Read Central Malay LUKAS 12 Bible Online

LUKAS 12 - Central Malay bible

LUKAS 12

¹Beribu-ribu jemau bererincitan, sampai adau diau tepijak keting. Penarau ughangtu betunggal, Yesus ngiciak ngan anak-buaHau, katauNyau, “Sepepadaula ngan ghagi jemau Parisi, diautu cak alim.

²Gegalaunyau diau tebuni ka kina'an ngan gegalaunyau diau diresiauka ka keruan.

³Setu diau kamu kiciakka aghi malam ka kedengaghan aghi siang. Diau kamu bisiakka di telingau jemau dalam biliak tekatup ka dikiciakka jak di berendau.”

⁴“Ingatkala, ui anak-buaKu, jangan kamu penakut ngan jemau diau cuman pacak mbunua badan. Udim itu nidau pacak ngapau-ngapaukanyau agi.

⁵Nyela, Aku ka nunjuakka ngan kamu, sapau diau mesti kamu takuti. Takutla ngan Allah, karnau la udim ngambiak nyawau, Diau bekuasau pulau ncapakka dalam nerakau. Percayaula, Diautu mesti kamu takuti.

⁶Ukanau burung pipit dijual limau ikuak seringgit? Empuak luak itu, nidau sikuak kia dilupauka Allah.

⁷Gumbak di palak kamu pulau la dibilangi galau. Karnau itu nidau nanti penakut. Beregaula kamu, sangkan burung pipit.”

⁸“Ingatkala iluak-iluak, jemau diau ngaku'i Aku di mukau jemau, jemautu ka diaku'i Anak Manusiau di adapan malaikat-malaikat Allah.

⁹Anyautu jemau diau nidau ngaku'i Aku di adapan manusiau, diau pulau nidau ka diaku'i di adapan malaikat-malaikat Allah.

¹⁰Amun jemau ngiciakka setu melawan Anak Manusiau, diau ka diampuni. Anyautu amun jemau nggelakka Rua Allah, diau endiak pacak diampuni.

¹¹Amun kamu dibatak ke adapan gubernur ngan penguasau endak diadili, jangan kamu ghegak, luak manau ngan tuapau kamu kiciakka endak mbenaghka diri kamu,

¹²karnau setu diau mesti kamu kiciakka itu ka diajaghka Rua Allah ngan kamu masau itu pulau.”

¹³Adau sughang jak di jemau banyak diau bekatau ngan Yesus, “Pak Guru, ajungla dang aku, mangku diau mbagi retau peninggalan bak kami ngan aku.”

¹⁴Yesus nimbal, “Sapau njadika Aku akim ngan pembagi retau kamu?”

¹⁵Mangku katau Yesus lagi, “Dengaghkala! Sepepadaula, supayau kamu jangan selak, karnau empuak sughang banyak kematila retaunyau, idupau nidau tegantung ngan kekayauannyautu.”

¹⁶La udim itu cuntau ceritau ini diceritauka Yesus ngan ughang itu, katauNyau, “Adau sughang jemau kayau, tanahau ngasilka banyak nianan.

¹⁷Mangku diau berupuak, ‘Tuapau diau ka kukerjauka? Karnau aku nidau bediau bada agi batan endak nepiakka asil tanaku.’

¹⁸Mangku diau bekatau, ‘Aku berencanau endak meleghak tengkiangku, mangku ka kutegakka besak-besak. Di tengkiang itula aku ka nepiakka gegalau padiku ngan gegalau retauku.

¹⁹La udim itu aku ka berupuak, Kaba la lemak, gegalaunyau la adau galau, la telungguak batan endak betaun-taun nidau ka abis. Mbak kini tigha kari gheghadu, tiduak makan ngan beriang-riang!’

²⁰Anyautu Allah bekatau ngan diau, ‘Ui, jemau bigal! Malam inila pulau nyawau kaba ka diambiak. Mangku retau diau la kaba lungguakka itu batan endak sapau?’

²¹Luak itula jemau diau melungguakka retau bendau batan endak diri sughang, amun diau nidau dianggap Allah kayau.”

²²Mangku Yesus bekiciak ngan anak-buaHau, “Itula sebapau Aku bekatau ngan kamu, jangan ghegak ngan pengidupan kamu, tuapau diau endak kamu makan ngan tuapau diau endak kamu pakai.

²³Karnau pentingla idup kamu sangkan makanan, ngan badan kamu sangkan baju.

²⁴Kina'ila burung kak. Diau nidau nanam, nidau ngetam, nidau bediau tengkiang. Anyautu Allah nyayia diau pulau. Jawua beregaula kamu sangkan banyak burung kak itu.

²⁵Empuak kamu ghegak, sapau jak di kamu pacak manjangka umurau empuak jerang ajau?

²⁶Mangku setu diau keciak ajau kamu endiak pacak kerjauka, ngapau kamu ghegak ngan setu lain?

²⁷Kina'ila bungau kelinyu. Diau nidau mintal, nidau nenun, anyautu rajau Salumu ngan gegalau kekayauannyau nidau bebaju sualap bungau itu.

²⁸Saghini ghumput di padang tumbua, pagi disilap abis. Empuak luak itu ghumputtu didandani Allah, apau lagi kamu. Ui, kamuni jemau diau nidau percayau nian.

²⁹Jadi, nidau nanti ghegak ngan bingung ngan setu diau endak kamu makan ngan kamu minum.

³⁰Gegalaunyautu didala'i jemau di deniauni diau nidau keruan Allah. Anyautu Bapak kamu keruan, bansau kamu mesti makan ngan minum.

³¹Jangan ghegak, anyautu beusahala, supayau Allah merinta dalam idup kamu. Udim itu gegalaunyau ka dienjuakka ngan kamu.”

³²“Nidau nanti penakut, ui kamu diau dikit jemaunyau, karnau Bapak kamu riang njadika kamu rajau luak Diau.

³³Jualkala retau kamu, enjuakkala tanciau ngan jemau serik, buatla batan endak kamu dumpit diau nidau ka rusak njadi retau di sergau diau endiak ka abis. Retau luak itu nidau pacak diambiak pemaling ngan nidau pacak dipajua gegat.

³⁴Karnau di bada retau kamu adau, di situla pulau rupu'an kamu adau.”

³⁵“Kamu mesti maju siap bebaju ngan lampu kamu maju maghak.

³⁶Kamu mesti luak anak-bua diau nunggu tuanau baliak jak di tandang, mangku amun diau baliak ngan nggagur duaghau, cecepat dibukakkanyau batan endak diau.

³⁷Alaka riangau anak-bua diau dang nunggu, masau tuanau sampai. Percayaula, tuanautu ka siap, ngajung anak-buahau itu duduak makan, mangku ditepi'inyau.

³⁸Amun diau sampai tenga malam apu paghak siang, amun ughangtu masia nunggu, riangla ughangtu.

³⁹Ingatkala ini, amun tuan ghuma keruan, kebilau pemaling datang, diau ka nunggu ghumahau, mangku pemaling endiak masuak.

⁴⁰Luak itu pulau kamu mesti siap nyambut Anak Manusiau, karnau kamu nidau keruan, kebilau masaunyau Diau ka datang.”

⁴¹Pitrus betanyau, “Apu kami diau Dighi kiciakka ngan ceritau tadi, apu gegalau jemau pulau?”

⁴²Katau Tuhan, “Jadila luak budak diau iluak ngan pacak dipercayaui, mangku diau dijadika tuanau kepalak jak di gegalau buda'au, supayau ngenju'i ughangtu makanan padau masaunyau.

⁴³Amun tuanau baliak mangku nginak diau dang ngerjauka tugasau, alaka riang budaktu!

⁴⁴Percayaula, tuanautu ka nyeraka gegalau retaunyau ngan buda'autu.

⁴⁵Anyautu, amun budaktu ja'at ngan bekatau dalam atiau, ‘Tuanku lum ka baliak-baliak!’, mangku mbaduki gegalau kantinau ngan makan-minum ngan mabuak.

⁴⁶Mangku tuanautu ka baliak, jam ngan aghiau diau nidau disangkau, mangku budaktu ka diukum beghat, dijadika senasip ngan jemau diau nidau percayau ngan Allah.

⁴⁷Budak diau tau kendak tuanau, anyautu nidau bedandan ngan nidau ngerjauka kendak tuanau, diau ka dilagaui banyak nian.

⁴⁸Anyautu jemau diau nidau keruan kendak tuanau, mangku ngerjauka setu diau mesti diukum, jemautu ka dibaduki dikit ajau. Jemau diau dienju'i banyak ka dituntut banyak pulau. Mangku jemau diau dipercayaui banyak dituntut lebia banyak lagi.”

⁴⁹“Aku datang endak maghakka api di deniau. Alaka ilu'au, amun apitu la maghak.

⁵⁰Adau sengsarau diau mesti Kualami. Mangku atiKu kelang-kedia nian, antak ka titu tejadi.

⁵¹Apu kamu sangkau, Aku datang endak mbatak damai di deniau? Nidau, ukan damai, tapitu pelawanan.

⁵²Mulai mbak kini limau ughang seghuma ka belawanan, tigau lawan duau, duau lawan tigau.

⁵³Ughangtu ka sangi bemusuan. Ba'au ka melawan ana'au diau lanang, anak lanang ka melawan ba'au. Ma'au ka melawan anak tinau, anak tinau ka melawan ma'au. Enduak mentuau ka melawan nantuau diau tinau, nantuau tinau ka melawan enduak mentuau.”

⁵⁴Yesus ngiciak pulau ngan jemau banyak, katauNyau, “Amun kapu dighi nginak aban itam di ara barat, kapu dighi bekatau, ‘Ka ujan’. Nyela, ujan nian.

⁵⁵Amun adau angin jak di selatan, kapu dighi bekatau, ‘Ka panas’. Nyela, panas nian.

⁵⁶Ui, kapu dighi jemau cak nidau terti. Tandau deniau kapu dighi pacak keruan, ngapau tandau saman ini kapu dighi endiak terti?

⁵⁷Ngapau kapu dighitu nidau mutuska setu diau benagh?

⁵⁸Amun sughang jak di kapu dighi diaduka jemau ke pengadilan, ncubau bedamai ngan diau penarau masia di jalan. Amun nidau, dibata'inyau ngadap akim. Akimtu ka nyeraka diau ngan anak-buahau mangku dimasuakka dalam jil.

⁵⁹Percayaula, kapu dighi nidau ka ngeluagh jak di jil, amun dendau lum kapu dighi bayighi lunas.”