Read Central Malay LUKAS 14 Bible Online

LUKAS 14 - Central Malay bible

LUKAS 14

¹Adau saghi aghi Sabat, Yesus pegi makan di ghuma sughang pengulu jak di jemau Parisi. Di situ gegalau jemau neghagi ngina'i Yesus.

²Mangku sughang jemau buidapan nyembap datang njenguak Yesus.

³Mangku Yesus betanyau ngan guru-guru ukum Taurat ngan jemau Parisi diau adau di situ, katauNyau, “Apu bulia kitau meghadui jemau buidapan aghi Sabat apu nidau?”

⁴Guru-guru ukum Taurat ngan jemau Parisitu diam galau. Yesus mantau jemau tadi, dighadukaNyau, mangku diajungAu pegi.

⁵Udim itu Yesus bekatau ngan ughangtu, “Misalau sughang jak di kapu dighi adau sughang anak madak sikuak sapi diau temasuak dalam pawuak aghi Sabat, apu nidau dikeluaghka aghi Sabat itu pulau?”

⁶Nidau bediau sughang kia diau pacak nimbali Yesus.

⁷Yesus nginak menda diau milia bada diau iluak nian. Karnau itu Diau ngiciakka ceritau ini ngan gegalau ughangtu.

⁸“Amun kapu dighi diaja'i ke jamuan jemau nika, jangan duduak di mukau sekali, karnau misalau adau jemau lain diau diaja'i pulau, pentingla diau sangkan kapu dighi,

⁹mangku tuan ghuma diau ngaja'i kapu dighi ngan jemau itu pulau tepasau pegi guak kapu dighi ngan bekatau, ‘Ma'ap, bada ini la disediauka batan endak menda itu.’ Mangku kapu dighi ka maluan nian, tepasau duduak di belakang sekali.

¹⁰Amun kapu dighi diaja'i, duduakla di belakang sekali. Asauku tuan ghuma ka njenguak kapu dighi ngan bekatau, ‘Mela, duduak di mukau.’ Mangku kapu dighi diregaui di adapan gegalau menda diau lain.

¹¹Karnau jemau diau nganggap diriau lebia jak di jemau lain ka dimaluka, mangku jemau diau ngensianka diriau ka diregaui.”

¹²Mangku Yesus ngiciak ngan jemau diau ngaja'iNyau tadi, katauNyau, “Amun dighi endak njamu, jangan ngajak kantin dighi, ading-beghading dighi, denga-sanak dighi, jemau sedusun diau kayau, karnau ughangtu ka ngaja'i dighi pulau. Ngan carau luak itu dighi ka nerimau balasan.

¹³Amun dighi endak njamu, aja'ila jemau serik, jemau cacat, jemau lumpua ngan jemau butau.

¹⁴Dighi ka riang, karnau ughangtu nidau ka bediau batan pembalasau keilu'an dighi. Keilu'an dighi ka dibalas Allah, masau jemau diau benagh diidupka jak di mati.”

¹⁵Ndengagh titu sughang jak di mendatu bekatau ngan Yesus, “Riangla jemau diau dijamu Allah, amun Diau datang njadi rajau.”

¹⁶Yesus bekatau ngan ughangtu, “Adau sughang jemau diau ngadauka jamuan besak. Diau banyak njeghumi jemau.

¹⁷La masau endak mulai njamu, diau ngajung anak-buahau pegi njenguak jeghumannyau ngan bekatau, ‘Mela, datangla. Gegalaunyau la siap.’

¹⁸Anyautu gegalau ughangtu sejagh sughang mintak ma'ap. Diau dulu bekatau ngan anak-buatu, ‘Aku empai mbeli tana. Aku mesti pegi merisaunyau. Ma'apkala aku.’

¹⁹Diau lain bekatau, ‘Aku empai mbeli sepulua ikuak sapi. Aku mesti pegi ncubau sapitu. Ma'apkala aku.’

²⁰Diau lain agi bekatau, ‘Aku empai udim nika. Aku endiak pacak datang.’

²¹Mangku anak-bua tadi baliak ngiciakka gegalaunyau ngan tuanau. Tuan itu mara nian, mangku bekatau ngan anak-buahau, ‘Pegila gegasip ke bilang jalan ngan penyimpangan, bata'ila ke sini jemau serik, jemau cacat, jemau butau, jemau lumpua.’

²²Udim dikerjauka, anak-buahau ngiciakka ngan tuanau, ‘Tuan, diau diperintaka dighi la kami kerjauka, anyautu gi adau bada.’

²³Mangku tuan itu bekatau agi, ‘Pegila keluagh kuta, desakla jemau di jalan ngan jemau di penyimpangan datang, mangku ghumakuni rami.

²⁴Keruanila, nidau bediau sughang kiala jak di menda diau kujeghumitu ka meghasauka makanan jamuanni.’ ”

²⁵Banyak kematila jemau bejalan serempak ngan Yesus. Sampai nulia, Yesus bekatau ngan ughangtu,

²⁶“Jemau diau datang njenguak Aku endak njadi anak-buaKu, jemautu mesti nyayangi Aku lebia jak di ba'au, ma'au, buntingau, anak-ana'au, ading-beghadingau, lagi lebia jak di nyawaunyau sendighi. Amun nidau, diau endiak pacak njadi anak-buaKu.

²⁷Jemau diau nidau endak mikul salipau, mangku ngikut Aku, diau endiak pacak njadi anak-buaKu.

²⁸Misalau sughang jak di kamuni endak negakka ghuma besak, cengki diau ka ngitung anggarannyau kudai, mangku diau keruan, apu tanciau cukup apu nidau.

²⁹Awuak la udim pendasiau, endiak pacak ngudiminyau, mangku jemau tetawau nginak kerjaunyautu

³⁰ngan bekatau, ‘Jemau itu endak negakka ghuma, endiak pacak ngudiminyau.’

³¹Misalau sughang rajau endak pegi beperang ngan rajau lain, cengki diau ka merupuakka kudai, apu tenterahau diau sepulua ributu pacak melawani tentera duau pulua ribu diau ndatangi ughangtu.

³²Amun nidau pacak, diau ka ngajung anak-buahau semasau musuatu gi jawua endak nanyauka sarat bedamai.”

³³Yesus bekatau agi, “Luak itu pulau ngan kamu, sughang kia jak di kamu nidau pacak njadi anak-buaku, amun nidau ninggalka gegalau retaunyau.

³⁴Gagham itu iluak, anyautu amun gagham nidau buasau agi, apu pacak ngulang masin agi? Cengki nidau!

³⁵Gaghamtu nidau begati agi, empuak di umau empuak batan pupuak. Nyela, dicapakka ajau. Amun betelingau, dengaghkala!”