Read Central Malay LUKAS 15 Bible Online

LUKAS 15 - Central Malay bible

LUKAS 15

¹Tukang tagia cuki ngan jemau nidau iluak banyak datang njenguak Yesus.

²Mangku jemau Parisi ngan guru-guru ukum Taurat bemumut, kataunyau, “Diautu nerimau jemau bedusau, mangku makan serempak ngan ughangtu.”

³Karnau itu ceritau ini diceritauka Yesus ngan ughangtu:

⁴“Misalau sughang jak di kapu dighi ngempu seratus ikuak bebiri, mangku kelengitan sikuak, apu diau nidau ninggalka diau sembilan pulua sembilan ikuak di padang ghumput, mangku pegi ndala'i diau lengittu enggut dapat?

⁵Mangku amun la dapat, dipikul, dibata'au baliak ngan riang.

⁶La sampai di ghuma dipantaunyau jemau pasigh ghumahau ngan kantin lainau sampai bekatau ngan ughangtu, ‘Mela, kitau beriang-riang, karnau bebiriku diau lengit itu la dapat.’

⁷Ngenian, luak itula pulau besakla keinji'an di sergau, karnau sughang jemau diau bedusau la betubat, sangkan keinji'an, karnau sembilan pulua sembilan jemau diau iluak ngan berupuak nidau nanti betubat.”

⁸“Misalau sughang tinau adau sepulua butiak tanci pirak, mangku lengit sutiak, apu diau nidau maghakka lampu, nyapu ghumahau mangku didala'inyau, enggut tanciautu dapat?

⁹Mangku tanciau la dapat, dipantaunyau jemau diau pasigh ghumahau ngan kantin lainau sampai bekatau, ‘Mela kitau beriang-riang, karnau tanciku diau lengittu la dapat.’

¹⁰Keruanila, luak itu pulau malaikat-malaikat Allah keriangan, karnau sughang jemau bedusau betubat.”

¹¹Yesus bekatau agi, “Adau sughang bapak, ana'au diau lanang adau duau ikuak.

¹²Ngiciak diau bunsu ngan ba'au, kataunyau, ‘Bak, enjuakkala ngan aku bagian retau kitau diau batan endak aku.’ Mangku ba'au mbagika retau bendaunyau ngan duau ana'autu.

¹³Lum lamau udim itu, anak bunsu tadi njualka gegalau bagiannyautu, mangku pegi merantau ke bada diau jawua. Di situ diau ncecapa'i tanciau ngan idup bereruyalan.

¹⁴Tanciau la abis galau, mangku adau kelapaghan diau pansan nian. Anak bunsu itu pulau ngalami sengsarau.

¹⁵Mangku diau pegi upahan ngan sughang jemau kayau diau mendam di situ, diajungau ke talang nyayia ingunan kaput.

¹⁶Anak bunsu itu endak ngisi busungau ngan ampau ngan dedak diau njadi makanan kaputtu, anyautu nidau sughang kia diau ngenjuakkanyau ngan diau.

¹⁷Mangku diau nyadari idupau, kataunyau, ‘Banyak nian jemau upahan ngan bak kami. Ughangtu keliwatan banyak makanan, anyautu aku di sini mati kelapaghan.

¹⁸Aku endak baliak njenguak bakku ngan bekatau ngan diau: Bak, aku la bedusau ngan sergau ngan dighi pulau.

¹⁹Aku nidau pantas agi dikiciakka anak dighi. Terimaula aku luluak jemau upahan ngan dighi.’ Mangku diau baliak njenguak ba'au.

²⁰Diau gi jawua, ba'au la kina'an diau, mangku ba'autu meghasau sial ngan diau. Ba'autu belaghi njengu'au, mangku disambutau ngan riang, dipelu'au ngan diciumau.

²¹Katau ana'autu, ‘Bak, akuni la bedusau ngan sergau ngan dighi pulau. Aku nidau pantas agi dikiciakka anak dighi.’

²²Anyautu ba'autu ngiciak ngan anak-buahau, ‘Batakla ke sini gegasip baju diau alap sekali, surumka ngan diau, mangku kenaukala cincin ngan sepatuau.

²³Udim itu ambiakla anak sapi diau bunguak sekali, mangku sembeliala. Mela kitau njamu ngan bereriang,

²⁴karnau anakku ini la mati mangku ngulang idup, diau la sesat mangku baliak agi.’ Mangku ughangtu mulai bereriang.

²⁵Masau itu ana'au diau tuau adau di umau, mangku diau baliak. La sampai pasigh ghumahau, diau ndengagh muni musik ngan nari.

²⁶Mangku diau mantau sughang anak-buahau ngan betanyau, ‘Ngapau ghuma rami?’

²⁷Anak-buahautu nimbal, ‘Ading kaba la baliak, mangku bak kaba ngajung nyembelia anak sapi diau bunguak, karnau ana'au la baliak ngan selamat.’

²⁸Ana'au diau tuautu mara kematila, enggup masuak ke ghuma, mangku ba'au ngeluagh muji diau.

²⁹Anyautu diau nimbal, ‘La betaun-taun aku bekerjau batan endak dighi, nidau kekela melawan. Anyautu sikuak kambing lum kekela dighi enjuakka ngan aku endak bereriang ngan kantin-kantinku.

³⁰Anak dighi itu la ngabiska retau dighi ngan tinau nakal. Satu diautu baliak, dighi nyembelia sapi bunguak batan endak diau.’

³¹Katau ba'au, ‘Nak, kaba maju di sini ngan aku. Gegalau retauku, retau kaba pulau.

³²Kitau pantas bereriang, karnau ading kaba la mati, mangku ngulang idup, diau la sesat, mangku baliak agi.’ ”