Read Central Malay MARKUS 7 Bible Online

MARKUS 7 - Central Malay bible

MARKUS 7

¹Adau rumbungan jemau Parisi ngan guru ukum Taurat jak di Yerusalim datang njenguak Yesus.

²Ughangtu nginak adau anak-bua Yesus diau makan ngan tangan kumua, nidau bebasua nurut peraturan agamau.

³Karnau jemau Yahudi terutamau jemau Parisi nidau makan, amun lum bebasua tangan kudai, karnau ughangtu nurut nian adat lembagau niniak puyangau.

⁴Setu diau dibeli di pekan nidau dimakan, amun lum dibasua kudai. Banyak pulau peraturan lain jak di niniak puyangau diau dituruti, misalau carau mbasua gelas, mangkuak ngan pekakas tembagau.

⁵Karnau itu jemau Parisi ngan guru-guru ukum Taurattu betanyau ngan Yesus, “Ngapau anak-bua Kaba melanggar adat lembagau niniak puyang kitau? Ngapau ughangtu makan, nidau bebasua tangan kudai?”

⁶Timbal Yesus, “Kamu jemau cak alim! Nyela nian setu diau dikiciakka nabi Yesaya ngiciakka kamu, ‘Luak ini katau Allah, bangsau ini meregaui Aku cuman di mulut, anyautu ati ughangtu nidau terupuak Aku.

⁷Paya ajau ughangtu nyemba Aku. Ajaghan diau ughangtu ajaghka cuman katau manusiau ajau.’

⁸Perinta Allah nidau kamu turuti endak nuruti adat lembagau manusiau.”

⁹Mangku Yesus bekatau agi, “Kapu dighi pacak nian nulak perinta Allah, supayau kamu pacak ngikuti adat lembagau kamutu?

¹⁰Musa la ngiciakka ini, ‘Regauila enduak-bapak kamu’ lagi, ‘Jemau diau ndawaika enduak-bapa'au mesti diukum mati.’

¹¹Anyautu kamu ngajaghka, ‘Amun jemau bekatau ngan pejadiau, tanci diau semestiau dienjuakka ngan bak ngan mak la kuenjuakka ngan Allah,

¹²mangku kamu nidau ngajung agi jemautu nulungi pejadiau.’

¹³Ngan carau luak itu kamu nyatauka katau Allah nidau belaku, karnau endak ngikuti adat lembagau kamu. Mangku banyak kerjau luak itu diau kamu kerjauka.”

¹⁴Mangku Yesus mantau jemau banyak ngan bekatau, “Gegalau kamu dengaghkala, mangku kamu ngerti!

¹⁵Nidau bediau setu diau masuak ke mulut ngaramka jemau. Anyautu diau ngeluagh jak di mulut, itula diau ngaramkanyau.

¹⁶Amun betelingau, ndengaghla!”

¹⁷Mangku Yesus masuak ghuma endak nyingkir jak di jemau banyak, mangku anak-buaHau nanyauka reti umpamau itu.

¹⁸Yesus nimbal, “Kamu pulau lum terti? Nidau keruan ngan kamu, bansau setu diau masuak ke dalam mulut nidau pacak mbuat jemau aram?

¹⁹Karnau setu diau masuaktu nidau lalu jalan ati, tapitu jalan busung, mangku ngeluagh agi?” Ngan katau itu Yesus nyatauka, bansau nidau bediau makanan diau aram.

²⁰Mangku Yesus bekatau agi, “Setu diau ngeluagh jak di jemau itula diau ngaramkanyau.

²¹Karnau jak di dalam, jak di ati nimbul gegalau rupu'an ja'at, diau mbuat jemau nidau senangaian, maling, mbunua,

²²menaugawia, selak, ja'at, nipu, sekenda'au ajau, sengit, ngupatka jemau, geduak, segau diajagh.

²³Gegalau kerjau ja'at itu nimbul jak di ati. Itula diau ngaramka jemau.”

²⁴Udim itu Yesus ninggalka bada itu pegi ke daira Tirus. Diau masuak ghuma, karnau enggup keruan ngan jemau, bansau Diau adau di situ. Anyautu Diau nidau pacak munika diriAu.

²⁵Mangku adau sughang tinau, anak gadisau diarung iblis. Diautu ndengagh ceritau Yesus, mangku datang njenguak Diau ngan nunduak di adapanNyau.

²⁶Tinau itu ukan jemau Yahudi. Diautu asalau jak di daira Penisia di Siria. Diau mintak ngan Yesus ngisitka iblis jak di ana'autu.

²⁷Anyautu Yesus nimbal, “Nidau iluak ngambiak makanan budak keciak, disipatka ngan anjing. Budak keciak mesti kenyang kudai.”

²⁸“Nyela, tuan,” katau tinautu, “Tapitu anjing di bawa mija pulau makan ghima diau tumban jak di budak keciak.”

²⁹Mangku katau Yesus, “Karnau timbal dighitu, baliakla mbak kini. Iblis la larat jak di anak dighi.”

³⁰Tinau itu baliak. La sampai di ghuma diau nginak ana'au dang tiduak. Iblistu la larat jak di diau.

³¹Mangku Yesus pegi jak di daira Tirus. Diau lalu di Sidun mangku pegi ke danau Galilia di daira Dikapulis.

³²Adau jemau mbata'i sughang jemau diau tuli ngan gagap, mangku mintak Yesus nepiakka tanganAu di badan jemau itu.

³³Yesus mbata'i jemautu, diasingkaNyau jak di jemau banyak, mangku dicucuakkaNyau jaghiAu ke tebuak telingau jemau tuli tadi. La udim itu Diau beluda ngan ngendaska tanganAu di lida jemautu.

³⁴Mangku sampai ncungak ke langit, Yesus nyintak nyawau panjang ngan ngiciak ngan jemautu, katauNyau, “Ipata!” Retiau, “Ndengaghla!”

³⁵Mangku telingau jemautu ndengagh ngan lidahau lembut, mangku kici'annyau lantas.

³⁶La udim itu Yesus nidau ngajung jemau banyak ngiciakka setu diau dibuatAutu ngan sughang kiala. Anyautu tamba Yesus nega, jemau tamba banyak ngebarkanyau.

³⁷Jemau diau ndengagh ceritau itu kepagauan nianan, kataunyau, “Gegalaunyau dijadikaNyau iluak. Jemau tuli dijadikaNyau pacak ndengagh. Jemau bisu dijadikaNyau pacak ngiciak.”