Read Central Malay LUKAS 11 Bible Online

LUKAS 11 - Central Malay bible

LUKAS 11

¹Adau saghi Yesus bedu'a. Udim bedu'a adau sughang anak-buaHau bekatau, “Tuhan, cubau ajaghi kami bedu'a luak Yuhanis ngajaghi anak-buahau bedu'a.”

²Mangku Yesus bekatau ngan ughangtu, “Amun kamu bedu'a, kiciakka luak ini: Bapak, kami endak namau Dighi diregaui karnau Dighi suci. Kami endak Dighi merinta kami.

³Enju'i kami idang aghi makanan kami secukupau.

⁴Ngabiska dusau kami, karnau kami pulau ngabiska bilang jemau diau besala ngan kami. Mangku jangan ngenangka kami dicubaui.”

⁵Mangku Yesus bekatau agi, “Misalau sughang jak di kamu pegi ke ghuma kantinau tenga malam ngan bekatau ngan diau, ‘Minjam ruti tigau bua,

⁶karnau adau kantin singga di ghuma. Aku nidau bediau makanan.’

⁷Baghia diau nimbal luak ini: ‘Jangan ngeriaka aku. Duaghau la dikunci. Aku ngan anak-anakku la tiduak galau. Aku endiak pacak bangun ngenjuakka tuapau-apau ngan kaba.’

⁸Mangku luak manau? Aku bekatau, empuak diau nidau ka bangun ngenjuakka tuapau-apau ngan kaba karnau kaba kantinau, cengki karnau kaba nidau maluan maju mintak ngan diau, diau pulau ka bangun ngenju'i tuapau diau kaba enda'au.

⁹Karnau itu aku bekatau: Pintakla, mangku kamu ka dienju'i. Bedalakla, mangku kamu ka bulia. Gagurla duaghau, mangku kamu ka dibuka'i duaghau.

¹⁰Karnau jemau diau mintak ka dienju'i, jemau diau bedalak ka bulia, mangku jemau diau nggagur duaghau ka dibuka'i duaghau.

¹¹Apu adau jak di kamu diau ngenjuakka ulagh, amun ana'au mintak ikan?

¹²Apu diau ngenjuakka kalau, amun diau mintak telugh? Cengki nidau!

¹³Kinak luak itu, amun kamu jemau diau ja'at pacak ngenjuakka setu diau iluak ngan anak kamu, apau lagi Bapak kamu diau di sergau! Diau ka ngenjuakka Rua Allah ngan jemau diau mintak ngan Diau.”

¹⁴Adau saghi Yesus ngisitka iblis jak di sughang jemau bisu. Iblistu la ngeluagh, jemautu pacak ngiciak. Mangku jemau banyak kepagauan.

¹⁵Anyautu adau diau ngiciak, “Diau ngisitka iblis ngan kuasau Bilsebul, pengulu iblis itu.”

¹⁶Adau pulau diau mintak tandau nyelia jak di sergau endak nguji Diau.

¹⁷Anyautu Yesus keruan rupu'an ughangtu, mangku Diau bekatau, “Amun nenggeri teceghai-beghai sangi bemusuan, nenggeritu nidau ka beta'an. Lagi pulau amun jemau seghuma nidau suijauan ngan bemusuan sughang ngan diau lain, diau ka kacau.

¹⁸Luak itula pulau ngan iblis. Amun iblistu teceghai-beghai ngan sangi bemusuan, luak manau kuasauannyau pacak beta'an? Kapu dighi ngiciak, Aku ngisitka iblis ngan kuasau Bilsebul.

¹⁹Mangku amun Akuni ngisitka iblis ngan kuasau Bilsebul, ngan kuasau sapau anak-bua kapu dighi ngisitkanyau? Anak-bua kapu dighitula nyatauka kapu dighi besala.

²⁰Anyautu amun Aku ngisitka iblis ngan kuasau Allah, mangku Allah la mulai merinta di pugan kapu dighi.

²¹Misalau sughang diau kuat bepakaian lengkap nyayia ghumahau, gegalau retaunyau ka selamat.

²²Anyautu amun sughang diau lebia kuat melawan ngalakanyau, jemautu ka ngambiak gegalau pakaiannyau diau diandalkanyautu, mangku gegalau retau diagiakanyau.

²³Jemau diau nidau mihak ngan Aku melawan Aku, mangku jemau diau nidau nunggalka ngan Aku nceghai-beghaika.”

²⁴“Amun rua ja'at ngeluagh jak di jemau, diau ngidari ghimbau ndalak bada gheghadu, anyautu endiak dapat. Karnau itu diau bekatau, ‘Aku endak ngulang agi ke ghuma diau kutinggalka tadi.’

²⁵La sampai di situ, diau nginak ghumatu la beresia ngan alap.

²⁶Mangku diau pegi ngajak tujua kantinau diau lebia ja'at agi. Rua itu masuak mendam di ghumatu, mangku udim-udimau jemautu lebia pansan jak di senitu.”

²⁷La udim Yesus ngiciak luak itu, adau sughang jemau tinau jak di jemau banyaktu diau tegauk, kataunyau, “Riang nian tinau diau melahirka ngan minumi Kaba.”

²⁸Anyautu Yesus nimbal, “Riangla jemau diau ndengaghka katau Allah ngan na'atinyau.”

²⁹Penarau jemau tamba banyak, Yesus ngiciak agi, katauNyau, “Alaka ja'at jemau mbak kini. Ughangtu mintak tandau nyelia, anyautu cuman ka bulia tandau nabi Yunus.

³⁰Nabi Yunus njadi tandau batan endak jemau Niniwi, luak itula pulau Anak Manusiau ka njadi tandau batan endak jemau mbak kini.

³¹Aghi kiamat ratu jak di selatan ka diidupka serempak ngan jemau mbak kini, mangku diau ka mburuakka ughangtu, karnau ratu itu datang jak di ujung deniau endak ndengagh ajaghan Salumu diau bepengertian. Ngenian, diau adau di sini lebia besak jak di Salumutu.

³²Masau aghi kiamat jemau Niniwi ka ngeluagh serempak ngan jemau mbak kini, mangku ka mburuakka ughangtu, karnau jemau Niniwi ngubai peremba'au jak di dusaunyau, masau ndengagh kici'an Yunus. Ngenian, diau adau di sini lebia besak jak di Yunus.”

³³“Nidau bediau jemau diau maghakka lampu, mangku dibunikanyau ngan ditukupinyau. Lampu itu ka ditepiakka di badahau, supayau jemau diau masuak pacak nginak terangau.

³⁴Matau kamu umpamau lampu ati. Amun matau iluak, gegalau badan terang. Anyautu amun matau ja'at, gegalau badan keleman.

³⁵Karnau itu sepepadaula, supayau terang diau adau di ati kamu nidau njadi keleman.

³⁶Amun gegalau badan terang, nidau bediau diau keleman, mangku gegalaunyautu terang luak disinaghi lampu.”

³⁷Udim ngiciak luak itu, sughang Parisi mantau Yesus makan di ghumahau, mangku Yesus pegi makan di ghumahautu.

³⁸Jemau Parisi itu kemangan nginak Yesus makan nidau mbasua tangan kudai.

³⁹Karnau itu Yesus ngiciak ngan diau, katauNyau, “Nyela, kapu dighi jemau Parisi biasaunyau mbasua mangkuak ngan piring di luagh ajau, anyautu dalam ati kapu dighi penua kesela'an ngan keja'atan.

⁴⁰Ui, kapu dighitu bigal. Apu ukan Allah diau mbuat sebela luagh mbuat sebela dalam pulau?

⁴¹Anyautu enjuakkala isiau ngan jemau serik, mangku gegalaunyau ka beresia batan endak kapu dighi.

⁴²Celakaula kapu dighi, jemau Parisi, karnau gheghuku ngan tetaghuan kapu dighi enjuakka bagi sepulua sebagi, anyautu keadilan ngan kasia ngan Allah endiak disanauka. Awuak itula diau mesti kapu dighi kerjauka, diau lain pulau jangan dilalaika.

⁴³Celakaula kapu dighi, jemau Parisi, karnau kapu dighi galak duduak di bada duduak di mukau dalam ghuma sembayang ngan galak diregaui di pekan.

⁴⁴Celakaula kapu dighi, karnau kapu dighi luak kuburan nidau bediau tandau. Jemau endiak keruan, empuak mija'inyau.”

⁴⁵Adau sughang guru ukum Taurat diau bekatau ngan Yesus, “Pak Guru, ngan kici'an luak itu Dighi nggelakka kami pulau.”

⁴⁶Yesus nimbal, “Kapu dighi guru-guru ukum Taurat celakau pulau, karnau kapu dighi ngajung setu diau segau, ngenjuak peraturan diau segau dikerjauka, anyautu kapu dighitu dikit kia nidau endak nulung jemau ngerjaukanyau.

⁴⁷Celakaula kapu dighi, karnau kapu dighi mbuat kuburan nabi-nabi alap-alap, awuak nabitu dibunua niniak puyang kapu dighi.

⁴⁸Ngan carau luak itu kapu dighi mbenaghka perembak niniak puyang kapu dighi. Nyela, ughangtu mbunua nabitu, mangku kapu dighi mbuat kuburannyau alap-alap.

⁴⁹Luak ditulis dalam kitab Hikmat Allah, ‘Aku ka ngajung nabi-nabi ngan ajungan-ajunganKu njenguak ughangtu. Separau ka dibunua, separau ka diluatka ngan disiksau.’

⁵⁰Allah ngerjauka titu, supayau jemau mbak kini diukum karnau pembunuan nabi-nabi diau dikerjauka jak deniau adau,

⁵¹mulai jak di pembunuan Habel enggut pembunuan Sakaria diau dibunua di entaghau mija bada bekerban ngan Ghuma Allah. Percayaula, jemau mbak kini cengki ka diukum, karnau gegalau perembak itu.

⁵²Celakaula kapu dighi, guru-guru ukum Taurat, karnau kapu dighi la ngambiak kunci batan duaghau ngeruani Injil. Anyautu kapu dighi sendighi nidau masuak ke dalam ngeruaninyau, lagi pulau kapu dighi ngalangi jemau lain diau endak masuak ngeruaninyau.”

⁵³La udim pegi jak di ghuma itu, guru-guru ukum Taurat ngan jemau Parisi purik kematila mangku maju nguji Yesus

⁵⁴ngan ninjau resiauNyau endak nangkap katau diau sala dikiciakkaNyau.