asal ngenjuakka surat saghak kudai.”

⁵Mangku katau Yesus, “Musa nulis perinta itu, karnau kapu dighi segau diajagh.

⁶Anyautu empai penembai Allah mbuat manusiau, dibuatAu lanang ngan tinau.

⁷Itula sebapau jemau lanang ka ninggalka enduak-bapa'au endak seghundak ngan biniau,

⁸mangku ughang duautu njadi sutiak. Mangku ughangtu ukan agi duau tapitu sutiak.

⁹Karnau itu setu diau disatuka Allah nidau bulia disagha'i manusiau.”

¹⁰Ughangtu la sampai di ghuma, mangku anak-buaHau betanyau ngan Yesus ceritau itu.

¹¹Yesus bekatau, “Jemau diau nyagha'i biniau, mangku bebini ngan tinau lain, jemautu menaugawia karnau biniau senitu.

¹²Luak itu pulau tinau diau nyagha'i lakiau, mangku belaki agi ngan lanang lain, diau menaugawia.”

¹³Adau jemau mbatak budak-budak keciak njenguak Yesus, mangku mintak Diau natap budak keciaktu. Anyautu anak-buaHau marai ughangtu.

¹⁴Nginak titu, Yesus mara mangku ngiciak ngan anak-buaHau, katauNyau, “Nengkela budak-budak keciak itu njenguak Aku. Jangan dialangi, karnau jemau luak itula Allah pacak njadi rajau dalam idupau.

¹⁵Ingatkala nian kici'anKu ini: Jemau diau nidau nyambut Allah njadi rajau dalam idupau luak sughang budak keciak, jemautu nidau pacak masuak sergau.”

¹⁶La udim itu Yesus meluak budak-budak keciak itu, ditatapAu bilang palak budak keciak, mangku didu'akaNyau.

¹⁷Yesus endak bejalan agi, mangku adau jemau diau belaghi njenguak Diau. Jemautu nunduak di adapanNyau, mangku betanyau ngan Diau, “Pak Guru diau iluak, tuapau diau mesti kukerjauka, mangku aku bulia idup selelamaunyau?”

¹⁸“Ngapau kaba ngiciakka Akuni iluak?” Katau Yesus. “Sughang kiala nidau bediau iluak lain jak di Allah ajau.

¹⁹Kaba cengki la keruan gegalau perinta Allah: Jangan mbunua, jangan menaugawia, jangan maling, jangan ngiciakka setu mbu'ung, jangan nipuka jemau, regauila enduak-bapak kaba.”

²⁰“Pak Guru”, katau jemautu, “Gegalaunyautu la kuturuti galau jak di keciak.”

²¹Yesus ngina'i jemautu ngan nyayanginyau, katauNyau, “Cuman semecam agi diau lum kaba kerjauka: Pegila, jualka setu diau adau di kaba, enjuakkala tanciau ngan jemau serik, mangku kaba dapat retau di sergau. La udim itu mela ke sini ngikut Aku.”

²²Ndengagh kici'an itu dayiau nyighap, mangku jemautu baliak kebingungan, ikak banyak igau retaunyau.

²³Mangku Yesus ngengina'i anak-buaHau ngan bekatau, “Alaka segaunyau jemau kayau nerimau Allah njadi rajau dalam idupau!”

²⁴Anak-bua Hautu kemangan ndengagh kici'an Nyautu. Anyautu Yesus maju ngiciak, katauNyau, “Ui anak-buaKu. Nyela, segau nian nerimau Allah njadi rajau dalam idup.

²⁵Murala sikuak untau lalu wuan tebuak jaghum sangkan jemau kayau masuak sergau.”

²⁶Mangku tamba kemangan ngan tamba ganau anak-buaHautu. Sughang ngiciak ngan diau lain, kataunyau, “Amun luak itu, sapau diau ka pacak selamat?”

²⁷Yesus ngina'i ughangtu katauNyau, “Amun manusiau titu nidau ka adau, anyautu ukan luak itu amun Allah, karnau gegalaunyau ka pacak ngan Allah.”

²⁸Mangku Pitrus ngiciak ngan Yesus, katauNyau, “Luak manau? Kamini la ninggalka gegalaunyau endak ngikut Dighi!”

²⁹Timbal Yesus, “Ingatkala kici'anKu ini: Bilang jemau diau ninggalka ghumahau, ading-beghadingau, enduak-bapa'au, anak-ana'au, tana sawa tana daghatau karnau Aku ngan ceritau injil,

³⁰jemau itu ka nerimau nian mbak kini seratus kali lebia banyak jak di diau ditinggalkanyau tadi. Diau ka nerimau ghuma, ading-beghadingau, mak, anak, tana, empuak diau diluatka jemau di deniauni. Di masau diau ka datang jemautu ka nerimau idup selelamaunyau.

³¹Anyautu banyak jemau diau dulu sekali ka mendian sekali, mangku jemau diau mendian ka njadi dulu sekali.”

³²Yesus ngan anak-buaHau dang bejalan ngancamka Yerusalim. Yesus bejalan dulu sekali. Anak-buaHautu meghasau temas. Jemau diau kendian ngikut ketakutan pulau. Mangku Yesus mantau duau belas anak-buaHau ngan ngiciakka setu diau ka dighasaukaNyau nanti,

³³katauNyau, “Dengaghkala mbak kini kitau pegi ngancamka Yerusalim. Mangku Anak Manusiau ka diseraka ngan imam-imam bepangkat tinggi ngan guru-guru ukum Taurat, mangku Diau ka diukum mati. Ughangtu ka nyeraka Diau ngan jemau diau nidau keruan Allah.

³⁴Diau ka dipusiakka, diludai, dipeciti, mangku dibunua. La udim duau malam Diau ka ngulang idup agi.”

³⁵Mangku Yakubus ngan Yuhanis, anak Sebedius, datang njenguak Yesus, kataunyau, “Pak Guru, adau setu diau endak kami pintak ngan Dighi batan endak kami.”

³⁶Katau Yesus, “Tuapau diau endak kamu pintak Kukerjauka batan endak kamu?”

³⁷Ughangtu nimbal, “Kami endak duduak di kidau ngan di kanan Dighi, amun Dighi njadi rajau nanti.”

³⁸Katau Yesus, “Kamu nidau keruan setu diau kamu pintak. Apu kamu pacak nanggungka sengsarau luak diau Kutanggungka?”

³⁹Katau ughang duautu, “Kami pacak.” Yesus bekatau agi, “Nyela, kamu ka nanggungka pulau sengsarau luak Kutanggungka.

⁴⁰Anyautu jemau diau ka duduak di sebela kidau ngan kananKu, itu ukan hakKu. Bada itu batan endak jemau diau ditetapka BapakKu.”

⁴¹Ndengagh titu, sepulua anak-bua diau lainau mara ngan jemau duau beghading tadi.

⁴²Karnau itu Yesus mantau gegalau ughangtu mangku bekatau, “Kamu keruan, bansau penguasau bangsau nyaraui rakyatau, penguluau masau ughangtu.

⁴³Anyautu kamu nidau bulia luak itu. Amun adau jak di kamuni diau endak bepangkat tinggi, diau mesti endak njadi penulung gegalau kamu.

⁴⁴Jemau diau endak dulu sekali jak di kamu, diau mesti endak njadi budak gegalau kamuni.

⁴⁵Karnau Anak Manusiau pulau datang ukan batan endak ditulung, tapitu batan endak nulung manusiau ngan nyeraka nyawauNyau nebusi banyak jemau.”

⁴⁶Mangku Yesus ngan anak-buaHau sampai di Yiriku. Diau dang ngeluagh jak di Yiriku, jemau banyak ngikut Diau. Mangku adau sughang jemau butau duduak mintak-mintak di tepi jalan. Namaunyau Bartimius, anak Timius.

⁴⁷Satu ndengagh Yesus lalu, diau tegauk, kataunyau, “Ui, Yesus, Anak Daud! Sialkala aku!”

⁴⁸Mangku jemau banyak marai jemau butautu, diajungau diam. Anyautu diau tamba bias ajau tegauk, kataunyau, “Ui, Anak Daud! Sialkala aku!”

⁴⁹Mangku Yesus mendam, katauNyau, “Pantaula diau.” Ughangtu mantau diau ngan bekatau, “Tenangla. Yesus mantau kaba. Mela betegakla.”

⁵⁰Diau ngelucungka bajuau, mangku gegasip betegak njenguak Yesus.

⁵¹Yesus betanyau, “Tuapau diau endak kaba pintak ngan Aku?” Jemau butau nimbal, “Pak Guru, aku endak pacak nginak.”

⁵²Katau Yesus, “Pegila, kaba ghadu, karnau kaba percayau.” Masau itu pulau jemautu pacak nginak mangku ngikut Yesus.