Read Central Malay MARKUS 13 Bible Online

MARKUS 13 - Central Malay bible

MARKUS 13

¹Yesus dang ngeluagh jak di Ghuma Allah, mangku adau sughang anak-buaHau bekatau ngan Diau, “Pak Guru, kina'ila ghuma itu, alap nianan.”

²Yesus bekatau, “Kaba nginak ghuma diau alap. Nidau sebua kiala batu di ghumatu ka tinggal tesusun di badahau. Gegalaunyau ka rubua.”

³Mangku Yesus duduak di Bukit Saitun ngadap Ghuma Allah. Pitrus, Yakubus, Yuhanis ngan Anderias betanyau ngan Diau sughang,

⁴“Kiciakkala ngan kami, kebilau titu ka tejadi? Tuapau tandaunyau la masaunyau?”

⁵Yesus mulai bekatau, “Sepepadaula, jangan kamu disesatka jemau.

⁶Banyak jemau ka datang makai namau Aku ngan bekatau, ‘Akula Diau.’ Ughangtu ka nyesatka banyak jemau.

⁷Kamu ka ndengagh muni perang ngan ceritau perang. Anyautu nidau nanti takut. Gegalaunyautu mesti tejadi kudai. Anyautu deniau lum ka kiamat.

⁸Bangsau ka melawan bangsau, nenggeri diau sutiak melawan nenggeri diau lain. Ka adau gempau di manau-manau ngan kelapaghan. Gegalaunyautu empai penembai penanggungan.

⁹Kamuni sepepadaula! Kamu ka ditangkap ngan diseraka ke pengadilan agamau. Kamu ka dibaduki di ghuma sembayang, mangku kamu ka diadapka ngan penguasau ngan rajau, karnau percayau ngan Aku, mangku pacak nceritauka Aku ngan ughangtu.

¹⁰Mangku ceritau iluak jak di Allah mesti dikiciakka kudai ngan gegalau bangsau.

¹¹Amun kamu ditangkap ngan dibatak ke pengadilan, jangan ghegak sebelumau ngan setu diau endak kamu kiciakka. Kiciakkala setu diau dikiciakka ngan kamu masau itu pulau, karnau katau itu ukan asalau jak di kamu, tapitu jak di Rua Allah.

¹²Jemau ka nyeraka denga-sana'au endak dibunua. Luak itu pulau bak ngan ana'au. Anak pulau ka melawan pejadiau mangku nyeraka diau endak dibunua.

¹³Kamu ka diluatka gegalau jemau karnau percayau ngan Aku. Anyautu jemau diau ta'an enggut kesudimannyau ka selamat.”

¹⁴“Kamu ka nginak ‘Keja'atan diau ngancurka’ betegak di bada diau dilarang. Jemau diau mbacau ini peratikala tuapau retiau. Masau itu jemau diau adau di Yudia mesti belaghi ke gunung.

¹⁵Jemau diau adau di gaghang jangan masuak ghuma endak ngambiak retau jak di ghumahau.

¹⁶Jemau diau adau di umau jangan baliak endak ngambiak pekakasau.

¹⁷Ka celakau tinau-tinau diau dang ngandung ngan tinau diau minumi ana'au masau itu.

¹⁸Bedu'ala, supayau gegalaunyau jangan tejadi pangkau ujan.

¹⁹Karnau masau itu ka adau kesengsarauan luak diau lum kekela tejadi jak deniau dijadika Allah enggut mbak kini ngan nidau ka tejadi agi.

²⁰Misalau masau itu nidau dipandakka, mangku nidau bediau sughang kia diau selamat. Anyautu karnau umatAu diau la dipiliatu, mangku Tuhan ka mandakka masaunyau.

²¹Masau itu amun adau jemau diau ngiciak ngan kamu, ‘Kina'ila, Rajau Penyelamat adau di sini.’ ngan ‘Diau adau di situ.’, jangan percayau ngan jemau itu,

²²karnau ka adau cak penyelamat ngan cak nabi. Ughangtu ka ngerjauka tandau-tandau nyelia, mangku amun pacak, endak nipuka umat Allah pulau.

²³Sepepadaula, gegalaunyautu la kukiciakka ngan kamu, antak ka tejadi.”

²⁴“Nidau lamau udim sengsarau masau itu, matau-aghi ka njadi keleman, bulan nidau ka besinagh agi.

²⁵Langit ka kacau-balau. Bintang-bintang ka umbanan.

²⁶Masau itula jemau ka nginak Anak Manusiau datang dalam aban ngan gegalau kuasauNyau ngan keagunganNyau.

²⁷Masau itu pulau Diau ka ngajung malaikatAu nunggalka umatAu jak di gegalau ujung deniau.”

²⁸“Belajaghla jak di batang aghau. Amun ghantingau lembut ngan mulai nyinggit, kamu keruan, bansau laka musim panas.

²⁹Luak itu pulau, amun kamu nginak gegalaunyau tadi tejadi, kamu keruan, bansau masaunyau la pasigh nian.

³⁰Keruanila, gegalaunyautu ka tejadi, antak ka jemau mbak kini mati galau.

³¹Langit ngan deniau ka lengit, tapitu kici'anKu nidau ka lengit.

³²Nidau bediau diau keruan, kebilau masaunyau ngan aghiau. Malaikat di sergau nidau keruan, Anak Allah pulau nidau, cuman Bapak ajau keruan.”

³³“Sepepadaula ngan bejagaula, karnau kamu nidau keruan, kebilau masaunyau.

³⁴Masau itu ibarat sughang diau ninggalka ghumahau mangku pegi ke bada diau jawua. Diau ngajung anak-buahau ngurus ghumahau, adau kerjau sesughangan. Diau bepesan ngan tukang nunggu duaghau, supayau bejagau iluak-iluak.

³⁵Karnau itu kamu mesti bejagau, karnau kamu nidau keruan, kebilau tuan ghumatu baliak, enta petang, enta tenga malam, enta paghak siang butau, enta masau matau-aghi tumbua.

³⁶Amun diau datang bekejut, jangan kamu dang tiduak.

³⁷Setu diau Kukiciakka ngan kamu, Kukiciakka pulau ngan gegalau jemau: Sepepadaula!”