Read Central Malay LUKAS 2 Bible Online

LUKAS 2 - Central Malay bible

LUKAS 2

¹Timpau itu Kaisar Agustus merintaka, supayau gegalau jemau ditulis namaunyau.

²Caca jiwa diau dulu sekali itu diadauka, timpau Kirinius njadi gubernur di nenggeri Siria.

³Mangku jemau diau endak didaptarka baliak dusun galau.

⁴Yusup pegi pulau jak di Nasarit di Galilia ke Betlihim di Yudia, asal rajau Daud, karnau Yusup itu pengadau Daud.

⁵Yusup ngan Maria, buntingautu, pegi ke situ endak didaptarka namaunyau. Maria itu dang ngandung.

⁶Ughang duautu la sampai di Betlihim, Maria la bulanau endak merunggu.

⁷Mangku adau sughang anak lanang, anak tuaunyau. Kupiak itu dibalutau ngan kain, ditiduakka di bada makanan benatang, karnau ughangtu endiak dapat agi bada temalam di ghuma.

⁸Di ngepungan itu adau tukang sayia bebiri nyayia bebiriau di padang malam itu.

⁹Malaikat Tuhan datang guak ughangtu, mangku terang Tuhan besinagh nerangi ughangtu. Tukang sayia bebiritu takut kematila.

¹⁰Malaikat itu bekatau, “Nidau endak takut, karnau aku datang mbatak ceritau iluak batan endak kamu, ceritau diau meriangka gegalau manusiau.

¹¹Malam ini di kuta Daud la lahir Rajau Penyelamat, Diautu Keristus, Tuhan.

¹²Tandaunyau luak ini: Kamu ka betemu sughang Kupiak dibalut ngan kain, ditiduakka di bada makanan benatang.”

¹³Mangku adau malaikat banyak nianan ngan malaikat tadi diau muji-muji Allah, kataunyau,

¹⁴“Tepujila Allah di bada diau Mahatinggi. Di deniau damai guak jemau diau melemakka ati Allah.”

¹⁵Malaikat la pegi galau baliak ke sergau, mangku tukang sayia bebiritu ngiciak sughang ngan diau lain, kataunyau, “Mela kitau pegi ke Betlihim, nginak ceritau diau la tejadi diau dikiciakka Tuhan ngan kitau.”

¹⁶Ughangtu pegi cecepat mangku betemu Maria ngan Yusup ngan Kupiak itu diau tiduak di bada makanan benatang.

¹⁷La udim ngina'Autu, tukang sayia bebiritu ngiciakka ceritau Kupiaktu diau dikiciakka malaikat tadi.

¹⁸Mangku jemau kemangan galau ndengagh ceritau tukang sayia bebiri itu.

¹⁹Maria masuakka ceritau tadi dalam atiau mangku dirupuakkanyau.

²⁰Tukang sayia bebiritu baliak sampai muji ngan ngagungka Allah, karnau gegalaunyau diau la ughangtu dengagh ngan kinak semegi luak diau dikiciakka malaikat tadi.

²¹La udim tujua malam, Kupiak itu disunat, mangku dinamauka Yesus, namau diau la dikiciakka malaikat, antak ka Diau dikandung.

²²La lepas pantang nurut ukum Taurat Musa, mangku enduak-bapa'Au mbatak Budak keciak itu ke Yerusalim endak diserakanyau ngan Tuhan,

²³karnau dalam ukum Tuhan ditulis luak ini, “Bilang anak lanang diau tuau mesti diseraka ngan Tuhan.”

²⁴Ughangtu endak pulau mbatak kerban burung tekuku duau ikuak madak duau ikuak burung darau diau mudau, luak dikiciakka dalam ukum Tuhan.

²⁵Di Yerusalim adau sughang diau benamau Simiun. Diau jemau iluak lagi ta'at ngan Allah. Diau dang nungguka masaunyau Allah endak nyelamatka jemau Israil. Rua Allah nyertaui diau.

²⁶Rua Allahtu la nyatauka ngan diau, bansau diau nidau ka mati, amun lum nginak Rajau Penyelamat diau dijanjika Tuhan itu.

²⁷Simiun masuak ke Ghuma Allah, karnau dibimbing Rua Allah. Masau itula pulau Yesus diau masia keciaktu dibatak masuak ngan enduak-bapa'Au endak njalanka setu diau ditetapka ukum Taurat.

²⁸Mangku Simiun nyambut Budak keciak itu, dipitungAu sampai muji Allah, kataunyau,

²⁹“Tuhan, mbak kini ajungla aku pegi jak di deniauni ngan tenang, luak la Dighi janjika.

³⁰Aku la nginak sendighi keselamatan jak di Dighi,

³¹keselamatan diau la Dighi sediauka batan endak gegalau umat manusiau.

³²Diautu terang diau nerangi bangsau lain diau nidau keruan Allah. Jemau Israil ka dipuji karnau Diau.”

³³Enduak-bapa'Au kemangan ndengagh kici'an Simiun ngiciakka Anak ughangtu.

³⁴Mangku Simiun du'aka ughang duautu mangku ngiciak ngan Maria, enduak Budak keciak itu, kataunyau, “Budak keciak ini dipilia Allah, endak mbenasauka ngan nyelamatka banyak jemau Israil. Diauni njadi tandau diau dilawan banyak jemau,

³⁵mangku isi ati jemau banyaktu keruan. Anyautu ati kaba ka pedia, luak lukau ngan pedang diau tajam.”

³⁶Adau pulau sughang nabi tinau diau la tuau nianan. Namaunyau Hana, anak Panuil jak di pengadau Asir. Diautu belaki tujua taun,

³⁷mbak kini diau la merandau. Umurau la delapan pulua empat taun. Diautu maju di Ghuma Allah. Diau puasau ngan bedu'a siang malam.

³⁸Masau itu pulau diau datang njenguak ughangtu, beterimau-kasia ngan Allah, mangku ngiciakka ceritau Budak keciak itu ngan gegalau jemau diau nantika Yerusalim dibibaska.

³⁹La udim dikerjauka gegalaunyau diau mesti dikerjauka nurut ukum Tuhan, Yusup tigau beghanak baliak ke dusunau Nasarit di Galilia.

⁴⁰Budak keciak itu tamba besak tamba kuat. Diau bepengertian nian ngan disayangi Allah.

⁴¹Idang taun enduak-bapak Yesus pegi ke Yerusalim masau aghi rerayau Paska.

⁴²Umur Yesus la duau belas taun, ughangtu pegi endak merayauka Paska luak biasaunyau.

⁴³La udim aghi rerayau itu, ughangtu baliak. Anyautu Yesus tinggal di Yerusalim, nidau keruan ngan enduak-bapa'Au.

⁴⁴Ughang duautu sangkau Diau ngikut rumbungan. La bejalan sesaghian, mangku didala'inyau di pugan sana'au ngan kantin-kantinau.

⁴⁵Karnau endiak dapat, ughang duautu ngelipat ke Yerusalim maju ndala'i Diau.

⁴⁶La duau malam didala'i, mangku ughang duautu betemu Diau di Ghuma Allah dang duduak di guak guru-guru ukum Taurat sampai ndengagh ngan betanyau ngan ughangtu.

⁴⁷Jemau diau ndengagh Diau kemangan galau, karnau pacak nian nimbal.

⁴⁸Enduak-bapa'Au kemangan pulau nginak Diau, mangku endu'Au bekatau ngan Diau, “Nak, ngapau Kaba luak ini ngan kami? Bak Kaba ngan aku la temas ndala'i Kaba.”

⁴⁹Mangku Yesus ngiciak ngan enduak-bapa'Au, katauNyau, “Ngapau kapu dighi ndala'i Aku? Apu kapu dighi nidau keruan, bansau Aku mesti adau di ghuma BapakKu?”

⁵⁰Anyautu enduak-bapa'Autu nidau terti kici'anNyautu.

⁵¹La udim itu Diau baliak ke Nasarit serempak ngan enduak-bapa'Au. Diau maju na'ati perinta ughangtu. Gegalaunyautu disimpan dalam ati endu'Au.

⁵²Yesus tamba besak, tamba bepengertian, mangku tamba disayangi Allah ngan manusiau.