Read Central Malay MARKUS 6 Bible Online

MARKUS 6 - Central Malay bible

MARKUS 6

¹La udim itu Yesus pegi jak di situ baliak ke dusunAu. Anak-buaHau ngikut Diau.

²Aghi Sabat Diau mulai ngajagh di ghuma sembayang, mangku banyak jemau ndengaghka Diau. Ughangtu kemangan ngan betanyau, “Jak di manau Diauni bulia gegalaunyautu? Pengertian apau pulau diau adau di Diau? Luak manau Diau pacak mbuat tandau nyelia?

³Ukanau Diauni tukang kayu, anak Maria? Ukanau adingAu Yakubus, Yusis, Yudas ngan Simun ngan kelawaiAu pulau mendam ngan kitau di sini?” Mangku ughangtu keciwau ngan nidau nerimau Diau.

⁴Mangku Yesus bekatau ngan ughangtu, “Sughang nabi diregaui di manau-manau, amun ukan di dusunau ngan denga-sana'au ngan ghumahau.”

⁵Dikit kiala Diau nidau pacak mbuat setu diau nyelia di situ. Diau cuman meghaduka bebeghapau jemau buidapan ngan nepiakka tanganAu di pucuak palak ughangtu.

⁶Diau kemangan karnau ughangtu nidau percayau. Mangku Diau pegi ke dusun-dusun di ngepungannyau sampai ngajagh.

⁷Yesus mantau duau belas anak-buaHau, mangku ngajung ughangtu pegi beduau-duau, dienjuakkaNyau kuasau endak ngisitka rua ja'at.

⁸Mangku Diau bepesan ngan ughangtu, “Amun bejalan, jangan mbatak tuapau-apau lain jak di tungkat. Makanan jangan, minggangan jangan, tanci jangan.

⁹Pakai sepatu bulia, tapitu jangan makai baju duau.”

¹⁰Diau bekatau agi, “Amun kamu la diterimau di ghuma jemau, mendamla di situ, enggut kamu melajuka pejalanan.

¹¹Amun di sutiak bada jemau nidau bediau nerimau kamu ngan nidau bediau endak ndengaghka kamu, pegila jak di situ, mangku kepaskala debu jak di keting kamu njadi peringatan batan endak ughangtu.”

¹²Mangku ughangtu pegi ngiciakka, bansau jemau mesti ngubai peremba'au jak di dusaunyau.

¹³Ughangtu melaratka banyak iblis ngan nggusuakka minyak Saitun ngan jemau buidapan, mangku ughangtu ghadu.

¹⁴Rajau Herudis pulau ndengagh ceritau Yesus, karnau namauNyau la dikeruani gegalau jemau. Mangku adau diau bekatau, “Yuhanis Pembaptis la idup agi. Itula sebapau Diau adau kuasau ngerjauka gegalaunyautu.”

¹⁵Adau diau ngiciakka, “Diautu Elia.” Adau pulau diau ngiciakka, “Diautu sughang nabi luak nabi-nabi senitu.”

¹⁶Satu Herudis ndengagh ceritau itu, diau bekatau, “Cetau ini Yuhanis diau senitu kuajung dipancung liaghau. Mbak kini diau la idup agi.”

¹⁷Nyela, Herudistu la ngajung nangkap Yuhanis, dikebat ngan dimasuakka di jil. Herudis ngerjauka titu, karnau Herudias bini dangau Pilipus, karnau Herudis la nika ngan diau.

¹⁸Mangku Yuhanis negughi Herudis, kataunyau, “Nidau bulia dighi nika ngan bini dang dighitu.”

¹⁹Itula sebapau Herudias luat ngan Yuhanis endak mbunua diau, anyautu diau nidau pacak ngerjaukanyau, karnau nidau diajung Herudis.

²⁰Herudis ngajung jemau njagaui Yuhanis iluak-iluak, karnau diau takut. Diau keruan, bansau Yuhanis sughang diau iluak, ajungan Allah. Diau galak ndengaghka Yuhanis ngiciak, empuak diau bingung ngan gelisa.

²¹Mangku adau jalan batan endak Herudias, masau Herudis ngadauka jamuan ulang taun. Gegalau pejabat tinggi ngan kumandan ngan jemau penting di Galilia dijeghumi.

²²Di jamuan itu anak gadis Herudias nari. Tariannyautu meriangka ati Herudis ngan mendahau. Mangku rajau bekatau ngan diau, “Kaba endak tuapau? Mintakla, aku ka ngenjuakkanyau.”

²³Mangku diau bejanji ngan gadistu ngan sumpa, “Tuapau kila diau kaba pintak ka kuenjuakka, empuak separau jak di retauku.”

²⁴Budak gadistu ngeluagh ngan betanyau ngan ma'au, “Tuapau diau iluak diau kupintak?” Timbalau, “Mintakla palak Yuhanis Pembaptis.”

²⁵Mangku gadistu cecepat ngulang njenguak rajau ngan bekatau, “Aku mintak palak Yuhanis Pembaptis dienjuakka ngan aku mbak kini pulau ditepiakka di talam.”

²⁶Ndengagh pinta'an itu Herudis sedia. Anyautu diau nidau pacak nula'au, karnau la besumpa di mukau mendahau.

²⁷Rajautu ngajung sughang penjagau pegi ke jil endak ngambiak palak Yuhanis. Mangku jemautu mancung liaghau di jil.

²⁸Mangku diau mbatak palak Yuhanistu ditepiakka di talam, dienjuakka ngan gadis itu, mangku gadistu ngenjuakkanyau ngan endu'au.

²⁹Anak-bua Yuhanis la ndengagh ceritau itu, mangku datang ngambiak mayatau ngan dikuburkanyau.

³⁰Mangku rasul-rasul diau diajung Yesustu la ngulang agi betunggal ngan Diau, diceritaukanyau gegalaunyau diau la dikerjaukanyau ngan diajaghka.

³¹Banyak nianan jemau datang ngan pegi, mangku makan kia ughangtu nidau kungang. Mangku katau Yesus, “Mela kitau pegi ke bada diau suni, mangku pacak kitau ajau, mangku kamu pacak gheghadu.”

³²Mangku ughangtu pegi nayiak perawu nuju bada diau suni.

³³Anyautu banyak jemau nginak ughangtu pegi, mangku keruan sapau ughangtu. Jak di gegalau dusun di ngepungannyau jemau belaghi jalan daghat mangku ndului ughangtu.

³⁴Masau Yesus tughun jak di perawu ngan nginak jemau banyak nianantu, Diau sial ngan ughangtu, karnau ughangtu luak bebiri diau nidau bediau tukang sayiau. Mangku Diau mulai banyak setu diau diajaghkaNyau ngan ughangtu.

³⁵Aghitu la petang, anak-buaHau njenguak Yesus, ngan bekatau, “Aghi la petang ngan bada ini suni.

³⁶Ajungla jemau banyak ini pegi, mangku ughangtu pacak mbeli makanan di dusun di ngepungan ini.”

³⁷Anyautu katau Yesus, “Kamu ajau ngenju'i ughangtu makan!” “Apu kami mesti pegi mbeli ruti regau duau ratus tanci pirak endak ngenju'i makan jemau ini?” Katau ughangtu.

³⁸Mangku Diau betanyau, “Beghapau ruti adau di kamu? Cubau kina'i!” Udim dikina'i, katau ughangtu, “Cuman adau limau bua ruti ngan duau ikuak ikan.”

³⁹Mangku diajungAu jemau banyak itu duduak di ghumput beruguak-ruguak.

⁴⁰Mangku ughangtu duduak beruguak-ruguak. Adau diau seratus seruguak, adau diau limau pulua.

⁴¹Udim itu Diau ngambiak limau bua ruti ngan duau ikuak ikan tadi, mangku ncungak ke langit sampai bedu'a beterimau-kasia, mangku dipiyak-piya'Au rutitu, dienjuakkaNyau ngan anak-buaHau, mangku ughangtu ngagiakanyau ngan jemau banyak itu. Luak itu pulau ngan duau ikuak ikan tadi.

⁴²Gegalau ughangtu makan enggut kenyang.

⁴³Udim itu tigha ruti tadi ditunggalka anak-buaHau, duau belas kinjagh penua temasuak pulau tigha ikan.

⁴⁴Jemau diau ngikut makan ruti kekirau limau ribu jemau lanang.

⁴⁵Mangku Yesus cecepat ngajung anak-buaHau nayiak perawu pegi nduluiNyau ke Betsaida di beghang danau, penarau Diau ngajung jemau banyak tadi baliak.

⁴⁶La udim jemau banyaktu pegi, Yesus nayiak ke bukit endak bedu'a.

⁴⁷Aghi la malam, perawu anak-buaHautu la jawua jak di tepi. Yesus gi adau di daghat.

⁴⁸Diau nginak ughangtu nanggung ndayungka perawu, karnau angin belawanan jak di adapan. Antak ka ayam bekukuak, Yesus datang njenguak ughangtu bejalan di pucuak ayiak. Diau luak endak melalui ughangtu.

⁴⁹Satu anak-buaHautu nginak Diau bejalan di pucuak ayiak, ughangtu ngirau Diautu antu mangku tegauk-gauk.

⁵⁰Gegalau ughangtu nginak Diau mangku tegagau nian. Anyautu Yesus ngiciak, katauNyau, “Tenangla ajau. Ini Aku. Nidau nanti takut.”

⁵¹Udim itu Diau masuak dalam perawu, mangku angintu mandak. Ughangtu kepagauan galau.

⁵²Tandau nyelia ngan limau bua ruti tadi lum kila ughangtu terti. Ughangtu segau ngerti.

⁵³La sampai di sebeghang danau, Yesus ngan anak-buaHau ndaghat ngan belabua di pantai Genesarit.

⁵⁴Satu ughangtu tughun jak di perawu, jemau nginak, bansau diau datang itu Yesus.

⁵⁵Mangku ughangtu belaghi ke gegalau daira itu ngan mulai mbata'i jemau buidapan njenguak Yesus di manau kila dikiciakka Diau adau.

⁵⁶Di manau kila Yesus datang, empuak di kuta, empuak di dusun, empuak di talang, jemau mbata'i jemau buidapan ke lapangan ngan mintak, supayau diajung mbibit baju Yesus, empuak cuman ujungAu. Mangku gegalau jemau diau mbibitau ghadu galau.