Read Central Malay MARKUS 12 Bible Online

MARKUS 12 - Central Malay bible

MARKUS 12

¹Mangku Yesus mulai ngiciak ngan ughangtu pakai umpamau, katauNyau, “Adau sughang jemau diau mbukak kebun anggur, mangku dikandangau, digalikanyau lubang batan bada neghit anggur, ditegakka bada nungguau. La udim itu diparauka kebuntu ngan bebeghapau jemau parauan. Mangku diau pegi ke nenggeri lain.

²La pangkaunyau endak mutigh anggur, jemau ngempu kebun tadi ngajung sughang anak-buahau pegi njenguak jemau parauan tadi endak mintak bagian asil kebunau.

³Anyautu jemau parauantu nangkap anak-bua tadi. La udim ditangkap, dibaduki mangku diajung baliak nidau bediau pulian.

⁴Mangku jemau ngempu kebuntu ngajung sughang anak-bua diau lain. Anyautu diau dibaduki pala'au enggut lukau ngan digelakka nian.

⁵Mangku diajung sughang anak-bua lainau agi. Anyautu diau dibunua. Banyak agi diau lain diau diajungau. Adau diau dibaduki, adau diau dibunua.

⁶Mangku tigha ana'au diau sikuak itula diau disayangi. Diautu diajung njenguak jemau parauan tadi, rupu'annyau, ‘Cengki anakku ka diregaui ughangtu.’

⁷Anyautu jemau parauan ngiciak sughang ngan diau lain, ‘Diautu behak ngempu kebun ini nanti. Mela kitau mbunua diau, mangku kebun ini njadi hak kitau.’

⁸Mangku ana'autu ditangkap, dibunua, dicapakka keluagh kebun itu.”

⁹Mangku Yesus betanyau, “Mbak kini tuapau ka dibuat jemau ngempu kebuntu? Cengki diau ka datang mbunua jemau parauan tadi, mangku nyeraka kebunau ngan jemau lain.

¹⁰Apu kapu dighi lum mbacau ayat ini, ‘Batu diau dicapakka tukang negak ghuma, la njadi pelapiak tiang.

¹¹Inila kerjau Tuhan, setu diau nyelia batan endak kitau.’ ”

¹²Mangku imam-imam bepangkat tinggi ngan jemau Parisi beusaha endak nangkap Yesus, karnau ughangtu keruan, bansau ceritau tadi ngenaui ughangtu. Anyautu ughangtu takut ngan jemau banyak, mangku pegi ninggalka Diau.

¹³Udim itu adau jemau Parisi ngan jemau Herudis diajung nanyaui Yesus endak nyalakaNyau.

¹⁴Ughangtu datang njenguak Yesus ngan bekatau, “Pak Guru, kami keruan kici'an Dighi benagh. Dighi ngajaghka kendak Allah ngan benagh. Dighi nidau ngirauka pendapat jemau, karnau Dighi nidau milia rupau. Karnau itu cubau Dighi kiciakka ngan kami: Nurut peraturan agamau kitau, apu bulia mbayigh cuki ngan Kaisar apu nidau? Apu mesti kitau bayighi cukitu?”

¹⁵Yesus keruan rencanau diau jedit itu, mangku Diau bekatau, “Ngapau kamu endak ncubaui Aku? Cubau kinakka ngan Aku sutiak tanci pirak.”

¹⁶Mangku dienjuakkanyau ngan Diau sutiak tanci piraktu. Yesus betanyau, “Gambaran ngan namau sapau adau di situ?” Ughangtu nimbal, “Gambaran ngan namau Kaisar.”

¹⁷“Amun luak itu,” katau Yesus, “Enjuakkala ngan Kaisar hak Kaisar. Mangku enjuakkala ngan Allah hak Allah!” Ughangtu kemangan nian ndengagh kici'anNyautu.

¹⁸Jemau Saduki nidau percayau, bansau jemau mati ka ngulang idup agi. Mangku adau bebeghapau jemau Saduki datang njenguak Yesus ngan betanyau,

¹⁹“Pak Guru, Musa ngajaghka peraturan ini: ‘Amun sughang jemau lanang mati lum adau anak, denga-sana'au mesti nika ngan randaunyau, mangku endak ngadauka jurai batan endak jemau diau la mati tadi.’

²⁰Na, adau jemau lanang tujua beghading. Diau tuau nika mangku mati, lum adau anak.

²¹Mangku diau keduau nikai randaunyau, mangku mati pulau lum adau anak. Luak itu pulau diau ketigau.

²²Luak itula pulau enggut diau ketujua mati galau, nidau bediau anak. Udim-udimau tinautu mati pulau.

²³Luak manau ngan tinau itu masau aghi jemau mati ka diidupka agi? Bini sapau tinautu, karnau ughang tujuatu la nikainyau galau?”

²⁴Yesus nimbal, “Kapu dighi sala, karnau kapu dighi nidau ngerti empuak Injil empuak kuasau Allah.

²⁵Amun jemau mati nanti ngulang idup agi, ughangtu nidau ka belaki bebini agi. Ughangtu ka idup luak malaikat di sergau.

²⁶Ceritau jemau ka ngulang idup, apu lum kapu dighi bacau dalam Taurat ceritau belukagh diau maghak itu? Dalam ceritau itu Allah bekatau ngan Musa, ‘Akula Allah Abraham, Allah Isak ngan Allah Yakub.’

²⁷Allah ukan Allah jemau mati, tapitu Allah jemau idup. Kapu dighi sala nian.”

²⁸Mangku adau sughang guru ukum Taurat. Diau la ndengagh Yesus ngiciak ngan jemau Saduki tadi, bansau Yesus nimbali ughangtu ngan iluak. Diautu datang njenguak Yesus ngan betanyau, “Perinta manau diau penting sekali?”

²⁹Yesus nimbal, “Perinta diau penting sekali ini: Dengaghkala, ui jemau Israil, Tuhanla Allah kitau. Tuhan itu sutiak.

³⁰Sayangila Tuhan, Allah kaba ngan sepenua ati kaba ngan sepenua jiwa kaba ngan gegalau akal-pikiran kaba ngan gegalau kekuatan kaba.

³¹Mangku perinta diau keduau ini: Sayangila jemau lain luak kaba nyayangi diri kaba. Nidau bediau perinta lain, pentingla diau sangkan duau perinta tadi.”

³²Mangku guru ukum Taurat tadi bekatau, “Nyela nian, Pak Guru. Setu diau Dighi kiciakkatu benagh. Allah itu sutiak, nidau bediau allah lain jak di Diau.

³³Kitau mesti nyayangi Allah ngan sepenua ati ngan gegalau akal-pikiran ngan gegalau kekuatan ngan pulau nyayangi jemau luak kitau nyayangi diri kitau. Pentingla titu sangkan kerban benatang ngan gegalau kerban diau lain.”

³⁴Yesus nginak timbal jemautu bepengertian nian, mangku Diau bekatau, “Dighi laka njadi angguta umat Allah.” Mangku sughang kiala nidau beghani agi betanyau ngan Yesus.

³⁵Masau Yesus ngajagh di Ghuma Allah, Diau betanyau, “Ngapau guru-guru ukum Taurat pacak ngiciakka, bansau Mesias, Rajau Penyelamat, pengadau Daud?

³⁶Daud diajung Rua Allah bekatau, ‘Allah bekatau ngan Tuhanku, Duduakla di sebela kananKu, enggut Aku mbuat musua Kaba tunduak nyemba Kaba.’

³⁷Mangku amun Daud ngiciakka Mesiastu Tuhan, manau ka adau Diau pengadau Daud?” Jemau banyak riang nian ndengagh Yesus ngajagh.

³⁸Diau bekatau, “Sepepadaula ngan guru-guru ukum Taurat. Ughangtu galak ngerayau ngan baju lambing ngan galak diregaui di pekan.

³⁹Ughangtu galak duduak di mukau di ghuma sembayang ngan di bada diau diregaui di jamuan.

⁴⁰Ughangtu ngambiak ghuma randau-randau, mangku bedu'a panjang-panjang endak nukupi kerjau ja'attu. Beghatla ukuman ughangtu.”

⁴¹Yesus dang duduak di Ghuma Allah ngadapi bada tanci batan endak Allah, mangku Diau nginak jemau masuakka tanci dalam badatu. Banyak jemau kayau masuakka tanci banyak.

⁴²Mangku Diau nginak sughang randau serik masuakka duau tanci tembagau diau keciak sekali regaunyau.

⁴³Mangku Yesus mantau anak-buaHau, bekatau ngan ughangtu, “Peratikala ini: Banyakla randau serik itu masuakka tanci di bada ini sangkan gegalau jemau lainau tadi.

⁴⁴Gegalau jemau tadi ngenjuakka tanci jak di kelebihan retaunyau. Anyautu randau ini ngenjuakka jak di kurangan, gegalaunyau diau adau di diau batan endak pengidupannyau.”