Read Central Malay LUKAS 19 Bible Online

LUKAS 19 - Central Malay bible

LUKAS 19

¹Yesus masuak ke kuta Yiriku. Diau maju bejalan melalui kuta itu.

²Di situ adau sughang kepalak tukang tagia cuki, namaunyau Sakius. Diautu kayau nian.

³Diau endak nginak, sapau Yesustu, anyautu nidau pacak, karnau diau pandak, lagi jemau di situ banyak nianan.

⁴Mangku diau belaghi ndului jemau banyak. Udim itu nayiak batang aghau, mangku pacak nginak Yesus diau ka lalu di situ.

⁵La sampai guak batang aghau tadi, mangku Yesus nginak ke atas sampai bekatau, “Sakius, tughunla gegancang, karnau saghini Aku endak singga di ghuma kaba.”

⁶Sakius tughun gegancang nerimau Yesus ngan riang.

⁷Anyautu gegalau jemau diau ngina'autu bemumut, kataunyau, “Diautu singga di ghuma jemau bedusau.”

⁸La di ghumahau, Sakius betegak ngan ngiciak ngan Tuhan, “Tuhan, separau jak di retauku ka kuenjuakka ngan jemau serik. Amun adau jemau diau kutipuka, ka kubaliakka ngan diau empat kali lipat.”

⁹Yesus bekatau, “Saghini jemau seghuma ini la diselamatka, karnau jemau ini pulau pengadau Abraham.

¹⁰Anak Manusiau datang endak ndala'i jemau lengit ngan nyelamatka jemau sesat.”

¹¹Ngan jemau diau ndengagh kici'anNyautu, Yesus ngiciakka cuntau ceritau ini pulau. Masau itu Diau la pasigh Yerusalim, jemau nyangkau, Allah la endak njadi rajau di deniau ini.

¹²Mangku Diau bekatau, “Adau sughang pengadau rajau pegi ke nenggeri diau jawua endak dijadika rajau, udim itu diau endak baliak.

¹³Antak ka pegi, diau nunggalka sepulua ughang anak-buahau, dienju'inyau padau sughang sebutiak tanci emas ngan bekatau, ‘Bedagangla pakai tanci ini, penarau aku pegi.’

¹⁴Anyautu jemau di nenggeriautu luat ngan diau. Mangku jemau tadi la bejalan, ughangtu ngajung jemau, supayau ngiciakka, ‘Kami enggup jemau itu njadi rajau kami.’

¹⁵La udim jemautu dijadika rajau, diau baliak, mangku diau mantau anak-buahau diau dienju'inyau tanci tadi, endak ngeruani, beghapau asil dagangan ughangtu padau sughang.

¹⁶Jemau diau dulu sekali datang bekatau, ‘Tuan, sutiak tanci emas diau dighi enjuakkatu la njadi sepulua.’

¹⁷Rajautu bekatau ngan anak-buahautu, ‘Iluak, kaba anak-bua diau belagham. Setu diau keciak kaba pacak dipercayaui, karnau itu aku ka ngajung kaba nguasaui sepulua kuta.’

¹⁸Anak-buahau diau keduau datang ngan bekatau, ‘Tuan, sutiak tanci emas dighitu la njadi limau.’

¹⁹Rajautu bekatau ngan anak-buahautu, ‘Kaba ka nguasaui limau kuta.’

²⁰Mangku anak-buahau diau ketigau datang ngan bekatau, ‘Tuan, ini tanci dighi. La kubunika dalam setangan.

²¹Aku penakut ngan dighi, karnau dighi jemau kejam. Dighi ngambiak diau nidau kekela dighi kerjauka. Dighi ngetam diau nidau dighi tanam.’

²²Rajautu bekatau ngan anak-buahautu, ‘Ui, kabanila ja'at! Aku ka ngukum kaba nurut kici'an kabani. Kaba la keruan akuni jemau kejam. Aku ngambiak setu diau endiak kukerjauka ngan ngetam setu diau endiak kutanam.

²³Amun luak itu, ngapau tanciku endiak kaba masuakka di bang, mangku amun aku baliak, aku pacak ngambi'au ngan ana'au.’

²⁴Mangku diau bekatau ngan jemau guak diau, ‘Ambiak tancitu jak di diau, enjuakka ngan jemau diau la adau tanci sepulua?’

²⁵Ughangtu nimbal, ‘Diau la adau sepulua.’

²⁶Rajautu bekatau, ‘Ingatkala, jemau diau buadau ka dienjuakka agi, mangku jemau diau nidau bediau tuapau-apau, setu diau adau di diau ka diambiak pulau jak di diau.

²⁷Mangku mbak kini batakla ke sini musua-musuaku diau nidau tetuju aku njadi rajaunyau. Bunuala gegalau ughangtu di adapanku.’ ”

²⁸Udim ngiciakka gegalaunyautu, Yesus bejalan di mukau ughangtu melajuka pejalananNyau ke Yerusalim.

²⁹La pasigh Betpagi ngan Betania di Bukit Saitun, Diau ngajung duau ughang anak-buaHau

³⁰ngan bekatau, “Pegila ke dusun diau di adapan kitau. Amun kamu masuak ke situ, kamu ka nginak sikuak anak keledai tetambang diau lum kekela dinayi'i jemau. Legha'ila tali keledaitu, mangku batak ke sini.

³¹Amun adau jemau betanyau ngan kamu, ‘Ngapau kamu melegha'i tali keledaitu?’ kiciakkala luak ini, ‘Tuhan enda'au.’ ”

³²Duau ughang anak-buahautu pegi, mangku nginak gegalaunyau luak diau la dikiciakka Yesus.

³³Ughang duautu dang melegha'i tali anak keledai itu, jemau ngempuau bekatau, “Ngapau kamu melegha'i tali anak keledaitu?”

³⁴Katau ughangtu, “Tuhan enda'au.”

³⁵Ughang duautu mbatak keledaitu guak Yesus, mangku ughang di situ mbentangka bajuau di belakang keledaitu ngan nayiakka Yesus di pucuak keledai.

³⁶Penarau Yesus nayiak keledaitu, jemau mbentangka bajuau di jalan.

³⁷Yesus laka sampai di Yerusalim, di jalan tebing Bukit Saitun, gegalau jemau rami diau ngikut Yesustu mulai tepekiak-pekiak ngagungka Allah ngan riang, karnau gegalau kerjauNyau diau nyelia diau la ughangtu kinak.

³⁸Katau ughangtu, “Tepujila Rajau diau datang dalam namau Tuhan. Damai di sergau. Tepujila Allah!”

³⁹Adau bebeghapau jemau Parisi diau ngikut ngan jemau banyak itu ngiciak ngan Yesus, “Guru, ajungla anak-bua Kaba diam.”

⁴⁰Yesus nimbal, “Percayaula, amun ughangtu diam, batu-batu inila ka tepekiak.”

⁴¹Mangku Yesus la pasigh ngan Yerusalim ngan nginak kuta itu, Diau nangisinyau,

⁴²katauNyau, “Alaka ilu'au, amun mbak kini pulau kaba terti tuapau diau ndatangka damai batan endak kaba. Anyautu mbak kini kaba nidau pacak ngina'au.

⁴³Masau ka sampai musua kaba ka ngelilingi kaba ngan kandang. Ughangtu ka ngepung kaba ngan ngesakka kaba jak di manau-manau.

⁴⁴Ughangtu ka mbenasauka kaba ngan gegalau jemau diau adau di kaba. Di dinding kaba sutiak kia batu nidau ka bediau agi diau tepasang ngan batu lain, karnau kaba nidau ngeruani, masau Allah datang endak nyelamatka kaba!”

⁴⁵Mangku Yesus masuak ke Ghuma Allah ngan mulai nundung jemau bedagang di situ.

⁴⁶Diau bekatau ngan ughangtu, “Di Injil Allah bekatau, ‘Ghumaku ghuma du'a.’ Anyautu kamu njadikanyau saghang penyamun.”

⁴⁷Idang aghi Yesus ngajagh di dalam Ghuma Allah. Imam-imam bepangkat tinggi, guru-guru ukum Taurat ngan tuau-tuau jemau Yahudi pulau endak mbunua Diau.

⁴⁸Anyautu ughangtu nidau keruan, luak manau caraunyau, karnau gegalau jemau maju endak ndengaghka Diau.